Read Kernewek Hosea 9 Bible Online

Hosea 9 - Kernewek bible

Hosea 9

¹Na lowenha, Ysrael, na heudh kepar ha'n kenedhlow, rag ty re beu dislen dhe'th Duw;[21] ty a garas gober hora war bub leur-drushya.

²Ny wra an leur-drushya na'n gwinwask aga boesa, ha'n gwin nowydh a's toell.

³Ny drigons yn tir an ARLOEDH; Efraym a dhehwel dhe Ejyp, ha dybri taklow avlan yn Assyria.

⁴Ny dhiverons offrynnow gwin dhe'n ARLOEDH, ha ny vydh aga sakrifisow plegadow dhodho. Y fydh dhedha avel bara kynvann, peub neb a'n deber a vydh avlan: aga bara yw ragdha aga honan; ny dheu yn chi an ARLOEDH.

⁵Pandr'a wrewgh hwi yn dydh an goel apoyntys, hag yn dy'goel an ARLOEDH?

⁶Awotta, galsons drefenn kollva, Ejyp a's kuntell, Memfis a wra aga ynkleudhyas. Hwynn a erit aga thresoryow a arghans, ha spern a vydh yn aga thyldow.

⁷Dydhyow an kessydhyans re dheuth, dydhyow an dial re dheuth. Ysrael a'n godhvydh. An profoes yw boba, an gour spyrysel yw muskok, drefenn dha lies kammhynseth, ha'n kas meur.

⁸An profoes, gans ow Duw, yw an goelyador war Efraym;[22] yma antell ydhna yn oll y fordhow, ha kas yn chi y Dhuw.

⁹Galsons down yn podredhes, avel yn dydhyow Gibea. Ev a berth kov a'ga hammhynseth, ha kessydhya aga feghosow.

¹⁰My a gavas Ysrael, avel grappys y'n gwylvos; my a welas dha dasow, ev a veu avel an frut a-varr a'n figbrenn, y gynsa frut. Mes i a dheuth dhe Baal-peor, hag omsakra dhe'n imaj methus, hag ethons ha bos mostedhes avel an taklow kasadow a garsons.

¹¹Golewder Efraym a nij dhe-ves avel edhen, heb dineythyans, heb torr, heb omdhoen.

¹²Kyn hwrellons meythrin aga fleghes, my a gemmer pubonan dhe-ves, ma na vo denvyth gesys. Go-i pan dreylyav anedha!

¹³Efraym, dell welis vy, re dhestnas y fleghes dhe vos preydh;[23] hag Efraym a dal dri yn-mes y fleghes dhe'n denledhyas.

¹⁴Ro dhedha i, ARLOEDH! pandr'a redh? Ro dhedha i torr a gyll hy askorr, ha diwvronn sygh.

¹⁵Yma oll aga droktra yn Gilgal; ena my a's kasas. Drefenn aga drogoberow, my a wra aga fesya a'm chi. Ny wrav vy aga hara namoy; oll aga fennsevigyon yw penn-kales.

¹⁶Efraym yw gweskys, aga gwreydhenn yw sygh; ny askorrons frut. Ynwedh mar tineythons, my a ladh an fleghes karadow a'ga thorr.

¹⁷Ow Duw a wra aga denagha, drefenn na woslowsons orto; i a vydh gwandrysi yn mysk an kenedhlow.