Read Kernewek Yoel 1 Bible Online

Yoel 1 - Kernewek bible

Yoel 1

¹Ger an ARLOEDH hag a dheuth dhe Yoel mab Pethuel.

²Klewewgh hemma, hwi henavogyon, ha rewgh skovarn, oll hwi annedhysi an tir. A hwarva tra a'n par ma yn agas dydhyow, po yn dydhyow agas tasow?

³Derivewgh hemma orth agas fleghes, ha'ga fleghes orth aga fleghes i, ha'ga fleghes dhe henedh arall.

⁴An pyth a asas an lokust yowynk an hes a lokustes re'n dybris; ha'n pyth a asas an hes, an lokust diaskell re'n dybris; ha'n pyth a asas an lokust diaskell an lokust distruel re'n dybris.

⁵Difunewgh, hwi bennow-medhow, hag oelewgh; oulyewgh, oll hwi dhiwessoryon gwin, drefenn an gwin nowydh, drefenn y vos treghys dhe-ves a-dhiworth agas ganow.

⁶Rag kenedhel re yskynnas war ow thir, krev ha diniver; hy dyns yw dyns lew, hag yma dhedhi diwen lewes.

⁷Hi re dhifeythyas ow gwinbrenn, ha terri ow figbrenn; hi re'n diruskas glan ha'y dewlel dhe-ves; y skorrennow yw gwrys gwynn.

⁸Gwra kyni avel gwyrghes grogysys gans yskar rag gour hy yowynkneth.

⁹Treghys dhe-ves yw offrynn greun hag offrynn diwes a-dhiworth chi an ARLOEDH; an oferysi a gyn, menystrys an ARLOEDH.

¹⁰Gwastys yw an gwel, an tir a dhesygh; drefenn bos gwastys an ys; desyghys yw an gwin nowydh, an oyl a fyll.

¹¹Kemmerewgh meth, hwi diogyon; oulyewgh, a hwi wonedhysi gwinlannow, rag an gwaneth ha rag an heydh, drefenn bos diswrys trevas an gwel.

¹²Desyghys yw an gwinbrenn, ha'n figbrenn a wannha; an reunavalwydhenn, an balmwydhenn ynwedh, ha'n avalwydhenn, devri oll gwydh an gwel: yw gwedhrys; rag gwedhrys yw lowena a-dhiworth mebyon den.

¹³Omwrogysiwgh ha kyni, hwi oferysi; oulyewgh, hwi venystrys an alter: dewgh, spenewgh an nos yn yskar, hwi venystrys ow Duw: rag an offrynn greun ha'n offrynn diwes yw kemmerys dhe-ves dhiworth chi agas Duw.

¹⁴Sakrewgh penys, gelwewgh kuntelles solem, kuntellewgh an dus hen, oll annedhysi an tir, yn chi an ARLOEDH agas Duw, ha kriewgh war an ARLOEDH.

¹⁵Ellas rag an jydh! rag ogas yw dydh an ARLOEDH, hag avel terroes dhiworth an Ollgalloesek y teu.

¹⁶A nyns yw treghys dhe-ves an boes a-rag agan lagasow, lowena ha heudhder dhiworth chi agan Duw?

¹⁷Gwedhrys yw an hasennow yn-dann aga figellow,[1] forsakys yw an skiberyow, terrys yn-nans yw an ysleow, rag gwedhrys yw an ys.

¹⁸Assa wra an gwarthek hanasa! Penndegys yw an oghen, drefenn nag eus peur dhedha; devri, gwrys yn ahwer yw greow an deves.

¹⁹Dhiso ji. A ARLOEDH, y kriav: rag tan re dhevoryas peurvaow an gwylvos; ha flamm re gowlloskas oll gwydh an gwel.

²⁰Bestes an gwel a gri warnas ynwedh: rag bos desyghys goverow an dowr, ha tan re dhevoryas peurvaow an gwylvos.