Read Kernewek Yoel 2 Bible Online

Yoel 2 - Kernewek bible

Yoel 2

¹Hwythewgh an hirgorn yn Sion, ha gelwewgh dhe'n gas y'm menydh sans; krenes oll annedhysi an norvys: rag dydh an ARLOEDH a dheu; pur ogas yw,

²dydh tewlder ha tewlyjyon, dydh kommol ha tewolgow tew. Dell les an bora war an menydhyow y teu pobel vras ha krev; nyns esa bythkweth aga far, na ny vydh namoy a'y wosa, bys vlydhynyow henedhow ha henedhow.

³Tan a dhevor a-dheragdha, hag a-dryv dhedha flamm a lesk. An tir yw avel lowarth Eden a-dheragdha, hag a-dryv dhedha gwylvos difeyth; vri, ny vydh diank anedha.

⁴Aga semlans yw avel semlans mergh; ha kepar ha kasvergh y hwrons i poenya.

⁵Kepar ha gans tros charettow, lemmel a wrons war bennow an menydhyow, avel tros flamm tan ow tevorya an sowl, avel pobel grev arayys rag kas.

⁶A-ragdha poblow a gren: oll an fasow a gyll aga liw.

⁷Poenya a wrons avel tus krev; i a yskynn an fos avel kasoryon; i a geskerdh yn-rag, pubonan didro yn y fordh y honan, ha ny dreylyons mes a'ga hynsyow.

⁸Ny wrons i gwaska an eyl erbynn y gila; pubonan a gerdh yn y hyns y honan: stevya a wrons yn mysk kowas a sethow, heb treylya a-denewen.

⁹Assaltya an sita a wrons; ha poenya war an fos; krambla a wrons war an chiow, hag entra der an fenestri avel lader.

¹⁰An dor a wra krysya a-dheragdha; an nevow a gren: an howl ha'n loer a dewlha, an ster a skon a derlentri.

¹¹Ha'n ARLOEDH a wra dyllo y lev a-dherag y lu, rag y gaslys yw pur vras, ha krev yw ev neb a gollenow y er. Rag meur yw dydh an ARLOEDH ha pur euthyk; ha piw a yll y berthi?

¹²Lemmyn ytho, yn-medh an ARLOEDH, treylyewgh dhymm gans oll agas kolonn, ha gans penys, ha gans oelva, ha gans kynvann.

¹³Skwardyewgh agas kolonn, a-der agas dillas, ha treylyewgh arta dhe'n ARLOEDH agas Duw, rag grassyes ha truedhek yw, lent ow serri, ha meur y dregeredh, hag ev a gemmer edrek a'n drog.

¹⁴Piw a woer mar kwra ev dehweles ha kemmeres edrek, ha gasa bennath a-dryv dhodho, offrynn greun hag offrynn diwes dhe'n ARLOEDH agas Duw?

¹⁵Hwythewgh an hirgorn yn Sion, sakrewgh penys, gelwewgh kuntelles solem.

¹⁶Kuntellewgh an bobel, sakrewgh an kuntelles, gelwewgh an dus hen war-barth, kuntellewgh an fleghes ha'n re ow tena an vronn: gases an gour pries y stevell, ha'n venyn bries hy chambour.

¹⁷Gwres an oferysi, menystrys an ARLOEDH, oela ynter an porth ha'n alter, ha leverens, ‘Spar, A ARLOEDH, dha bobel, ha na ro dha ertach yn disenor, ensampel dhe'n kenedhlow. Prag y leverons yn mysk an poblow, “Ple'ma aga Duw?” ’

¹⁸Ena y hwra an ARLOEDH perthi avi orth y dir, ha kemmeres pita a'y dus.

¹⁹An ARLOEDH a worthybis ha leverel dh'y bobel, Awotta, my a dhannvon dhywgh ys ha gwin hag oyl, ha lenwys vydhowgh gansa: ha nevra namoy ny rov dhywgh disenor yn mysk an kenedhlow.

²⁰Ha my a bellha dhiworthowgh lu an kledhbarth, ha'y fesya yn syghtir ha difeyth, gans y fas troha mor an est, ha'y dhelergh troha mor an howlsedhes; ha'y fler a wra drehevel, ha'y flerynsi a dheu yn-bann. Rag ev re wrug taklow bras.

²¹Na borth own, a dir; bydh heudhik ha lowenha: rag an ARLOEDH re wrug taklow bras.

²²Na berthewgh own, hwi vestes an gwel: rag peurvaow an gwylvos yw gwyrdh; an wydhenn a dheg hy frut, an figbrenn ha'n gwinbrenn a re aga nerth.

²³Ytho bedhewgh heudhik, hwi vebyon Sion, ha lowenhewgh y'n ARLOEDH agas Duw: rag ev re ros dhywgh an glaw a-varr rag ewnder, hag ev re dhros glaw yn-nans ragowgh: glaw a-varr ha glaw diwedhes kepar hag y'n dalleth.

²⁴An leuryow-drushya a vydh leun a ys, ha'n gwinwaskow a fenn a win hag oyl.

²⁵My a astiver dhywgh an blydhynyow a wrug hes an lokustes aga dybri, an lokust diaskell, an lokust distruel, ha'n lokust yowynk, ow lu bras a dhannvenis yn agas mysk.

²⁶Hwi a dheber ha bos lenwys, ha gormel hanow an ARLOEDH agas Duw, neb re'gas dyghtyas marthys da, ha ny wra ow fobel perthi meth bynitha.

²⁷Hwi a wodhvydh my dhe vos yn mysk Ysrael, ha my dhe vos an ARLOEDH agas Duw, ha nyns eus nahen. Ha ny wra ow fobel perthi meth bynitha.

²⁸Ha wosa hemma my a dhinwa ow spyrys war gig oll, ha'gas mebyon ha'gas myrghes a wra profoesa, ha'gas tus koth a hunros hunrosow ha'gas gwer yowynk a wel gwelesigethow.[2]

²⁹Ynwedh war an wesyon ha'n maghtethyon, y'n dydhyow na, y hwrav vy dinewi ow Spyrys.

³⁰My a dhiskwa marthusyon y'n nevow hag y'n norvys, goes ha tan ha kolovenyow a vog.

³¹An howl a vydh treylys dhe dewlder, ha'n loer dhe woes, kyns dos dydh an ARLOEDH, bras hag euthyk.

³²Ena y fydh sawys pubonan neb a elow war hanow an ARLOEDH; rag yn menydh Sion y fydh remenant dell leveris an ARLOEDH, hag yn Yerusalem an re a dhienk, neb a wra an ARLOEDH aga gelwel.