Read Kernewek Amos 1 Bible Online

Amos 1 - Kernewek bible

Amos 1

¹Geryow Amos, neb esa yn mysk bugeledh Tekoa, a welas yn gwelesigeth a-dro dhe Ysrael yn dydhyow Uzzia myghtern Yuda hag yn dydhyow Yeroboam mab Yoash, myghtern Ysrael, diw vlydhen kyns an dorgrys.

²Hag y leveris: An ARLOEDH a us dhiworth Sion ha dhiworth Yerusalem ev a re y lev; peurvaow an vugeledh a dhesygh, ha gwedhrys yw gwartha menydh Karmel.

³Yndellma y lever an ARLOEDH: Rag tri hammweythres a Damaskus, ha rag peswar, ny wrav vy hepkorr an kessydhyans; drefenn i dhe dhrushya Gilead gans draylellow-drushya a horn.

⁴Ytho my a dhannvon tan war ji Hazael, dhe dhevorya palesyow Ben-hadad;

⁵dralya a wrav barr Damaskus, ha terri an annedhyas dhiworth nans Aven, ha'n den a syns an welenn dhiworth Beth-eden; divres vydh pobel Aram bys yn Kir, yn-medh an ARLOEDH.

⁶Yndellma y lever an ARLOEDH: Rag tri hammweythres a Gaza, ha rag peswar, ny wrav vy hepkorr an kessydhyans; drefenn i dhe dhoen pobel gowal yn divroedh orth aga delivra dhe Edom.

⁷Ytho my a dhannvon tan war fos Gaza, dhe dhevorya hy falesyow.

⁸Terri a wrav an annedhyas dhiworth Ashdod, ha'n den a syns an welenn dhiworth Ashkelon, ha my a dreyl ow dorn erbynn Ekron; ha remenant an Filistysi a dhe goll, yn-medh an Arloedh DUW.

⁹Yndellma y lever an ARLOEDH: Rag tri hammweythres a Tyr, ha rag peswar, ny wrav vy hepkorr an kessydhyans; drefenn i dhe dhelivra pobel gowal dhe Edom, ha ny borthsons kov a'n kevambos a vrederedh.

¹⁰Ytho my a dhannvon tan war fos Tyr dhe dhevorya hy falesyow.

¹¹Yndellma y lever an ARLOEDH: Rag tri hammweythres a Edom, ha rag peswar, ny wrav vy hepkorr an kessydhyans; drefenn ev dhe helghi y vroder gans kledha, ha taga y druedh; ha'y sorr a skwardyas bynitha, hag ev a withas y gonnar bys vykken.

¹²Ytho my a dhannvon tan war Teman, dhe dhevorya palesyow Bosra.

¹³Yndellma y lever an ARLOEDH: Rag tri hammweythres a vebyon Ammon, ha rag peswar, ny wrav vy hepkorr an kessydhyans; drefenn i dhe skwardya gwragedh gans flogh yn Gilead, mayth efannens aga amal.

¹⁴Ytho my a worr tan yn fos Rabba, dhe dhevorya hy falesyow gans garm yn dydh an gas, gans annawel yn dydh an korwyns;

¹⁵ha mos a wra aga myghtern dhe dhivroedh, ev ha'y bennternedh war-barth, yn-medh an ARLOEDH.