Read Kernewek Amos 2 Bible Online

Amos 2 - Kernewek bible

Amos 2

¹Yndellma y lever an ARLOEDH: Rag tri hammweythres a Moab, ha rag peswar, ny wrav vy hepkorr an kessydhyans; drefenn ev dhe leski dhe lim eskern myghtern Edom.

²Ytho my a dhannvon tan war Moab dhe dhevorya palesyow Kerioth; ha Moab a verow yn mysk tervans, yn mysk garm ha son an korn;

³ha my a dregh an breusyas yn-mes a-dhiworti, ha ladha oll hy fennsevigyon ganso, yn-medh an ARLOEDH.

⁴Yndellma y lever an ARLOEDH: Rag tri hammweythres a Yuda, ha rag peswar, ny wrav vy hepkorr an kessydhyans; drefenn i dhe skonya lagha an ARLOEDH, ha ny withsons y ordenansow, mes aga fals dhuwow re wrug dhedha sowdhanas, may kerdhas aga thasow war aga lergh.

⁵Ytho my a dhannvon tan war Yuda, dhe dhevorya palesyow Yerusalem.

⁶Yndellma y lever an ARLOEDH: Rag tri hammweythres a Ysrael, ha rag peswar, ny wrav vy hepkorr an kessydhyans; drefenn i dhe wertha an den gwiryon a arghans, ha'n edhommek a dhiw eskis.

⁷I a drett yn-dann dreys[1] penn an voghosogyon yn doust dor; ha treylya a-denewen fordh an dus uvel; den ha'y das a y'n keth vowes rag may fo disakrys ow hanow sans.

⁸War dhillas kemmerys yn goestel i a wrowedh ryb pub alter; ha gwin a'n re neb re beu spalys a evons yn chi aga Duw.

⁹Byttegyns my a dhistruis an Amoryas a-dheragdha may feu y ughelder kepar hag ughelder an kederwydh, hag ev maga krev avel derow; distrui a wrug vy y frut a-vann ha'y wreydh a-woeles.

¹⁰Ha my a'gas dros yn-mes a vro Ejyp, ha'gas hembronk dew-ugens blydhen y'n difeyth rag perghenna bro an Amorysi;

¹¹ha my a dhrehevis rann a'gas mebyon yn profoesi ha rann a'gas tus yowynk yn nazirysi. A nyns yw yndella, A vebyon Ysrael? yn-medh an ARLOEDH.

¹²Mes hwi a wrug dhe'n nazirysi eva gwin, ha gorhemmynna a wrussowgh dhe'n brofoesi, ow leverel, ‘Na brofoesiwgh!’

¹³Otta, my a'gas gwask y'n dor, kepar dell yw gweskys y'n dor kert gorveghys gans vanalow.[2]

¹⁴Ny vydh tyller dhe fia dhodho rag an den skav, ha'n den krev ny with y nerth, na ny yll an kasor omsawya.

¹⁵Ny sev an den a syns an warak, na ny skap an den skav y dreys, na ny yll an marghek omsawya.

¹⁶Ha'n moyha kolonnek yn mysk an gasoryon a fi noeth y'n jydh na, yn-medh an ARLOEDH.