Read Kernewek Amos 3 Bible Online

Amos 3 - Kernewek bible

Amos 3

¹Klewewgh an ger ma a leveris an ARLOEDH er agas pynn, mebyon Ysrael, erbynn an teylu oll a wrugavy y dhri yn-mes a vro Ejyp, ow leverel:

²Hwi unnsel a aswonnis vy yn-mes a oll teyluyow an nor; rakhenna my a wra agas kessydhya rag agas drogoberow oll.

³A yll dew kerdhes war-barth marnas i a sett an prys?

⁴A wra lew usa y'n koes, pan nag eus preydh vyth ganso? A wra lew yowynk kria dhiworth y fow mar ny gemmeras ev travyth?

⁵A wra edhen koedha yn maglenn war an leur pan nag eus boes ynni? A wra antell lemmel a-dhiwar an leur heb kachya travyth?

⁶Eus korn hwythys yn sita, heb bos an bobel ownek? A vydh anfeusi yn sita, marnas an ARLOEDH a'n gwrug?

⁷Yredi ny wra an Arloedh DUW travyth heb diskudha y dowl kudh dh'y servysi an brofoesi.

⁸An lew re usas: piw ny'n jevydh own? An Arloedh DUW re gewsis: piw ny brofoes?

⁹Diskleryewgh dhe'n palesyow yn Ashdod, ha dhe'n palesyow yn bro Ejyp, ha leverewgh: ‘Omguntellewgh war venydhyow Samaria, ha gwelewgh an lies arwask eus ynni, ha'n dus arweskys a-berth ynni.’

¹⁰Ny wodhons fara ewn, yn-medh an ARLOEDH, an re a guntell yn aga falesyow preydh aga garowder ha ladrans.

¹¹Rakhenna yndellma y lever an Arloedh DUW: Eskar a omsett a-dro dhe'n vro ha dri dhe'n leur agas nerth, ha pyllys vydh agas palesyow.

¹²Yndellma y lever an ARLOEDH: Dell dhelirv an bugel mes a anow an lew diw arr po tamm skovarn, yn kettella delivrys vydh mebyon Ysrael eus trigys yn Samaria, gans tamm a weli ha gans gweli-dydh a dhamask.

¹³Klewewgh ha testewgh erbynn chi Yakob, yn-medh an Arloedh DUW, Duw an luyow,

¹⁴rag y'n jydh may kessydhyav Ysrael drefenn y gammweythresow, my a gessydh alteryow Bethel, ha treghys vydh kern an alter ha koedha a wrons dhe'n leur.

¹⁵Brewi a wrav an gwavos war-barth gans an havos, ha mos dhe goll a wra an chiow a dhans olifans, ha distruys vydh an chiow bras, yn-medh an ARLOEDH.