Read Kernewek Amos 4 Bible Online

Amos 4 - Kernewek bible

Amos 4

¹Klewewgh an ger ma, hwi vughes Bashan neb usi war venydh Samaria, neb a wask an voghosogyon, owth arwaska an edhommogyon, neb a lever dh'aga gwer, ‘Doro, mayth yffyn!’

²An Arloedh DUW re dos ren y sansoleth: Otta dydhyow a dheu warnowgh ma'gas kemmerons dhe-ves gans kerdyn, ha'n diwettha ahanowgh gans higennow-pysk.

³Ha hwi a dhe-ves dre aswaow an fosow, pub huni yn-rag yn unn rew; ha tewlys yn-mes vydhowgh dhe Harmon, yn-medh an ARLOEDH.

⁴Dewgh dhe Bethel, ha kammdremenewgh; dhe Gilgal, ha kammdremenewgh hwath moy; drewgh agas sakrifisow pub myttin, agas dega pub trydydh;

⁵offrynnewgh sakrifis a rasyans gans bara goell ha gelwewgh tus dhe offrynnow bolonjedhek, deklaryewgh i; rag hemm yw agas bodh, A vebyon Ysrael, yn-medh an Arloedh DUW.

⁶Mes my a ros dhywgh glanythter a dhyns yn agas sitys oll ha fowt a vara yn agas tylleryow oll, ha ny dhehwelsowgh dhymm, yn-medh an ARLOEDH.

⁷Hag ynwedh my a skonyas a ri dhywgh an glaw, ha tri mis hwath gesys kyns an drevas; ha my a wrug glaw dhe goedha war unn sita ha ny wrugavy glaw dhe goedha war sita arall; war unn park glaw a goedh, ha'n park na gavas glaw a wedhras;

⁸ytho diw sita po teyr a wandras dhe gen sita dhe eva dowr, heb bos disyghys; byttegyns ny dhehwelsowgh dhymm, yn-medh an ARLOEDH.

⁹My a'gas gweskis gans kleves losk ha kleves melynheans y'n ys; agas lowarthyow ha gwinlannow pals, agas figbrennyer ha'gas olewbrennyer a veu dybrys gans an lokust yowynk; byttegyns ny dhehwelsowgh dhymm, yn-medh an ARLOEDH.

¹⁰Dannvon a wrug vy warnowgh pla dell wrug yn Ejyp; ladha a wrug vy agas tus yowynk gans an kledha, war-barth gans agas mergh kemmerys yn preydh. My a dhrehevis fler agas kaslysyow bys yn agas dewfrik; byttegyns ny dhehwelsowgh dhymm, yn-medh an ARLOEDH.

¹¹My a dhomhwelis rann ahanowgh, dell wrug Duw domhwel Sodom ha Gomorra. Kepar hag yttew y fewgh, tennys mes a'n tan, byttegyns ny dhehwelsowgh dhymm, yn-medh an ARLOEDH.

¹²Rakhenna yndella y hwrav dhis, A Ysrael: drefenn my dhe wul hemma dhis, bydh parys dhe vetya dha Dhuw, A Ysrael!

¹³Rag otta, ev neb a form an menydhyow ha gul an gwyns, neb a dheklar y vrys dhe vab-den; neb a dreyl an myttin dhe dewlder, ha stankya war tylleryow ughel an norvys — an ARLOEDH, Duw an luyow yw y hanow!