Read Kernewek Amos 6 Bible Online

Amos 6 - Kernewek bible

Amos 6

¹Go-i an re usi attes yn Sion, ha'n re a omsyns saw war venydh Samaria, yw henwys kynsa an gwlasow, ha dhedha y teu chi Ysrael!

²Tremenewgh dhe Kalne, ha gwelewgh, hag alena kewgh dhe Hamath veur, hag ena diyskynnewgh dhe Gath an Filistysi. Yns i gwell ages an gwlaskordhow ma? Po yw aga thiredh brassa ages agas tiredh hwi?

³A hwi a vynn delatya an drog dhydh, mes hwi a dhre ogas an esedhva a arowder!

⁴An re usi a'ga growedh war weliow a dhans olifans hag owth omystynna yn lows war aga gweliow-dydh; ow tybri hordhes yowynk dhiworth an flokk, ha leughi yn-mes a'n stall;

⁵neb a gan orth son an delynn, hag avel Davydh ow tevisya dhedha daffar menestrouthi.

⁶I a yv gwin yn bollow owth omuntya gans oylys a'n finna, mes nyns yns i duwenhes drefenn terroes Yosep!

⁷Ytho lemmyn i a vydh an kynsa ow mos yn divroedh, ha kevewi an re a omystynn yn lows a hedh.

⁸An Arloedh DUW re dos ren y enev y honan (yn-medh an ARLOEDH, Duw an luyow): Kas genev yw goeth Yakob, ha kas genev yw y balesyow; ha my a dhaskorr an sita ha pup-tra eus ynni.

⁹Mar pydh gesys deg den yn unn chi, i a verow.

¹⁰An ewnter a dhen, ev neb wra y leski, a'n drehav, dhe dhri an eskern yn-mes a'n chi, hag ev a lever dhe nebonan a-bervedh y'n chi, ‘Eus nebonan hwath genes?’ Ev a worthyp, ‘Nag eus’, hag ena ev a lever, ‘Taw! Res yw na vo menegys hanow an ARLOEDH.’

¹¹Rag ott, an ARLOEDHa worhemmynn, hag ev a wysk an chi bras yn magoryow, ha'n chi byghan a vydh terrys dhe demmyn.

¹²A wra mergh poenya war garnek? A wra den aras ena gans oghen? Mes hwi re dreylyas ewnder yn kegis, ha'n frut a wiryonedh yn fuelenn.

¹³Hwi a lowenha yn Lo-debar, ow leverel, ‘A ny wrussyn gans agan nerth agan honan kemmeres ragon Karnaym?’

¹⁴Rag otta, my a dhrehav kenedhel er agas pynn, A ji Ysrael, yn-medh an ARLOEDH, Duw an luyow; ha hi a wra agas gwaska a-dhiworth Lebo-hamath bys yn syghnans Araba.