Read Kernewek Amos 7 Bible Online

Amos 7 - Kernewek bible

Amos 7

¹An Arloedh DUW a dhiskwedhas hemma dhymm, hag otta, yth esa ev ow formya hes a lokustes pan dhallethi an aswels tevi — an aswels wosa treghi goera an myghtern.

²Ha pan gowldhyb'sens losow an dor, yn-medhav, ‘A Arloedh DUW, gav, my a'th pys! Fatell yll Yakob sevel? rag byghan yw.’

³An ARLOEDH a gemmeras edrek a hemma: ‘Ny hwyrvydh’, yn-medh an ARLOEDH.

⁴An Arloedh DUW a dhiskwedhas hemma dhymm: hag otta, yth esa an Arloedh DUW ow kelwel rag prov dre dan, ha'n tan a dhevoryas an islonk meur, hag a dhevoryas rann a'n tir.

⁵Ytho yn-medhav, ‘A Arloedh DUW, hedh, my a'th pys! Fatell yll Yakob sevel? rag byghan yw.’

⁶An ARLOEDH a gemmeras edrek a hemma: ‘Ny hwyrvydh hemma na hwath’, yn-medh an Arloedh DUW.

⁷Ev a dhiskwedhas hemma dhymm, hag otta, yth esa an ARLOEDH ow sevel ryb fos gwrys dhe blemmik, plemmik yn y dhorn.

⁸Ha'n ARLOEDH a leveris dhymm, ‘Pandr'a welydh, Amos?’ Hag yn-medhav, ‘Plemmik.’ Ena an ARLOEDH a leveris, ‘Ottavy ow settya plemmik yn mysk ow fobel Ysrael; ny wrav aga sparya namoy.’

⁹Tylleryow ughel Ysak a vydh forsakys, ha sentris Ysrael a vydh difeythys ha my a sev erbynn chi Yeroboam gans an kledha.

¹⁰Ena Amasia, oferyas Bethel, a dhannvonas dhe Yeroboam myghtern Ysrael, ow leverel: ‘Amos re vrasas er agas pynn yn kres chi Ysrael; ny yll an tir godhav y eryow oll.

¹¹Rag Amos re leveris hemma: “Yeroboam a verow gans an kledha, hag Ysrael a vydh divres yredi yn-mes a'y dir.” ’

¹²Hag Amasia a leveris dhe Amos, ‘A goelyek, ke, fi dison dhe bow Yuda, ha dybri bara ena, ha profoesa ena;

¹³mes na brofoes namoy yn Bethel, rag y vos sentri an myghtern, ha'n chi ryel.’

¹⁴Ena Amos a worthybis dhe Amasia, ‘Nyns ov profoes, na mab a brofoes, mes bugel ov, ha dyghtyer frut sykaminwydh,

¹⁵ha'n ARLOEDH a'm kemmeras dhiworth holya an flokk, ha'n ARLOEDH a leveris dhymm: “Ke, gwra profoesa dhe'm pobel Ysrael.”

¹⁶Ha lemmyn, klew ger an ARLOEDH: Ty a lever, “Na wra profoesa erbynn Ysrael, ha na bredhek erbynn chi Ysak.”

¹⁷Rakhenna an ARLOEDH a lever hemma: Hora vydh dha wreg y'n sita ha'th vebyon ha'th vyrghes a goedh gans an kledha; ha'th tir a vydh rynnys der an gordenn; ty dha honan a verow yn tir avlan, ha divres vydh Ysrael yn sur a-dhiwar y dhor.’