Read Kernewek Amos 9 Bible Online

Amos 9 - Kernewek bible

Amos 9

¹My a welas an Arloedh ow sevel ryb an alter, hag ev a leveris: Gwask pennow an pilars erna grenno an treudhow, ha'ga brewi war benn an bobel oll! An rann yw gesys a ladhav gans an kledha; denvyth ny fi dhe-ves, denvyth ny skap.

²Kyn palons bys yn ifarn, ow dorn a's kemmer alena; kynth yskynnons dhe nev, my a's dre yn-nans alena.

³Kynth omgudhons war wartha menydh Karmel, my a's hwila alena ha'ga hemmeres; ha kynth yns i kudhys a-dherag ow dewlagas yn goeles an mor, ena my a worhemmynn dhe'n sarf, ha hi a's brath.

⁴Ha kynth ons yn kethneth dherag aga eskerens, ena yth arghav dhe'n kledha, hag ev a's ladh; ha my a worr ow dewlagas warnedha rag drog, a-der rag da.

⁵An Arloedh, DUW an luyow — ev a doch an tir ha teudhi a wra, ha myns eus trigys ynno a gyn, hag oll an tir a sev kepar ha'n Nil, ha koedha arta, kepar ha'n Nil yn Ejyp;

⁶ev a dhrehav y'n nevow y jambouryow ughel ha fondya y nen a-ugh an nor; ev a elow dowrow an mor, ha'ga dinewi war enep an nor — an ARLOEDH yw y hanow.

⁷A nyns owgh hwi kepar ha mebyon an Ethiopysi dhymm, A vebyon Ysrael? yn-medh an ARLOEDH. A ny dhres vy Ysrael yn-mes a vro Ejyp, ha'n Filistysi yn-mes a Kaftor, hag Aram yn-mes a Kir?

⁸Otta, yma dewlagas an Arloedh DUW war wlaskor an peghes, ha my a's distru dhiwar enep an nor. Mes ny gowldhistruav chi Yakob, yn-medh an ARLOEDH.

⁹Rag otta, my a worhemmynn, ha shakya chi Ysrael yn mysk an gwlasow, kepar ha shakya kroeder, ha ny goedh bilienn vyth dhe'n leur.

¹⁰Oll peghadoryon ow fobel a verow gans an kledha, neb a lever, ‘Drog ny dheu nes dhyn, na ny dhrehedh dhyn.’

¹¹Y'n jydh na my a dhrehav skovva Davydh yw koedhys ha keas hy aswaow, ha daswul hy magoryow, ha'y drehevel kepar hag y'n dydhyow koth;

¹²may perghennons an remenant a Edom ha'n kenedhlow oll may feu ow hanow gelwys warnedha, yn-medh an ARLOEDH neb a wra hemma.

¹³Otta dydhyow ow tos, yn-medh an ARLOEDH, may teu an aradror nes dhe'n myser, ha trettyer an grappys dhe haser an has; ha'n menydhyow a dhinwa sugen grappys, ha teudhi a wra an brennow oll.

¹⁴Ha my a dreyl kethneth ow fobel Ysrael, hag i a dhastrehav an sitys dhibobel ha triga ynna; i a blans gwinlannow hag eva aga gwin, hag i a wra lowarthyow ha dybri aga frut.

¹⁵My a wra aga flansa war aga thir, ha ny vydhons diwreydhys namoy dhiwar aga dor a res vy dhedha, yn-medh an ARLOEDH dha Dhuw.