Read Kernewek Yona 1 Bible Online

Yona 1 - Kernewek bible

Yona 1

¹Ger an ARLOEDH a dheuth dhe Yona mab Amittay, ow leverel,

²‘Sav, ke dhe Nineve, an sita vras, ha kri er hy fynn, rag aga droktra re yskynnas a-ragov.’

³Mes Yona a sevis rag fia dhe Tarshish, dhiworth golok an ARLOEDH. Ev eth yn-nans dhe Yoppa, ha kavoes gorhel ow mos dhe Tarshish. Ytho ev a ros an pris ha mos a-bervedh ynno, mayth ella gansa dhe Tarshish, a-dhiworth golok an ARLOEDH.

⁴Mes an ARLOEDH a dheghesis gwyns bras war an mor, hag yth esa annawel vras y'n mor, may feu an gorhel yn peryll a vos terrys.

⁵Ha'n marners a's teva own, ha kria, peub war y dhuw y honan, ha tewlel mes an karg esa y'n gorhel bys y'n mor, may fo skaffa. Mes Yona galsa yn-nans bys y'n barth a-ji dhe'n lester, hag yth esa ow krowedha, down yn kosk.

⁶An kapten a dheuth dhodho ha leverel, ‘Dar! prag yth es'ta ow koska? Sav, galw war dha Dhuw. Martesen Duw a wra vri ahanan, ma na wryllyn mos dhe goll.’

⁷Hag yn-medhons an eyl dh'y gila, ‘Dewgh, tewlyn ni prenn, may fo godhvedhys dhyn piw yw dhe vlamya, an drog ma dhe vos devedhys warnan.’ Ytho i a dewlis prenn, ha'n prenn a goedhas war Yona.

⁸Ena i a leveris dhodho, ‘Lavar dhyn, piw yw dhe vlamya, an drog ma dhe vos devedhys warnan? Pyth yw dha ober, hag a-ble teuthys? Pyth yw dha bow? Hag a bana bobel osta?’

⁹Yn-medh ev dhedha, ‘Ebrow ov vy, ha my a berth own a'n ARLOEDH, Duw an nev, neb a formyas an mor ha'n tir sygh.’

¹⁰Ena an dus a's teva own bras, hag yn-medhons dhodho, ‘Pandr'yw hemma a wrussys?’ Rag an dus a wodhva, ev dhe vos ow fia a-dhiworth golok an ARLOEDH, rag ev re lavarsa dhedha.

¹¹Ena yn-medhons dhodho, ‘Pandr'a wren ni dhiso jy, may fo an mor spavenhes ragon?’ Rag an mor a dheuth ha bos moy ha moy garow.

¹²Yn-medh ev dhedha, ‘Kemmer vy yn-bann ha'm tewlel y'n mor, ena an mor a vydh spavenhes ragowgh, rag my a woer an annawel vras ma dhe goedha warnowgh drefenn an pyth re wrugavy.’

¹³Mes an wer a roevyas gans nell rag may tehwellens dhe dir sygh, ha ny allsons, rag an mor a dheuth ha bos moy ha moy garow er aga fynn.

¹⁴Ytho i a grias war an ARLOEDH ow leverel, ‘A ARLOEDH, ni a'th pys, na as ni dhe vos dhe goll rag bewnans an gour ma, ha na worr warnan an blam rag skoellya goes gwiryon; rag ty, A ARLOEDH, re wrug kepar dell veu dha vodh.’

¹⁵Ena i a gemmeras Yona yn-bann ha'y dewlel y'n mor; ha garowder an mor a hedhis.

¹⁶Ha'n gwer a's teva own bras a'n ARLOEDH, hag i a offrynnas sakrifis dhe'n ARLOEDH, ha gul ambosow.

¹⁷An ARLOEDH a dhannvonas pysk bras dhe lenki Yona; ha Yona a veu yn torr an pysk tri dydh ha teyr nos.