Read Kernewek Niverow 1 Bible Online

Niverow 1 - Kernewek bible

Niverow 1

¹An ARLOEDH a gewsis orth Moyses yn gwylvos Sinay, yn tylda an kuntelles, yn kynsa dydh an nessa mis, y'n nessa blydhen wosa i dhe dhos yn-mes a Ejyp, ow leverel,

²Gwra niveryans a'n kuntelles oll a vebyon Ysrael, herwydh aga theyluyow, herwydh chiow aga thasow, herwydh an niver a henwyn, pub gorreydh penn ha penn;

³a-dhia ugens bloedh ha moy, peub yn Ysrael a yll mos yn-rag dhe vresel, ty hag Aron a wra aga nivera, lu ha lu.

⁴Hag y fydh genowgh gour a bub loeth, pubonan ow pos penn y deylu.

⁵Ha'n re ma yw henwyn an wer a wra sevel genowgh. A Rewben: Elisur, mab Shedeur;

⁶a Simeon: Shelumiel mab Surishadday;

⁷a Yuda: Nahshon mab Amminadab;

⁸a Yssakar: Nethaneel mab Suar;

⁹a Zebulun: Eliab mab Helon;

¹⁰a vebyon Yosep: a Efraym, Elishama mab Ammihud; hag a Manasse, Gamaliel mab Pedahsur;

¹¹a Benyamin: Abidan mab Gideoni;

¹²a Dan: Ahiezer mab Ammishadday;

¹³a Asher: Pagiel mab Okran;

¹⁴a Gad: Eliasaf mab Deuel;

¹⁵a Naftali: Ahira mab Enan.

¹⁶An re ma o an re apoyntys yn-mes a'n kuntelles, hembrenkysi loethow aga thasow, pennow kordhow Ysrael.

¹⁷Moyses hag Aron a gemmeras an wer ma re bia merkys aga henwyn,

¹⁸hag yn kynsa dydh an nessa mis, i a geskorras war-barth an kuntelles oll, hag a omgovskrifas herwydh aga theyluyow, herwydh chiow aga thasow, herwydh an niver a henwyn, a-dhia ugens bloedh ha moy, penn ha penn,

¹⁹dell worhemmynnis an ARLOEDH dhe Moyses. Yndella ev a's niveras yn gwylvos Sinay.

²⁰Mebyon Rewben, kynsa-genys Ysrael, aga linyeth, herwydh aga theyluyow, herwydh chiow aga thasow, herwydh niver an henwyn, penn ha penn, pub gorreydh a-dhia ugens bloedh ha moy, peub a ylli mos war-rag dhe vresel:

²¹an re niverys a loeth Rewben o hwegh mil ha dew-ugens ha pymp kans.

²²A vebyon Simeon, aga henedh, herwydh aga theyluyow, herwydh chiow aga thasow, an re anedha a veu niverys, herwydh niver an henwyn, penn ha penn, pub gorreydh a-dhia ugens bloedh ha moy, peub a ylli mos yn-rag dhe vresel:

²³an re niverys a loeth Simeon o nownsek mil ha dew-ugens ha trihans.

²⁴A vebyon Gad, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

²⁵an re niverys a loeth Gad o pymp mil ha dew-ugens, hwegh kans ha deg ha dew-ugens.

²⁶A vebyon Yuda, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

²⁷an re niverys a loeth Yuda o peswardhek mil ha tri-ugens ha hwegh kans.

²⁸A vebyon Yssakar, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

²⁹an re niverys a loeth Yssakar o peswardhek mil ha dew-ugens ha peswar kans.

³⁰A vebyon Zebulun, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³¹an re niverys a loeth Zebulun o seytek mil ha dew-ugens ha peswar kans.

³²A vebyon Yosep: mebyon Efraym, aga linyeth herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³³an re niverys a loeth Efraym o dew-ugens mil ha pymp kans.

³⁴A vebyon Manasse, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³⁵an re niverys a loeth Manasse o dewdhek mil warn ugens ha dew kans.

³⁶A vebyon Benyamin, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³⁷an re niverys a loeth Benyamin o pymthek mil warn ugens ha peswar kans.

³⁸A vebyon Dan, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³⁹an re niverys a loeth Dan o dew vil ha tri-ugens ha seyth kans.

⁴⁰A vebyon Asher, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

⁴¹an re niverys a loeth Asher o unn mil ha dew-ugens ha pymp kans.

⁴²Mebyon Naftali, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

⁴³an re niverys a loeth Naftali o trydhek mil ha dew-ugens ha peswar kans.

⁴⁴An re ma o an re niverys, neb a wrug Moyses hag Aron aga nivera gans gweres an hembrenkysi a Ysrael, dewdhek gour, pubonan rag chi y das.

⁴⁵Ytho niver kowal mebyon Ysrael, herwydh chiow aga thasow, a-dhia ugens bloedh ha moy, peub a ylli mos yn-rag dhe vresel:

⁴⁶aga niver kowal o hwegh kans ha tri mil ha pymp kans ha hanter-kans.

⁴⁷Mes ny veu niverys an Levysi gans loeth aga thasow yn aga mysk.

⁴⁸Rag an ARLOEDH a leveris dhe Moyses,

⁴⁹‘Unnsel loeth an Levysi ny wredh nivera, na ny's niverydh yn mysk mebyon Ysrael erell;

⁵⁰mes sett an Levysi war dabernakel an dustuni, ha war oll y dhaffar, ha war bup-tra eus dhodho; i a dheg an tabernakel hag oll y dhaffar, hag i a'n serv, ha kampya a-dro dhe'n tabernakel.

⁵¹Pan wra an tabernakel mos yn-rag, an Levysi a wra y dhisevel; ha pan dheu an tylda dhe vos settys yn-bann, an Levysi a wra y sevel. Ha mar teffo estren[1] yn ogas, ev a vydh gorrys dhe'n mernans.

⁵²Mebyon Ysrael a wra settya aga thyldow, pub gour ryb y gamp y honan ha pub gour ryb y vaner y honan, herwydh aga luyow;

⁵³mes an Levysi a wra kampya a-dro dhe dylda an dustuni, ma na vo sorr war guntelles mebyon Ysrael; ha'n Levysi a with charj tabernakel an dustuni.’

⁵⁴Ytho mebyon Ysrael a wrug war-lergh pup-tra a worhemmynnis an ARLOEDH dhe Moyses; yndella y hwrussons.