Read Kernewek Niverow 10 Bible Online

Niverow 10 - Kernewek bible

Niverow 10

¹An ARLOEDH a leveris dhe Moyses:

²Gwra dew hirgorn yn arghans; yn ober mortholys ty a's gwra; ha ty a wra devnydh anedha rag gelwel an kuntelles, ha rag terri kamp.

³Ha pan vydh an dhew hwythys, oll an kuntelles a wra omguntell dhis dhe dharas tylda an kuntelles.

⁴Mes mar hwythons marnas onan, ena an hembrenkysi, pennow kordhow Ysrael, a wra omguntell dhis.

⁵Pan hwythydh gwarnyans, an kampow usi dhe denewen an howldrevel a wra mos yn-kerdh.

⁶Ha pan hwythydh gwarnyans dhe'n eyl prys, an kampow dhe'n tenewen dyghow a wra mos yn-kerdh. Gwarnyans a vydh hwythys pup-prys pan vydhons ow mos yn-kerdh.

⁷Mes pan vydh an gemmynieth dhe vos kuntellys war-barth, hwi a hwyth, mes ny hwythyowgh an gwarnyans.

⁸Ha mebyon Aron, an oferysi, a wra hwytha an hirgern. An hirgern a vydh dhywgh rag ordenans anhedhek der aga henedhow.

⁹Ha pan ewgh dhe vresel war agas tir erbynn an eskar a wra agas beghya, hwi a wra hwytha gwarnyans gans an hirgern, may fowgh kovhes a-rag an ARLOEDH agas Duw, hag yndellma hwi a vydh sawys a'gas eskerens.

¹⁰Yn dydh agas lowena ynwedh, hag yn agas goelyow ordenys, hag yn dalleth agas misyow, hwi a wra hwytha an hirgern war agas offrynnow dre dan ha war sakrifisow agas offrynnow kres; i a vydh dhywgh avel kovadh a-rag agas Duw: my yw an ARLOEDH agas Duw.

¹¹Y'n nessa blydhen, y'n nessa mis, yn ugensves dydh an mis, an gommolenn a veu kemmerys yn-bann a-ugh tabernakel an dustuni.

¹²Ha mebyon Ysrael eth yn yn-rag yn kerdhow berr yn-mes a wylvos Sinay; ha'n gommolenn a sevis stag yn gwylvos Paran.

¹³I eth yn-kerdh an kynsa prys orth gorhemmynna an ARLOEDH dre leuv Moyses.

¹⁴Baner kamp mebyon Yuda eth yn-kerdh yn kynsa herwydh aga luyow; ha war aga lu yth esa Nahshon mab Amminadab.

¹⁵Ha war lu an loeth a vebyon Yssakar yth esa Nethaneel mab Suar.

¹⁶Ha war lu an loeth a vebyon Zebulun yth esa Eliab mab Helon.

¹⁷Ha pan veu disevys an tabernakel, mebyon Gershon ha mebyon Merari, neb a dhegi an tabernakel, eth yn-kerdh.

¹⁸Ha baner kamp Rewben eth yn-kerdh herwydh aga luyow; ha war aga lu yth esa Elisur mab Shedeur.

¹⁹Ha war lu an loeth a vebyon Simeon yth esa Shelumiel mab Surishadday.

²⁰Ha war lu an loeth a vebyon Gad yth esa Eliasaf mab Deuel.

²¹Ena an Kohathysi eth yn-kerdh, ow toen an sentri, ha'n tabernakel a veu sevys kyns aga dos.

²²Ha baner kamp mebyon Efraym eth yn-kerdh herwydh aga luyow; ha war aga lu yth esa Elishama mab Ammihud.

²³Ha war lu an loeth a vebyon Manasse yth esa Gamaliel mab Pedahsur.

²⁴Ha war lu an loeth a vebyon Benyamin yth esa Abidan mab Gideoni.

²⁵Ena baner kamp mebyon Dan, avel gwithysi-dhelergh an kampow oll, eth yn-kerdh herwydh aga luyow; ha war aga lu yth esa Ahiezer mab Ammishadday.

²⁶Ha war lu an loeth a vebyon Asher yth esa Pagiel mab Okran.

²⁷Ha war lu an loeth a vebyon Naftali yth esa Ahira mab Enan.

²⁸Hemm o ordyr kerdh mebyon Ysrael herwydh aga luyow pan ethons yn-kerdh.

²⁹Ha Moyses a leveris dhe Hobab mab Reuel an Midyanyas, hwegron Moyses, ‘Yth eson ni ow mos yn-kerdh dhe dyller may leveris an ARLOEDH anodho, “My a wra y ri dhis”; deus genen, ha ni a wra dader dhis; rag an ARLOEDH re ambosas dader dhe Ysrael.’

³⁰Mes ev a leveris dhodho, ‘Ny vynnav mos; mes my a wra diberth dhe'm tir ow honan ha dhe'm neshevin.’

³¹Hag ev a leveris, ‘Na'gan gas, my a'th pys, rag ty a woer fatell wren kampya y'n gwylvos, ha ty a wra servya avel lagasow ragon.

³²Ha mars edh genen, py dader pynag a wrello an ARLOEDH gul dhyn, an keth dader a wren dhis.’

³³Ytho i eth yn-kerdh a venydh an ARLOEDH vyaj tri dydh; hag argh kevambos an ARLOEDH eth a-ragdha vyaj tri dydh, dhe hwilas powesva ragdha.

³⁴Hag yth esa kommolenn an ARLOEDH warnedha dydhweyth, peskweyth mayth ethons a'n kamp.

³⁵Ha peskweyth mayth e an argh yn-kerdh, Moyses a leveri, ‘Sav, A ARLOEDH, ha gas dha eskerens dhe vos skattrys; ha gas i a'th kas dhe fia a-dheragos.’

³⁶Ha pan bowesa hi, ev a leveri, ‘Dehwel, A ARLOEDH, dhe'n deg milyow a vilyow Ysrael.’