Read Kernewek Niverow 11 Bible Online

Niverow 11 - Kernewek bible

Niverow 11

¹Pan grodhvolas an bobel yn klewans an ARLOEDH a-dro dh'aga anfeus, an ARLOEDH a glewas; y sorr a veu enowys, ha tan an ARLOEDH a loskas yntredha, ha kowlleski nebes rannow pella a'n kamp.

²Ena an bobel a grias war Moyses; ha Moyses a bysis dhe'n ARLOEDH, ha'n tan a lehas.

³Ytho hanow an tyller ma a veu gelwys Tabera, drefenn tan an ARLOEDH dhe leski yntredha.

⁴Lemmyn an routh esa yn aga mysk a'n jevo ewl krev; ha mebyon Ysrael ynwedh a oelas arta, ow leverel, ‘Piw a re dhyn kig dhe dhybri?

⁵Yma kov dhyn a'n puskes a dhybryn yn Ejyp heb kost, an kukumbrow, an melonyow, an por, an onyon, ha'n kennin;

⁶mes lemmyn agan nerth yw desyghys ha nyns eus travyth marnas an manna ma dh'y weles.’

⁷Lemmyn an manna o avel has koriander, ha'y semlans avel bedellium.

⁸Ha'n bobel eth a-dro orth y guntell, ha'y velyas yn melinyow po y waska yn brewveyn ha'y vryjyon yn pottow, ha gul tesennow anodho; ha'n blas o haval dhe vlas tesennow pebys gans oyl.

⁹Pan goedha an gluth war an kamp dhe nos, an manna a goedha ganso.

¹⁰Moyses a glewas an bobel owth oela der aga theyluyow, pub gour orth daras y dylda; ha sorr an ARLOEDH a dhewi yn toemm, ha Moyses o drok-pes.

¹¹Moyses a leveris dhe'n ARLOEDH, ‘Prag y tebeldhyghtsys dha was? Ha prag na gevis gras y'th wolok, may korrydh begh an bobel oll ma warnav?

¹²A wrug vy omdhoen ha dineythi oll an bobel ma? may leverri dhymm, “Gwra aga doen y'th askra, dell dheg mager flogh-dena, dhe'n tir a desys y ri dh'aga thasow”?

¹³A-ble kavav kig dhe ri dhe'n bobel oll ma? Rag i a oel a-ragov ow leverel, “Ro dhyn kig, may typpryn.”

¹⁴Ny'm beus doen oll an bobel ma ow honan, rag an begh yw re boes dhymm.

¹⁵Mar mynnydh dyghtya genev yndellma, ladh vy distowgh, mar kevis gras y'th wolok, ma na welliv ow anfeus.’

¹⁶Ha'n ARLOEDH a leveris dhe Moyses, ‘Kuntell dhymm deg gour ha tri-ugens a henavogyon Ysrael, hag a wodhes bos henavogyon an bobel ha soedhogyon a-ughta; ha doro i dhe dylda an kuntelles, ha'ga gasa dhe sevel ena genes.

¹⁷Ha my a dhiyskynn ha kewsel genes ena; ha my a gemmer nebes a'n spyrys eus warnas ha'y worra warnedha; hag i a dheg begh an bobel genes, ma na'n godheffi dha honan.

¹⁸Ha lavar dhe'n bobel, Omsakrewgh erbynn a-vorow, ha hwi a dheber kig; rag hwi re oelas yn klewans an ARLOEDH, ow leverel, “Piw a re dhyn kig dhe dhybri? Rag yth o da genen yn Ejyp.” Rakhenna an ARLOEDH a vynn ri dhywgh kig, ha hwi a wra dybri.

¹⁹Ny dhebrowgh unn jydh, po dew dhydh, po pymp dydh, po deg dydh, po ugens dydh,

²⁰mes mis kowal, bys pan dheu yn-mes a'gas frigow hag a dheu ha bos kasadow dhywgh, rag hwi dhe nagha an ARLOEDH usi yn agas mysk, hag oela a-ragdho, ow leverel, “Prag y teuthen yn-mes a Ejyp?” ’

²¹Mes Moyses a leveris, ‘An bobel le mayth esov yn aga mysk yw hwegh kans mil aga niver war droes; ha ty re leveris, “My a re dhedha kig may tepprons mis kowal.”

²²A vydh flokkys ha greow ledhys, dhe vos lowr dhedha? Po a vydh oll puskes an mor bos kuntellys war-barth dhedha, dhe vos lowr dhedha?’

²³Ha'n ARLOEDH a leveris dhe Moyses, ‘Yw dorn an ARLOEDH re verr? Lemmyn ty a welvydh mar teu ow ger dhe wiryonedh ragos po na.’

²⁴Ytho Moyses eth yn-mes ha leverel dhe'n bobel geryow an ARLOEDH; hag ev a guntellas deg gour ha tri-ugens a henavogyon an bobel, ha'ga gorra a-dro dhe'n tylda.

²⁵Ena an ARLOEDH a dhiyskynnas y'n gommolenn ha kewsel orto, ha kemmeres neppyth a'n spyrys esa warnodho ha'y worra war an deg henavek ha tri-ugens; ha pan bowesas an spyrys warnedha, i a brofoesas. Mes ny wrussons yndellma namoy.

²⁶Lemmyn dew wour a veu gesys y'n kamp; hanow an eyl o Eldad ha hanow y gila o Medad, ha'n spyrys a bowesas warnedha. Yth ens i yn mysk an re a via kovskrifys, mes nyns ethons yn-mes dhe'n tylda; ytho i a brofoesas y'n kamp.

²⁷Ha maw a boenyas ha leverel dhe Moyses, ‘Yma Eldad ha Medad ow profoesa y'n kamp.’

²⁸Ha Yoshua mab Nun, menyster Moyses, onan a'y wer dhewisys, a leveris, ‘Ow arloedh Moyses, gwra aga difenn.’

²⁹Mes Moyses a leveris dhodho, ‘A berthydh avi a'm govis vy? A pe pobel oll an ARLOEDH profoesa, may hworro an ARLOEDH y spyrys warnedha!’

³⁰Ha Moyses a dhehwelis dhe'n kamp, ev ha'n henavogyon.

³¹Hag yth eth yn-rag gwyns a-dhiworth an ARLOEDH, hag y tros rynki a-dhiworth an mor, ha'ga gasa dhe goedha ryb an kamp, a-dro dhe vyaj unn jydh a'n tenewen ma ha vyaj unn jydh a'n tenewen arall,[5] hag a-dro dhe dhew gevelin a-ugh enep an dor.

³²Ha'n bobel a sevis oll an jydh na, hag oll an nos, hag oll an jydh a-wosa, ha kuntell an rynki; neb re guntellas an lyha a guntellas deg homer; hag i a's lesas dh'aga honan oll a-dro dhe'n kamp.

³³Ha'n kig hwath ynter aga dyns, kyns y vos dybrys, sorr an ARLOEDH a veu enowys, ha'n ARLOEDH a weskis an bobel gans pla meur.

³⁴Yndellma hanow an tyller na a veu gelwys Kibroth-hattaava, drefenn i dhe ynkleudhyas ena an dus a's teva an ewl.

³⁵A Kibroth-hattaava an bobel a vyajyas dhe Haseroth; hag i a wortas yn Haseroth.