Read Kernewek Niverow 12 Bible Online

Niverow 12 - Kernewek bible

Niverow 12

¹Miryam hag Aron a gewsis erbynn Moyses drefenn an Gushyades re dhemmedhsa, rag ev dhe dhemmedhi Kushyades;

²hag i a leveris, ‘A ny gewsis an ARLOEDH yn hwir marnas dre Moyses? A ny gewsis dredhon ni ynwedh?’ Ha'n ARLOEDH a'n klewas.

³Lemmyn an gour Moyses o pur glor, moy ages pub den oll war enep an nor.

⁴Ha distowgh an ARLOEDH a leveris dhe Moyses ha dhe Aron ha dhe Miryam, ‘Dewgh yn-mes, agas tri dhe dylda an kuntelles.’ Ha'ga thri a dheuth yn-mes.

⁵Ha'n ARLOEDH a dhiyskynnas yn koloven kommol, ha sevel orth daras an tylda, ha gelwel Aron ha Miryam; hag i a dheuth yn-rag aga dew.

⁶Hag ev a leveris, ‘Klewewgh ow geryow: Mars eus profoes yntredhowgh, my an ARLOEDH a vydh aswonnys dhodho yn gwelesigeth, my a gews orto yn hunros.

⁷Nansi gans ow gwas Moyses; ev yw len yn oll ow chi.

⁸Ganso my a gews ganow orth ganow, yn tiblans, a-der yn kowsow tewl; hag ev a wel furv an ARLOEDH. Prag ytho na vewgh ownek dhe gewsel erbynn ow gwas Moyses?’

⁹Ha sorr an ARLOEDH a veu enowys er aga fynn, hag ev eth dhe-ves.

¹⁰Pan omdennas an gommolenn a-dhiwar an tylda, otta, Miryam o lovrek, mar wynn avel an ergh. Hag Aron a dreylyas tu ha Miryam, hag otta, hi o lovrek.

¹¹Hag Aron a leveris dhe Moyses, ‘Ogh, ow arloedh, na wra agan kessydhya drefenn ni dhe wul yn foll ha pegha.

¹²Na as hi dhe vos avel neppyth genys marow, hag anodho an kig hanter dybrys pan dheu yn-mes a dorr y vamm.’

¹³Ha Moyses a grias war an ARLOEDH, ‘Gwra hy sawya, a Dhuw, my a'th pys.’

¹⁴Mes an ARLOEDH a leveris dhe Moyses, ‘Mar trewsa hy thas yn hy fas, a ny vedha meth dhedhi seyth dydh? Gas hi dhe vos eskeys yn-mes a'n kamp seyth dydh, ha wosa henna hi a yll bos dres arta a-ji.’

¹⁵Ytho Miryam a veu keys yn-mes a'n kamp seyth dydh; ha ny dhallathas an bobel war an kerdh bys pan veu Miryam dres arta a-ji.

¹⁶Wosa henna an bobel eth yn-kerdh a Haseroth, ha kampya yn gwylvos Paran.