Read Kernewek Niverow 13 Bible Online

Niverow 13 - Kernewek bible

Niverow 13

¹An ARLOEDH a leveris dhe Moyses,

²‘Dannvon gwer dhe aspia pow Kanan, hag a rov dhe vebyon Ysrael; a bub loeth a'ga thasow ty a dhannvon gour, pubonan hembrenkyas yntredha.’

³Ytho Moyses a's dannvonas a-dhiworth gwylvos Paran, war-lergh gorhemmynna an ARLOEDH, i oll gwer neb o pennow mebyon Ysrael.

⁴Ha'n re ma o aga henwyn: a-dhiworth loeth Rewben, Shammua mab Zakkur;

⁵a-dhiworth loeth Simeon, Shafat mab Hori;

⁶a-dhiworth loeth Yuda, Kaleb mab Yefunne;

⁷a-dhiworth loeth Yssakar, Ygal mab Yosep;

⁸a-dhiworth loeth Efraym, Hoshea mab Nun;

⁹a-dhiworth loeth Benyamin, Palti mab Rafu;

¹⁰a-dhiworth loeth Zebulun, Gaddiel mab Sodi;

¹¹a-dhiworth loeth Yosep (henn yw a-dhiworth loeth Manasse), Gaddi mab Susi;

¹²a-dhiworth loeth Dan, Ammiel mab Gemalli;

¹³a-dhiworth loeth Asher, Sethur mab Mighal;

¹⁴a-dhiworth loeth Naftali, Nahbi mab Vofsi;

¹⁵a-dhiworth loeth Gad, Geuel mab Maki.

¹⁶An re ma o henwyn an wer a dhannvonas Moyses dhe aspia an tir. Ha Moyses a ros dhe Hoshea mab Nun an hanow Yoshua.

¹⁷Moyses a's dannvonas dhe aspia pow Kanan, ha leverel dhedha, ‘Kewgh yn-hons y'n Negeb, hag yskynna y'n vro venydhyek,

¹⁸ha mirewgh fatell yw an tir, ha mars yw an bobel trigys ena krev po gwann, mars yns boghes po lies,

¹⁹ha mars yw an tir mayth esons trigys da po drog, ha mars yw an sitys mayth esons trigys kampow po dinasow,

²⁰ha mars yw an tir rych po difeyth, ha mars eus prenn ynno po mar nyns eus. Bedhewgh a golonn dha, ha drewgh neppyth a frut an tir.’ Nena an termyn o seson an kynsa gwinreun adhves.

²¹Ytho i a yskynnas hag aspia an tir a wylvos Sin[6] dhe Rehob, troha Lebo-hamath.

²²I a yskynnas dhe'n Negeb, ha dos dhe Hebron; hag yth esa ena Ahiman, Sheshay, ha Talmay, diyskynnysi Anak. (Hebron a veu drehevys seyth blydhen kyns es Soan yn Ejyp.)

²³Hag i a dheuth dhe nans Eshkol, ha treghi alena skorrenn gans unn bagas a rappys, hag i a's dug war welenn yntra dew anedha; i a dhros ynwedh greunavalow ha figys.

²⁴An tyller na a veu gelwys nans Eshkol, drefenn an bagas a rappys a droghas mebyon Ysrael alena.

²⁵Dhe benn dew-ugens dydh i a dhehwelis a aspia an tir.

²⁶Hag i a dheuth dhe Moyses hag Aron ha dhe'n kuntelles oll a vebyon Ysrael bys yn gwylvos Paran, dhe Kadesh; i a dhros ger dhedha ha dhe'n kuntelles oll, ha diskwedhes dhedha frut an tir.

²⁷Hag i a leveris dhodho, ‘Ni a dheuth dhe'n tir le ma'gan dannvensys; devri, ev a dhinwa leth ha mel, ha hemm yw y frut.

²⁸Mes an bobel trigys y'n tir yw krev, ha'n sitys yw kerys ha pur vras; ha dres henna, ni a welas diyskynnysi Anak ena.

²⁹Yma an Amalekysi trigys yn tir an Negeb; hag yma an Hittysi, an Yebusysi, ha'n Amorysi trigys y'n vro venydhyek; hag yma an Kananysi trigys ryb an mor, ha war lann an Yordan.’

³⁰Mes Kaleb a goselhas an bobel a-rag Moyses, ha leverel, ‘Gwren mos yn-bann distowgh, ha'y gevannedhi; rag pur abel on dh'y fetha.’

³¹Ena an wer re wrussa mos yn-bann ganso a leveris, ‘Ny yllyn mos yn-bann erbynn an bobel; rag kreffa yns ageson.’

³²Ytho i a dhros dhe vebyon Ysrael drog dherivas a'n tir re aspisens, ow leverel, ‘An tir, dredho mayth ethen dh'y aspia, yw tir a dhevor y drigoryon; hag oll an bobel a welsyn yw gwer meur aga ughelder.

³³Hag ena ni a welas an Nefilim (mebyon Anak a dheuth dhiworth an Nefilim), hag yth en ni yn agan dewlagas agan honan kepar ha kulyeges-reden, hag yndellma o agan semlans dhedha i.’