Read Kernewek Niverow 14 Bible Online

Niverow 14 - Kernewek bible

Niverow 14

¹Ena oll an kuntelles a dhrehevis kri ughel; ha'n bobel a oelas an nos na.

²Ha mebyon Ysrael oll a grodhvolas war Moyses hag Aron; oll an kuntelles a leveris dhedha, ‘A marwen yn pow Ejyp! Po a marwen y'n gwylvos ma!

³Prag y hwra an ARLOEDH agan dri y'n tir ma, dhe goedha der an kledha? Agan gwragedh ha'gan re vyghan a vydh preydh; a ny via gwell dehweles dhe Ejyp?’

⁴Hag i a leveris an eyl dh'y gila. ‘Gwren dewis penn ha dehweles dhe Ejyp.’

⁵Ena Moyses hag Aron a goedhas war aga fas a-rag an gemmynieth oll a guntelles mebyon Ysrael.

⁶Ha Yoshua mab Nun ha Kaleb mab Yefunne, esa yn mysk an re a aspias an tir, a skwardyas aga dillas,

⁷ha leverel dhe'n kuntelles oll a vebyon Ysrael, ‘An tir a dremensyn dredho dh'y aspia, yw tir da dres eghenn.

⁸Mars yw an ARLOEDH pes da genen, ev a'gan dre dhe'n tir ma ha'y ri dhyn, tir a dhinwa leth ha mel.

⁹Mes, na sevewgh erbynn an ARLOEDH; ha na berthewgh own a bobel an tir, rag bara yns i ragon; aga skoes yw kemmerys a-dhiworta, hag yma an ARLOEDH genen; na berthewgh own anedha.’

¹⁰Mes oll an kuntelles a vynnas aga labydha gans meyn. Ena golewder an ARLOEDH a omdhiskwedhas yn tylda an kuntelles a-rag mebyon Ysrael oll.

¹¹Ha'n ARLOEDH a leveris dhe Moyses, ‘Pes termyn y hwra an bobel ma ow disenora? Ha pes termyn ny wrons krysi ynnov, yn spit dhe'n arwoedhyow oll a wrug yn aga mysk?

¹²My a's gwysk gans an pla ha'ga diserita, ha my a wra ahanowgh gwlaskor brassa ha galloesekka agessa.’

¹³Mes Moyses a leveris dhe'n ARLOEDH, ‘Ena an Ejyptianys a wra klewes anodho, rag gans dha nerth ty a dhros an bobel ma yn-bann yn-mes anedha,

¹⁴hag i a lever hemma dhe drigoryon an tir ma. I re glewas ty dhe vos, A ARLOEDH, yn mysk an bobel ma; rag ty, A ARLOEDH, yw gwelys fas orth fas, ha dha gommolenn a sev a-ughta ha ty a a-dheragdha, yn koloven kommol dydhweyth hag yn koloven tan nosweyth.

¹⁵Lemmyn mar ledhydh an bobel ma avel unn den, ena an kenedhlow re glewas hemma, a lever,

¹⁶“Drefenn na allas an ARLOEDH dri an bobel bys y'n tir a dos y ri dhedha, yndella ev re's ladhas y'n gwylvos.”

¹⁷Ytho lemmyn, my a'th pys, gas nerth an Arloedh dhe vos meur, par dell ambossys, ow leverel,

¹⁸“An ARLOEDH yw lent ow serri, lenwys a dregeredh, ow kava kammweyth ha peghadow, mes ny vynn war neb kor klerhe an re gablus, ow kessydhya kammhynseth tasow war fleghes, war an tressa ha'n peswora henedh.”

¹⁹Gav kammhynseth an bobel ma, my a'th pys, war-lergh dha dregeredh meur, kepar dell evsys an bobel ma, a-dhia asa Ejyp bys omma.’

²⁰Ena an ARLOEDH a leveris, ‘My re avas, war-lergh dha er;

²¹mes yn hwir, dell vewav, ha dell vydh oll an nor lenwys gans golewder an ARLOEDH,

²²nagonan re welas ow golewder ha'm arwoedhyow hag a wrug vy yn Ejyp hag y'n gwylvos, ha hwath a'm gorras dhe'n prov an deg treveth ma ha ny glewas ow lev,

²³a wra gweles an tir hag a des y ri dh'aga thasow; ha nagonan a'n re a'm dispresyas a wra y weles.

²⁴Mes ow gwas Kaleb, drefenn bos dhodho spyrys dihaval ha'm siwya yn leun, my a wra dri y'n tir mayth eth, ha'y dhiyskynnysi a'n pewvydh.

²⁵Lemmyn, a-ban drig an Amalekysi ha'n Kananysi y'n nansow, treyl a-vorow ha mos yn-kerdh dhe'n gwylvos dre fordh an Mor Rudh.’

²⁶Ha'n ARLOEDH a gewsis dhe Moyses ha dhe Aron, ow leverel:

²⁷Pes termyn y hwra an tebel guntelles ma krodhvolas warnav? My re glewas krodhvolyow mebyon Ysrael, hag a grodhvolsons warnav.

²⁸Lavar dhedha, ‘Dell vewav’, yn-medh an ARLOEDH, ‘an pyth re leversowgh y'm klewans my a'n gwra dhywgh:

²⁹agas korfow marow a wra koedha y'n gwylvos ma; hag a'gas niver oll, niverys a-dhia ugens bloedh ha moy, re grodhvolas warnav,

³⁰nagonan a wra dos y'n tir le may tes vy agas gorra dhe driga, marnas Kaleb mab Yefunne ha Yoshua mab Nun.

³¹Mes agas re vyghan, a leversowgh a wre ha dos preydh, my a's dre a-ji, hag i a wra aswonn an tir re dhispresowgh.

³²Mes hwi, agas korfow marow a wra koedha y'n gwylvos ma.

³³Ha'gas fleghes a vydh bugeledh y'n gwylvos dew-ugens blydhen, hag a wra godhevel rag agas dislender bys pan wra an diwettha a'gas korfow marow growedha y'n gwylvos.

³⁴War-lergh niver an dydhyow mayth aspisowgh an tir, dew-ugens dydh, rag pub dydh unn vlydhen, hwi a dheg agas kammweyth, dew-ugens blydhen, ha hwi a wra aswonn ow displesour.’

³⁵My, an ARLOEDH, re gewsis; yn sur hemma a wrav dhe oll an tebel guntelles ma yw kuntellys er ow fynn: y'n gwylvos ma i a dheu dhe leun worfenn, hag ena i a verow.

³⁶Ha'n wer hag a wrug Moyses aga dannvon dhe aspia an tir, hag a dhehwelis ha gul dhe'n kuntelles oll krodhvolas warnodho, ow tri tebel dherivas erbynn an tir,

³⁷an wer neb a dhros tebel dherivas a'n tir, a verwis der an pla a-rag an ARLOEDH.

³⁸Mes Yoshua mab Nun ha Kaleb mab Yefunne a besyas bos yn few, a'n wer neb eth dhe aspia an tir.

³⁹Ha Moyses a leveris an geryow ma dhe vebyon Ysrael oll, ha'n bobel a gynis meur.

⁴⁰Hag i a sevis myttin a-varr, ha mos dhe benn an vro venydhyek, ow leverel, ‘Ottani, ni a wra mos yn-bann dhe'n tyller re ambosas an ARLOEDH: rag ni re beghas.’

⁴¹Mes Moyses a leveris, ‘Prag yth esowgh ow kammdremena erbynn arghadow an ARLOEDH? rag ny wra henna siweni.

⁴²Na yskynnewgh, rag nyns usi an ARLOEDH yn agas mysk, ma na vowgh gweskys a-rag agas eskerens,

⁴³Rag yma an Amalekysi ha'n Kananysi ena a-ragowgh, ha hwi a wra koedha der an kledha; drefenn hwi dhe dreylya a-dhiworth an ARLOEDH, ny vydh an ARLOEDH genowgh.’

⁴⁴Mes i a vedhas yskynna bys yn penn an vro venydhyek, kyn na dhibarthas na argh kevambos an ARLOEDH na Moyses yn-mes a'n kamp.

⁴⁵Ena an Amalekysi ha'n Kananysi esa trigys y'n vro venydhyek na a dhiyskynnas, ha'ga fetha ha'ga skattra, bys yn Horma.