Read Kernewek Niverow 17 Bible Online

Niverow 17 - Kernewek bible

Niverow 17

¹An ARLOEDH a leveris dhe Moyses:

²Kows orth mebyon Ysrael, ha kavoes anedha gwelynni, onan rag chi pub tas, a'ga hembrenkysi oll war-lergh chiow aga thasow, dewdhek gwelenn. Skrif hanow pub gour war y welenn,

³ha skrif hanow Aron war welenn Levi. Rag y fydh unn welenn rag penn chi pub tas.

⁴Ena ty a's gorr yn tylda an kuntelles a-rag an dustuni, le may fetyav genes.

⁵Ha gwelenn an gour a dhewisav a wra egina; yndellma my a wra dhe hedhi a-dhiwarnav krodhvolyow mebyon Ysrael may krodhvolons warnas.

⁶Moyses a gewsis orth mebyon Ysrael; ha pubonan a'n hembrenkysi a ros gwelenn dhodho, unn welenn rag pub hembrenkyas, war-lergh chi aga thasow: dewdhek gwelenn; hag yth esa gwelenn Aron yn mysk aga gwelynni.

⁷Ha Moyses a worras an gwelynni a-rag an ARLOEDH yn tylda an dustuni.

⁸Ha'n vorow Moyses eth a-berth yn tylda an dustuni; hag otta, gwelenn Aron rag chi Levi re eginsa ha dyllo eginyow, ha dri bleujennow yn-mes; ha hi a dhug alamandow adhves.

⁹Ena Moyses a dhros oll an gwelynni a-dhiworth lok an ARLOEDH dhe vebyon Ysrael oll, ha pub gour a viras ha kemmeres y welenn.

¹⁰Ha'n ARLOEDH a leveris dhe Moyses, ‘Daskorr gwelenn Aron a-rag an dustuni, dhe vos gwithys avel arwoedh rag an vebyon a dhiwostytter, may hwrylli diwedh a'ga krodhvolyow warnav, ma na varwons.’

¹¹Moyses a wrug kepar dell worhemmynnsa an ARLOEDH dhodho; yndella ev a wrug.

¹²Ha mebyon Ysrael a leveris dhe Moyses, ‘Otta, ni a verow, diswrys on, diswrys on ni oll.

¹³Pubonan ow tos nes, neb a dheu nes dhe dabernakel an ARLOEDH, a verow. A wren ni oll mos dhe goll?’