Read Kernewek Niverow 18 Bible Online

Niverow 18 - Kernewek bible

Niverow 18

¹Ytho an ARLOEDH a leveris dhe Aron: Ty ha'th vebyon ha chi dha das genes a wra doen kammweyth an sentri; ha ty ha'th vebyon genes a wra doen kammweyth agas oferyaseth.

²Ha genes doro dha vreder ynwedh, loeth Levi, loeth dha das, may hallons junya genes, ha menystra dhis pan vydhydh ty, ha'th vebyon genes, a-rag tylda an dustuni.

³I a wra dha attendya ha gwitha deverow oll an tylda; mes ny wrons dos nes dhe lestri an sentri po dhe'n alter, ma na wrellons i, na hwi, merwel.

⁴I a wra junya genes, hag attendya tylda an kuntelles, rag servis oll an tylda; ha ny wra dos ogas dhywgh estren.

⁵Ha hwi a with deverow an sentri ha deverow an alter, ma na vo sorr na fella war vebyon Ysrael.

⁶Hag otta, my re gemmeras agas breder an Levysi yn-mes a vebyon Ysrael; i yw ro dhis, res dhe'n ARLOEDH, dhe wul servis tylda an kuntelles.

⁷Ha ty ha'th vebyon genes a wra attendya agas oferyaseth rag pup-tra ow tochya an alter hag a-ji dhe'n groglenn;[8] ha hwi a wra servya. My a re agas oferyaseth yn ro; ha'n estren a dheu ogas a vydh gorrys dhe'n mernans.

⁸Ena an ARLOEDH a leveris dhe Aron: Otta, my re ros dhis charj a'n offrynnow drehevys dhymm, oll an taklow sakrys a vebyon Ysrael; my re's ros dhis avel rann, ha dhe'th vebyon avel ordenans heb diwedh.

⁹Hemma a vydh dhis a'n taklow an moyha sans, gwithys a'n tan: pub offrynn anedha — pub offrynn greun anedha, ha pub offrynn pegh anedha ha pub offrynn kammweyth anedha, hag a rons dhymm — a vydh an moyha sans dhis ha dhe'th vebyon.

¹⁰Yn tyller an moyha sans ty a'n deber; pub gorreydh a yll y dhybri; y fydh sans dhis.

¹¹Hemm yw dhis ynwedh, offrynn drehevys a'ga ro, oll an offrynnow gwevys a vebyon Ysrael; my re's ros dhis, ha dhe'th vebyon ha dhe'th vyrghes genes, avel ordenans heb diwedh; pub huni yw glan y'th chi a yll dybri anodho.

¹²Oll an gwella a'n oyl, hag oll an gwella a'n gwin hag a'n greun, kynsa frut a'n pyth a rons dhe'n ARLOEDH, my a re dhis.

¹³Kynsa frut adhves a oll eus yn aga thir, hag a dhrons dhe'n ARLOEDH, a vydh dhis; pub huni yw glan y'th chi a yll dybri anodho.

¹⁴Pup-tra sakrys yn Ysrael a vydh dhis.

¹⁵Pup-tra a iger an dorr a bub kig, po den po best, a offrynnons dhe'n ARLOEDH, a vydh dhis; byttegyns kynsa-genys mab-den ty a dhaspren, ha'n kynsa-genys a vestes avlan ty a dhaspren.

¹⁶Ha pris aga daspren (orth unn mis ty a's daspren) ty a sett orth pymp shekel yn arghans, war-lergh shekel an sentri hag yw ugens gera.

¹⁷Mes kynsa-genys ojyon, po kynsa-genys davas, po kynsa-genys gaver, ny dhasprenydh; sans yns. Ty a skoell aga goes war an alter, ha leski aga blonek avel offrynn dre dan, sawer plegadow dhe'n ARLOEDH;

¹⁸mes aga hig a vydh dhis; kepar dell yw dhis an vronn yw gwevys ha'n vordhos dhyghow.

¹⁹Oll an offrynnow drehevys a'n taklow sans a brof mebyon Ysrael dhe'n ARLOEDH my a re dhis, ha dhe'th vebyon ha dhe'th vyrghes genes, avel ordenans heb diwedh; yth yw kevambos a hoelan bys vykken a-rag an ARLOEDH ragos ha rag dha agh genes.

²⁰Ha'n ARLOEDH a leveris dhe Aron: Ny' fydh eretons yn aga thir, na ny' fydh rann vyth yntredha; my yw dha rann ha'th eretons yn mysk mebyon Ysrael.

²¹Dhe'n Levysi my re ros pub dega yn Ysrael rag eretons, yn attal a'ga servis a wrons, aga servis yn tylda an kuntelles.

²²Hag alemma rag ny dheu mebyon Ysrael ogas dhe dylda an kuntelles, ken i a dheg pegh ha merwel.

²³Mes an Levysi a wra servis tylda an kuntelles, hag i a wra doen aga hammweyth; y fydh ordenans heb diwedh der agas henedhow; hag yn mysk mebyon Ysrael ny's tevydh eretons.

²⁴Rag dega mebyon Ysrael, hag a dhrons avel offrynn drehevys dhe'n ARLOEDH, my re ros dhe'n Levysi avel eretons; ytho my re leveris dhedha na's tevydh eretons yn mysk mebyon Ysrael.

²⁵Ha'n ARLOEDH a leveris dhe Moyses:

²⁶Keffrys, ty a lever dhe'n Levysi: Pan gemmerowgh a-dhiworth mebyon Ysrael an dega re res dhywgh dhiworta rag agas eretons, ena hwi a wra offrynna offrynn drehevys anodho dhe'n ARLOEDH, dega a'n dega.

²⁷Ha'gas offrynn drehevys a vydh reknys dhywgh kepar dell ve greun an leur-drushya, hag avel leunder an winwask.

²⁸Yndellma hwi ynwedh a re offrynn drehevys dhe'n ARLOEDH a'gas degedhow oll, hag a dhegemmerowgh a-dhiworth mebyon Ysrael; hag anodho ty a re offrynn drehevys an ARLOEDH dhe Aron an oferyas.

²⁹Yn-mes a'n rohow oll dhywgh, hwi a wra profya pub offrynn drehevys rag an ARLOEDH, a oll an gwella anedha, ow ri an rann sanshes anedha.

³⁰Yndella ty a lever dhedha: Pan dhrehevowgh a-dhiworto an gwella anodho, an remenant a vydh reknys dhe'n Levysi avel askorr an leur-drushya, hag avel askorr an winwask;

³¹ha hwi a yll y dhybri yn pub tyller pynag, hwi ha'gas tiogethyow; rag yth yw agas gober rag agas servis yn tylda an kuntelles.

³²Ha ny dhegowgh pegh dre hemma, pan dhrehevowgh an gwella anodho. Mes ny dhisakrowgh taklow sans mebyon Ysrael, ma na verwowgh.