Read Kernewek Niverow 19 Bible Online

Niverow 19 - Kernewek bible

Niverow 19

¹Lemmyn an ARLOEDH a leveris dhe Moyses hag Aron:

²Hemm yw ordenans an lagha re worhemmynnis an ARLOEDH: Kows dhe vebyon Ysrael may trollons dhywgh lejek rudh heb difyk na namm, ha warnedhi na dheuth bythkweth yew.

³Ha hwi a's re dhe Eleazar an oferyas, hag ev a's kemmer yn-mes a'n kamp ha hi a vydh ledhys a-ragdho;

⁴hag Eleazar an oferyas a wra kemmeres nebes a'y goes gans y vys, ha skoellya neppyth a'y goes war du a-rag tylda an kuntelles seythgweyth.

⁵Ha'n lejek a vydh leskys yn y wolok; hy kroghen, hy hig, ha'y goes, gans hy theyl, a vydh leskys;

⁶ha'n oferyas a wra kemmeres prenn keder ha hyssop ha pann kogh, ha'ga thewlel yn mysk losk an lejek.

⁷Ena an oferyas a wra golghi y dhillas ha badhya y gorf yn dowr, hag a-wosa ev a yll dos y'n kamp; ha'n oferyas a vydh avlan bys y'n gorthugher.

⁸Ev neb a lesk an lejek a wra golghi y dhillas yn dowr, ha badhya y gorf yn dowr, hag a vydh avlan bys y'n gorthugher.

⁹Ha gour neb yw glan a wra kuntell lusu an lejek, ha'ga gorra yn-mes a'n kamp yn tyller glan; hag i a vydh gwithys rag kuntelles mebyon Ysrael rag an dowr a lanheans, rag dileans pegh.

¹⁰Hag ev neb a guntell lusu an lejek a wra golghi y dhillas, ha bos avlan bys an gorthugher. Ha hemma a vydh dhe vebyon Ysrael, ha dhe'n alyon usi trigys yntredha, ordenans heb diwedh.

¹¹Ev neb a doch an korf marow a dhen pynag a vydh avlan seyth dydh;

¹²ev a wra omlanhe gans an dowr y'n tressa dydh hag y'n seythves dydh, hag yndellma bos glan; mes mar ny omlanha y'n tressa dydh hag y'n seythves dydh, ny dheu ha bos glan.

¹³Piwpynag a doch den marow, korf den pynag re verwis, ha ny omlanha, a dhefol tabernakel an ARLOEDH, ha'n den na a vydh treghys a-dhiworth Ysrael; drefenn na veu skoellys warnodho an dowr a lanheans, ev a vydh avlan; yma y avlander hwath warnodho.

¹⁴Homm yw an lagha pan verow den yn tylda; pub huni a dheu y'n tylda ha pub huni usi y'n tylda, a vydh avlan seyth dydh.

¹⁵Ha pub lester igor, na'n jeves gorher kelmys warnodho, yw avlan.

¹⁶Piwpynag y'n gwel igor a doch nebonan yw ledhys gans kledha, po korf marow, po askorn den, po bedh, a vydh avlan seyth dydh.

¹⁷Rag an den avlan i a gemmer neppyth a lusu losk an offrynn pegh ha dowr ow resek a vydh keworrys yn lester;

¹⁸ena gour glan a wra kemmeres hyssop, ha'y dhroghya y'n dowr, ha'y skoellya war an tylda, ha war oll an daffar ha war an dus esa ena, ha warnodho neb a davas an askorn, po an den ledhys, po an den marow, po an bedh;

¹⁹ha'n den glan a wra skoellya war an den avlan y'n tressa dydh hag y'n seythves dydh; yndellma y'n seythves dydh ev a'n glanha, hag ev a wra golghi y dhillas hag omvadhya yn dowr, ha dhe'n gorthugher ev a vydh glan.

²⁰Mes an den yw avlan ha ny omlanha, an enev na a vydh treghys a-dhiworth an gemmynieth, drefenn ev dhe dhefola sentri an ARLOEDH; drefenn na veu skoellys warnodho an dowr a lanheans, ev yw avlan.

²¹Hag y fydh ordenans heb diwedh ragdha. Ev neb a skoell an dowr a lanheans a wra golghi y dhillas; hag ev neb a doch an dowr a lanheans a vydh avlan bys an gorthugher.

²²Ha pypynag a wra an den avlan y dava a vydh avlan; ha piwpynag a'n tav a vydh avlan bys an gorthugher.