Read Kernewek Niverow 21 Bible Online

Niverow 21 - Kernewek bible

Niverow 21

¹Pan glewas an Kananyas, myghtern Arad, esa trigys y'n Negeb, bos Ysrael ow tos dre fordh Atharim, ev a vatalyas orth Ysrael ha kemmeres re anedha yn kethneth.

²Hag Ysrael a wrug ambos dhe'n ARLOEDH, ow leverel, ‘Mar mynnydh yn hwir ri an bobel ma y'm dorn, ena my a wra sakra aga sitys dhe dhistruyans.’

³Ha'n ARLOEDH a glewas lev Ysrael, hag a ros an Kananysi yn y dhorn;[9] hag i a's sakras dhe dhistruyans, ha'ga sitys; ytho hanow an tyller a veu gelwys Horma.

⁴A-dhiworth menydh Hor i eth yn-kerdh der an fordh dhe'n Mor Rudh dhe vos a-dro dhe bow Edom; ha'n bobel a dheuth ha bos digolonnek war an fordh.

⁵Ha'n bobel a gewsis erbynn Duw hag erbynn Moyses, ‘Prag y'gan dresys yn-mes a Ejyp dhe verwel y'n gwylvos? Rag nyns eus boes na dowr, ha kas yw genen an boes diles ma.’

⁶Ena an ARLOEDH a dhannvonas serf tanek yn mysk an bobel, hag i a vrathas an bobel, may ferwis lies den a Ysrael.

⁷Ha'n bobel a dheuth dhe Moyses, ha leverel, ‘Ni re beghas, rag ni a gewsis erbynn an ARLOEDH hag er dha bynn; gwra pysi dhe'n ARLOEDH, may kemmerro an serf dhe-ves ahanan.’ Ytho Moyses a bysis rag an bobel.

⁸Ha'n ARLOEDH a leveris dhe Moyses, ‘Gwra ragos sarf danek, ha'y gorra war beul; ha peub re beu brethys, pan y's gwel, a wra bewa.’

⁹Ytho Moyses a wrug sarf a vrons, ha'y gorra war beul; ha mar prattha sarf den vytholl, ev a virsa orth an sarf vrons ha bewa.

¹⁰Ha mebyon Ysrael eth yn-kerdh, ha kampya yn Oboth.

¹¹Hag i eth yn-kerdh a-dhiworth Oboth, ha kampya yn Iye-abarim, y'n gwylvos usi a-dal Moab, war-tu ha'n howldrevel.

¹²Alena i eth yn-kerdh, ha kampya yn nans Zered.

¹³Alena i eth yn-kerdh, ha kampya a'n tu arall dhe Arnon, usi y'n gwylvos a ystynn a-dhiworth or an Amorysi; rag Arnon yw or Moab, yntra Moab ha'n Amorysi.

¹⁴Rakhenna yth yw leverys yn Lyver Breselyow an ARLOEDH, ‘Waheb yn Sufa ha'n nansow a Arnon

¹⁵ha ledrow an nansow a ystynn dhe drigva Ar, hag a boes trohag or Moab.’

¹⁶Hag alena i a besyas mos bys yn Beer; henn yw an puth a gewsis anodho an ARLOEDH dhe Moyses, ‘Kuntell an bobel war-barth, ha my a re dhedha dowr.’

¹⁷Ena Ysrael a ganas an gan ma: ‘Sav, a buth! Kenewgh dhodho!

¹⁸An bennsevigyon a balas an puth, gwelhevin an bobel a'n kleudhyas gans an dernwelenn, gans aga gwelynni.’ Ha dhiworth an gwylvos i eth dhe Mattana,

¹⁹hag a-dhiworth Mattana dhe Nahaliel, hag a-dhiworth Nahaliel dhe Bamoth,

²⁰hag a-dhiworth Bamoth dhe'n nans yn gwel Moab ryb penn Pisga hag a vir war-woeles war an gwylvos.[10]

²¹Ena Ysrael a dhannvonas kannasow dhe Sihon myghtern an Amorysi, ow leverel,

²²‘Gas vy dhe dremena dre dha dir; ny dreylyn a-denewen yn gwel nag yn gwinlann; ny wren eva dowr a buth; ni a wra mos yn fordh-veur an myghtern, bys pan dremensyn dha diredh.’

²³Mes ny asas Sihon Ysrael dhe dremena y diredh. Ev a guntellas war-barth oll y bobel, hag eth yn-mes erbynn Ysrael dhe'n gwylvos, hag a dheuth dhe Yahas, hag a vatalyas orth Ysrael.

²⁴Hag Ysrael a'n gweskis gans min an kledha, ha kemmeres yn perghennogeth y dir a Arnon dhe Yabbok, bys y'n Ammonysi; rag krev o or an Ammonysi.

²⁵Hag Ysrael a gemmeras oll an sitys ma, hag Ysrael a drevesigas sitys oll an Amorysi, yn Heshbon, hag yn oll y wigow.

²⁶Rag Heshbon o sita Sihon myghtern an Amorysi, re omladhsa erbynn myghtern Moab, kyns ha kemmeres oll y dir yn-mes a'y dhorn, bys yn Arnon.

²⁷Yndella an ganoryon a lavarow koth a lever, ‘Dewgh dhe Heshbon, gesiwgh hi dhe vos drehevys, bedhes fondys sita Sihon.

²⁸Rag tan eth yn-rag a-dhiworth Heshbon, flamm dhiworth sita Sihon. Ev a gowlloskas Ar Moab, arlydhi breow Arnon.

²⁹Go-jy, A Moab! Ty yw diswrys, a bobel Kemosh! Ev re wrug y vebyon yn fowesigyon, ha'y vyrghes yn kethesow, dhe vyghtern an Amorysi, Sihon.

³⁰Ni re dennas sethow er aga fynn; distruys yw a Heshbon bys yn Dibon, ha ni re wastyas bys yn Nofah, bys yn Medeba.’

³¹Yndellma Ysrael a drigas yn pow an Amorysi.

³²Ha Moyses a dhannvonas dhe aspia Yazer; hag i a gemmeras y wigow, ha fesya an Amorysi esa ena.

³³Ena i a dreylyas ha mos der an fordh dhe Bashan; hag Og myghtern Bashan a dheuth yn-mes er aga fynn, ev ha'y bobel oll dhe vatalyas, yn Edrei.

³⁴Mes an ARLOEDH a leveris dhe Moyses, ‘Na borth own anodho; rag my re'n ros y'th dorn, hag oll y bobel, ha'y dir; ha ty a wra dhodho par dell wrussys dhe Sihon myghtern an Amorysi, esa trigys yn Heshbon.’

³⁵Ytho i a'n gweskis, ha'y vebyon, ha'y bobel oll, bys pan nag esa fowesik vytholl gesys dhodho; hag i a bewas y dir.