Read Kernewek Niverow 22 Bible Online

Niverow 22 - Kernewek bible

Niverow 22

¹Ena mebyon Ysrael eth yn-kerdh, ha kampya yn plenys Moab, ryb Yordan, a-dal Yeriko.

²Ha Balak mab Sippor a welas pup-tra re wrussa Ysrael dhe'n Amorysi.

³Hag yth esa Moab yn own meur a'n bobel, drefenn aga bos lies; hag euth a'n jeva Moab a vebyon Ysrael.

⁴Ha Moab a leveris dhe henavogyon Midyan, ‘An routh ma a wra dybri pup-tra eus a-dro dhyn, par dell dheber an ojyon gwels an gwel.’ Ytho Balak mab Sippor, neb o myghtern Moab y'n termyn na,

⁵a dhannvonas kannasow dhe Balaam mab Beor dhe Pethor, usi ogas dhe'n avon, yn tir mebyon y bobel, dh'y elwel, ow leverel, ‘Otta, pobel re dheuth yn-mes a Ejyp; i a gudh enep an nor, hag ymons i trigys a-dal dhymm.

⁶Deus lemmyn, molloth an bobel ragov, rag aga bos re alloesek ragov; martesen y hallav aga fetha ha'ga fesya dhiworth an tir; rag dell wonn, ev neb a vennigydh yw bennigys, ha neb a vollethydh yw mollothek.’

⁷Ytho henavogyon Moab ha henavogyon Midyan eth yn-kerdh gans pygans rag dewinieth yn aga dorn, ha dos dhe Balaam, ha ri dhodho messaj Balak.

⁸Hag ev a leveris dhodho, ‘Trigewgh omma an nos ma, ha my a dhre dhywgh ger, dell gews an ARLOEDH dhymm’; ytho pennsevigyon Moab a wortas gans Balaam.

⁹Ha Duw a dheuth dhe Balaam ha leverel, ‘Piw yw an wer ma genes?’

¹⁰Ha Balaam a leveris dhe Dhuw, ‘Balak mab Sippor, myghtern Moab, re dhannvonas dhymm, ow leverel,

¹¹“Otta, pobel re dheuth yn-mes a Ejyp, ha hi a gudh enep an dor; deus lemmyn ha'ga mollethi ragov; martesen y hallav omladh er aga fynn ha'ga gorra yn-mes.” ’

¹²Duw a leveris dhe Balaam, ‘Ny wredh mos gansa; ny wredh mollethi an bobel, rag bennigys yns.’

¹³Ytho Balaam a sevis myttin, ha leverel dhe bennsevigyon Balak, ‘Kewgh dh'agas tir agas honan; rag an ARLOEDH re'm naghas mos genowgh.’

¹⁴Ytho pennsevigyon Moab a sevis ha mos dhe Balak, ha leverel, ‘Balaam a nagh dos genen.’

¹⁵Unnweyth arta Balak a dhannvonas pennsevigyon, moy aga niver ha moy enorys agessa.

¹⁶Hag i a dheuth dhe Balaam ha leverel dhodho, ‘Yndellma y lever Balak mab Sippor: “Na'gas lett travyth a dhos dhymm;

¹⁷rag my a re dhywgh yn sur enor meur, ha pup-tra a leverydh dhymm my a'n gwra; dewgh, mollethewgh an bobel ma ragov.” ’

¹⁸Mes Balaam a worthybis ha leverel dhe servysi Balak, ‘Kyn rollo Balak dhymm y ji leun a arghans hag owr, ny allsen mos dres gorhemmynn an ARLOEDH ow Duw, dhe wul le po moy.

¹⁹My a'gas pys, lemmyn, trigewgh omma an nos ma ynwedh, may hwodhviv neppyth pella a wra an ARLOEDH leverel dhymm.’

²⁰Ha Duw a dheuth dhe Balaam y'n nos ha leverel dhodho, ‘Mar teuva an wer dhe'th elwel, ke gansa; mes marnas an pyth a worhemmynnav, ty a'n gwra.’

²¹Ytho Balaam a sevis myttin, ha dibra y asen,[11] ha mos gans pennsevigyon Moab.

²²Mes sorr Duw a veu enowys drefenn ev dhe vos; hag el an ARLOEDH a sevis y'n fordh avel y eskar. Lemmyn yth esa ev owth ehwias war an asen, hag yth esa y dhew was ganso.

²³Ha'n asen a welas el an ARLOEDH ow sevel y'n fordh, ha kledha noeth yn y dhorn; ha'n asen a dreylyas a-denewen yn-mes a'n fordh, ha mos y'n gwel; ha Balaam a weskis an asen, dh'y threylya y'n fordh.

²⁴Ena el an ARLOEDH a sevis yn fordh gul ynter an gwinlannow, gans fos a bub tu.

²⁵Ha pan welas an asen el an ARLOEDH, hi a omherdhyas erbynn an fos ha stroetha troes Balaam erbynn an fos; ytho ev a's gweskis arta.

²⁶Ena el an ARLOEDH eth yn-rag, ha sevel yn tyller kul, le nag esa fordh dhe dreylya naneyl dhe'n dyghow na dhe'n kledh.

²⁷Pan welas an asen el an ARLOEDH, hi a wrowedhas yn-dann Balaam; ha sorr Balaam a veu enowys, hag ev a weskis an asen gans y welenn.

²⁸Ena an ARLOEDH a igoras ganow an asen, ha hi a leveris dhe Balaam, ‘Pandr'a wrug vy dhis ma'm gweskis an teyr gweyth ma?’

²⁹Ha Balaam a leveris dhe'n asen, ‘Drefenn ty dhe wul ges ahanav: a pe kledha y'm dorn, erbynn lemmyn my a'th ladhsa.’

³⁰Ha'n asen a leveris dhe Balaam, ‘A nyns ov vy dha asen, warnav may marghegsys pup-prys a-ban veuv vy dhis bys y'n jydh ma? En vy bythkweth usys dhe wul yndellma dhis?’ Hag ev a leveris, ‘Nag es.’

³¹Ena an ARLOEDH a igoras dewlagas Balaam, hag ev a welas el an ARLOEDH, ow sevel y'n fordh, ha'y gledha noeth yn y dhorn; hag ev a omblegyas, ha koedha war y fas.

³²Hag el an ARLOEDH a leveris dhodho, ‘Prag y hwesksys dha asen an teyr gweyth ma? Otta, my re dheuth yn-mes dhe'th enebi, rag dha fordh yw gorth a-ragov;

³³ha'n asen a'm gwelas, ha treylya a-denewen a-ragov an teyr gweyth ma. Mar ny dreyllya a-denewen a-dhiworthiv, yn sur nammnygen my a'th ladhsa ha gasa hi dhe vewa.’

³⁴Ena Balaam a leveris dhe el an ARLOEDH, ‘My re beghas, rag ny wodhyen ty dhe sevel y'n fordh er ow fynn. Lemmyn ytho, mars yw tebel y'th wolok, my a dhehwel arta.’

³⁵Hag el an ARLOEDH a leveris dhe Balaam, ‘Ke gans an wer; mes na gows marnas an ger a worhemmynnav dhis, henna y kewsydh.’ Ytho Balaam eth yn-rag gans pennsevigyon Balak.

³⁶Pan glewas Balak bos Balaam devedhys, ev eth yn-mes dhe vetya ganso bys yn sita Moab,[12] war or Arnon, yn penn pella an or.

³⁷Ha Balak a leveris dhe Balaam, ‘A ny dhannvenis dhis dhe'th elwel? Prag ny dheuthys dhymm? A ny allav yn hwir dha enora?’

³⁸Balaam a leveris dhe Balak, ‘Otta, my re dheuth dhis! A ny vydh dhymm galloes vyth dhe leverel neppyth a'm honan? An ger a worr Duw y'm ganow, henna y tal dhymm kewsel.’

³⁹Ena Balaam eth gans Balak, hag i a dheuth dhe Kiryath-husoth.

⁴⁰Ha Balak a offrynnas oghen ha deves, ha dannvon rann dhe Balaam ha dhe'n bennsevigyon esa ganso.

⁴¹Ha'n vorow Balak a gemmeras Balaam ha'y dhri yn-bann dhe Bamoth-baal; hag alena ev a welas an rann ogassa a'n bobel.[13]