Read Kernewek Niverow 24 Bible Online

Niverow 24 - Kernewek bible

Niverow 24

¹Pan welas Balaam bos plegadow dhe'n ARLOEDH benniga Ysrael, nyns eth, avel yn prysyow erell, dhe gavoes dewinieth, mes settya y fas war-tu ha'n gwylvos.

²Ha Balaam a dhrehevis y dhewlagas, ha gweles Ysrael ow kampya, loeth ryb loeth. Ha Spyrys Duw a dheuth warnodho,

³hag ev a gemmeras yn-bann y gows, ha leverel, ‘Dargan Balaam mab Beor, ha dargan an gour igor y lagas,

⁴ger anodho ev neb a glew geryow Duw, neb a wel gwelesigeth an Ollgalloesek[15], ow koedha yn transyek, mes ankudhys y dhewlagas:

⁵Ass yw teg agas tyldow, A Yakob, agas kampvaow, A Ysrael!

⁶Yth omystynnons avel nansow pell, avel lowarthyow ryb avon, avel aloewydh re blansas an ARLOEDH, avel kederwydh ryb an dowrow.

⁷Dowr a wra frosa a-dhiworth y gelern, ha'y has a vydh yn lies dowr, y vyghtern a vydh ughella ages Agag, ha'y ruvaneth a vydh ughelhes.

⁸Duw a'n dre yn-mes a Ejyp; ev a'n jeves dell hevel kern an ojyon gwyls, ev a wra dybri kenedhlow y eskerens, ha terri aga eskern, ha'ga gwana gans y sethow.

⁹Ev a blattyas, ev a wrowedhas avel lew, hag avel lewes; piw a'n gwra dhe dhifuna? Bennigys re bo pubonan a'th vennik, ha mollothek re bo pubonan a'th volleth.’

¹⁰Ha sorr Balak a dhewis erbynn Balaam, hag ev a weskis y dhiwdhorn war-barth; ha Balak a leveris dhe Balaam, ‘My a'th elwis dhe vollethi ow eskerens, hag otta, ty re's bennigas an teyr gweyth ma.

¹¹Ytho lemmyn fi dhe'th tyller; my a leveris, “My a wra dha enora yn sertan”, mes an ARLOEDH re'th withas dhiworth enor.’

¹²Ha Balaam a leveris dhe Balak, ‘A ny wrug vy leverel dhe'th kannasow a dhannvensys dhymm,

¹³“Mar rolla Balak dhymm y ji leun a arghans hag owr, ny allsen mos dres ger an ARLOEDH, dhe wul da po drog a'm bodh vy; an pyth a gews an ARLOEDH, henna my a gews?”

¹⁴Ha lemmyn, otta, yth av dhe'm pobel; deus, my a'th warn a'n pyth a wra an bobel ma dhe'th pobel jy y'n dydhyow diwettha.’

¹⁵Ena ev a gemmeras yn-bann y gows, ha leverel, ‘Dargan Balaam, mab Beor, ha dargan an gour igor y lagas,

¹⁶ger anodho ev neb a glew geryow Duw, hag a woer skians an Ughella[16], hag a wel gwelesigeth an Ollgalloesek[17], ow koedha yn transyek, mes ankudhys y dhewlagas:

¹⁷My a'n gwel, mes a-der lemmyn; my a'n aspi, mes a-der yn ogas; sterenn a wra dos war-rag yn-mes a Yakob, ha ternwelenn a wra sevel yn-mes a Ysrael; hi a wra brewi talyow Moab, ha kregyn oll mebyon Sheth.

¹⁸Edom a vydh perghennys, y eskerens Seir a vydh perghennys ynwedh, hag Ysrael ow kul yn kolonnek.

¹⁹Dre Yakob gwarthevyans a vydh gwrys, ha'n re a skap dhiworth sita[18] a vydh distruys!’

²⁰Ena ev a viras war Amalek, ha kemmeres yn-bann y gows, ha leverel, ‘Amalek o kynsa an kenedhlow, mes wortiwedh ev a dheu dhe dhistruyans.’

²¹Hag ev a viras war an Kenyas, ha kemmeres yn-bann y gows, ha leverel, ‘Fast yw dha drigva, ha dha neyth yw settys y'n garrek;

²²byttegyns Kayn a vydh gwastyes. Pes termyn y hwra Asshur dha gemmeres dhe-ves yn kethneth?’

²³Hag ev a gemmeras yn-bann y gows, ha leverel, ‘Eghan, piw a wra bewa pan wra Duw hemma?

²⁴Mes gorholyon a wra dos a-dhiworth Kittim hag a wra plagya Asshur hag Eber; hag ev ynwedh a wra dos dhe dhistruyans.’

²⁵Ena Balaam a sevis, ha dehweles dh'y dyller; ha Balak ynwedh eth war y hyns.