Read Kernewek Niverow 25 Bible Online

Niverow 25 - Kernewek bible

Niverow 25

¹Hag Ysrael ow triga yn Shittim, an bobel a dhallathas horya gans mowesi Moab.

²An re ma a elwis an bobel dhe sakrifisow aga duwow, ha'n bobel a dhybris, hag omblegya dh'aga duwow.

³Ytho Ysrael a lenas dhe Baal-peor. Ha sorr an ARLOEDH a dhewis erbynn Ysrael;

⁴ha'n ARLOEDH a leveris dhe Moyses, ‘Kemmer oll pennow an bobel, ha'ga kregi y'n howl a-rag an ARLOEDH, may treyllyo sorr fers an ARLOEDH dhiworth Ysrael.’

⁵Ha Moyses a leveris dhe vreusysi Ysrael, ‘Peub ahanowgh gwra ladha y wer re omyewas dhe Baal-peor.’

⁶Hag otta, onan a vebyon Ysrael a dheuth hag a dhros Midyanyades dh'y vreder yn golok Moyses hag yn golok an kuntelles oll a vebyon Ysrael, hag i owth oela orth daras tylda an kuntelles.

⁷Pan y'n gwelas Finehas mab Eleazar, mab Aron an oferyas, ev a sevis ha gasa an kuntelles, ha kemmeres guw yn y dhorn

⁸ha mos war-lergh an gour a Ysrael y'n tylda, ha gwana aga dew, an gour a Ysrael ha'n venyn, dre hy horf. Yndellma an pla a veu astelys a-dhiworth mebyon Ysrael.

⁹Byttegyns an re a verwis der an pla o peswar mil warn ugens.

¹⁰Ha'n ARLOEDH a leveris dhe Moyses,

¹¹‘Finehas mab Eleazar, mab Aron an oferyas, re dhastreylyas ow sorr a-dhiworth mebyon Ysrael, rag y vos avius, avel gans ow avi vy, yn aga mysk. Ytho ny dhistruis mebyon Ysrael y'm avi.

¹²Ytho lavar, “Otta, y rov dhodho ow hevambos a gres;

¹³hag y fydh dhodho, ha dh'y dhiyskynnysi war y lergh, kevambos a oferyaseth bys vykken, drefenn y vos avius rag y Dhuw, ha gul daspren rag mebyon Ysrael.” ’

¹⁴Hanow an gour ledhys a Ysrael, a veu ledhys war-barth gans an Vidyanyades, o Zimri mab Salu, penn chi tasek an Simeonysi.

¹⁵Ha hanow an Vidyanyades a veu ledhys o Kozbi myrgh Sur, hag o penn chi tasek yn Midyan.

¹⁶Ha'n ARLOEDH a leveris dhe Moyses,

¹⁷‘Omsett erbynn an Midyanysi, ha'ga gweskel;

¹⁸rag i re'th arvedhas gans aga felder, ganso ma'th hussons yn mater Peor, hag yn mater Kozbi, myrgh penntern Midyan, aga hwoer, a veu ledhys yn dydh an pla a-wovis Peor.’