Read Kernewek Niverow 28 Bible Online

Niverow 28 - Kernewek bible

Niverow 28

¹An ARLOEDH a leveris dhe Moyses:

²Gorhemmynn dhe vebyon Ysrael, ha leverel dhedha: Ow offrynn, ow boes rag ow offrynnow leskys, ow sawer plegadow, gwaytyewgh profya dhymm yn y seson ewn.

³Ha ty a lever dhedha, Hemm yw offrynn dre dan hag a offrynnowgh dhe'n ARLOEDH: dew oen unn bloedh heb namm, dydh ha dydh, avel offrynn pub-dydhyek.

⁴An eyl oen ty a wra offrynna myttinweyth, ha'y gila ty a wra offrynna y'n gorthugher;

⁵ynwedh an degves rann a efa a vleus fin, rag offrynn greun, kemmyskys gans kwarter hin a oyl gweskys.

⁶Offrynn leskys pub-dydhyek yw, hag a veu ordenys yn menydh Sinay rag sawer plegadow, offrynn dre dan dhe'n ARLOEDH.

⁷Y offrynn diwes a vydh peswora rann a hin rag pub oen; y'n tyller sans ty a wra diveri offrynn diwes a dhiwes krev dhe'n ARLOEDH.

⁸An oen arall ty a wra offrynna gorthugherweyth; avel an offrynn greun y'n myttin, ha kepar ha'y offrynn diwes. Ty a'n offrynn avel offrynn dre dan, sawer plegadow dhe'n ARLOEDH.

⁹Y'n sabot dew oen unn bloedh heb namm, ha diw dhegves rann a efa a vleus fin rag offrynn greun, kemmyskys gans oyl, ha'y offrynn diwes:

¹⁰hemm yw an offrynn leskys a bub sabot, ryb an offrynn leskys pub-dydhyek ha'y offrynn diwes.

¹¹Yn dallethow agas misyow ty a wra offrynna offrynn leskys dhe'n ARLOEDH: dew darow yowynk, unn hordh, seyth oen unn bloedh heb namm;

¹²ynwedh teyr degves rann a efa a vleus fin rag offrynn greun, kemmyskys gans oyl, rag pub tarow; ha diw dhegves rann a vleus fin rag offrynn greun, kemmyskys gans oyl, rag an unn hordh;

¹³hag unn degves rann a efa a vleus fin kemmyskys gans oyl avel offrynn greun rag pub oen; rag offrynn leskys a sawer plegadow, offrynn dre dan dhe'n ARLOEDH.

¹⁴Aga offrynnow diwes a vydh hanter hin a win rag tarow, tressa rann a hin rag hordh, ha kwarter hin rag oen; hemm yw an offrynn leskys a bub mis dres misyow an vlydhen.

¹⁵Ynwedh unn bogh rag offrynn pegh dhe'n ARLOEDH; offrynnys vydh, ryb an offrynn leskys pub-dydhyek ha'y offrynn diwes.

¹⁶Y'n peswardhegves dydh a'n kynsa mis yth yw pask an ARLOEDH.

¹⁷Hag yn pymthegves dydh an mis ma yth yw goel; seyth dydh bara heb goell a vydh dybrys.

¹⁸Y'n kynsa dydh y fydh kuntelles sans: ny wrewgh ober arvethys.

¹⁹Hwi a offrynn offrynn dre dan, offrynn leskys dhe'n ARLOEDH: dew darow yowynk, unn hordh, ha seyth oen unn bloedh; i a vydh dhywgh heb namm;

²⁰ynwedh aga offrynn greun a vleus fin kemmyskys gans oyl; teyr degves rann a efa ty a offrynn rag tarow, ha diw dhegves rann rag hordh;

²¹Unn degves rann ty a offrynn rag peub a'n seyth oen;

²²ynwedh unn bogh rag offrynn pegh, dhe wul prenedh ragowgh.

²³Ty a wra offrynna an re ma, ryb offrynn leskys an myttin, hag yw rag offrynn leskys pub-dydhyek.

²⁴Y'n keth vaner ty a wra offrynna pub dydh, dres seyth dydh, boes offrynn dre dan, sawer plegadow dhe'n ARLOEDH; offrynnys vydh ryb an offrynn leskys pub-dydhyek ha'y offrynn diwes.

²⁵Hag y'n seythves dydh hwi a'gas bydh kuntelles sans: ny wrewgh ober arvethys.

²⁶Yn dydh an kynsa frut, pan offrynnowgh offrynn greun a reun nowydh dhe'n ARLOEDH dh'agas dy'goel a seythunyow, hwi a'gas bydh kuntelles sans; ny wrewgh ober arvethys,

²⁷mes offrynnewgh offrynn leskys, sawer plegadow dhe'n ARLOEDH; dew darow yowynk, unn hordh, seyth oen unn bloedh;

²⁸ynwedh aga offrynn greun a vleus fin kemmyskys gans oyl, teyr degves rann a efa rag pub tarow, diw dhegves rann rag unn hordh,

²⁹unn degves rann rag peub a'n seyth oen;

³⁰gans unn bogh, rag gul prenedh ragowgh.

³¹Ryb an offrynn leskys pub-dydhyek ha'y offrynn greun, hwi a's offrynn gans aga offrynnow diwes. I a vydh dhywgh heb namm.