Read Kernewek Niverow 29 Bible Online

Niverow 29 - Kernewek bible

Niverow 29

¹Y'n kynsa dydh a'n seythves mis hwi a'gas bydh kuntelles sans; ny wrewgh ober arvethys. Dydh yw ragowgh dhe hwytha kern.

²Hwi a wra offrynna offrynn leskys, sawer plegadow dhe'n ARLOEDH; unn tarow yowynk, unn hordh, seyth oen unn bloedh heb namm,

³ha'ga offrynn greun a vleus fin kemmyskys gans oyl, teyr degves rann a efa rag an tarow, diw dhegves rann rag an hordh,

⁴hag unn degves rann rag peub a'n seyth oen;

⁵gans unn bogh rag offrynn pegh, rag gul prenedh ragowgh;

⁶ryb offrynn leskys an loer nowydh, ha'y offrynn greun, ha'n offrynn leskys pub-dydhyek, ha'y offrynn greun, ha'ga offrynnow diwes, herwydh an ordenans ragdha, sawer plegadow, offrynn dre dan dhe'n ARLOEDH.

⁷Y'n degves dydh a'n seythves mis ma hwi a'gas bydh kuntelles sans, hag omjastia; ny wrewgh ober arvethys.

⁸Hwi a wra offrynna offrynn leskys dhe'n ARLOEDH, sawer plegadow: unn tarow yowynk, unn hordh, seyth oen unn bloedh; i a vydh dhywgh heb namm;

⁹ha'ga offrynn greun a vleus fin kemmyskys gans oyl, teyr degves rann a efa rag an tarow, diw dhegves rann rag an unn hordh,

¹⁰unn degves rann rag peub a'n seyth oen;

¹¹ynwedh unn bogh rag offrynn pegh, ryb offrynn pegh an prenedh, ha'n offrynn leskys pub-dydhyek, ha'ga offrynnow diwes.

¹²Y'n pymthegves dydh hwi a'gas bydh kuntelles sans; ny wrewgh ober arvethys, ha hwi a with goel dhe'n ARLOEDH seyth dydh.

¹³Hwi a wra offrynna offrynn leskys, offrynn dre dan, sawer plegadow dhe'n ARLOEDH, trydhek tarow yowynk, dew hordh, peswardhek oen unn bloedh; i a vydh heb namm,

¹⁴ha'ga offrynn greun a vleus fin kemmyskys gans oyl, teyr degves rann a efa rag peub a'n trydhek tarow, diw dhegves rann rag peub a'n dhew hordh,

¹⁵hag unn degves rann rag peub a'n peswardhek oen;

¹⁶ynwedh unn bogh rag offrynn pegh, ryb an offrynn leskys pub-dydhyek, y offrynn greun ha'y offrynn diwes.

¹⁷Y'n nessa dydh, dewdhek tarow yowynk, dew hordh, peswardhek oen unn bloedh heb namm,

¹⁸ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans;

¹⁹ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'ga offrynnow diwes.

²⁰Y'n tressa dydh unnek tarow, dew hordh, peswardhek oen unn bloedh heb namm,

²¹ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh an niver, herwydh an ordenans;

²²ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

²³Y'n peswora dydh deg tarow, dew hordh, peswardhek oen unn bloedh heb namm,

²⁴aga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans;

²⁵ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

²⁶Y'n pympes dydh naw tarow, dew hordh, peswardhek oen unn bloedh heb namm,

²⁷ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans;

²⁸ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

²⁹Y'n hweghves dydh eth tarow, dew hordh, peswardhek oen unn bloedh heb namm,

³⁰ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans;

³¹ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynnow diwes.

³²Y'n seythves dydh seyth tarow, dew hordh, peswardhek oen unn bloedh heb namm,

³³ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans;

³⁴ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

³⁵Y'n ethves dydh hwi a'gas bydh kuntelles solem: ny wrewgh ober arvethys,

³⁶Hwi a wra offrynna offrynn leskys, offrynn dre dan, sawer plegadow dhe'n ARLOEDH: unn tarow, unn hordh, seyth oen gorow unn bloedh heb namm,

³⁷aga offrynn greun ha'ga offrynnow diwes rag an tarow, rag an hordh ha rag an eyn, war-lergh aga niver, herwydh an ordenans;

³⁸ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

³⁹An re ma hwi a wra offrynna dhe'n ARLOEDH yn agas goelyow, keffrys ha'gas ambosow ha'gas offrynnow bolonjedhek, rag agas offrynnow leskys, ha rag agas offrynnow greun, ha rag agas offrynnow diwes, ha rag agas offrynnow kres.

⁴⁰Ha Moyses a leveris dhe vebyon Ysrael pup-tra poran dell worhemmynnis an ARLOEDH dhe Moyses.[22]