Read Kernewek Niverow 34 Bible Online

Niverow 34 - Kernewek bible

Niverow 34

¹An ARLOEDH a leveris dhe Moyses:

²Gorhemmynn dhe vebyon Ysrael, ha leverel dhedha: Pan dhewgh dhe bow Kanan (hemm yw an tir hag a goedh dhywgh avel eretons, pow Kanan gans y oryon),

³agas tenewen dyghow a vydh a-dhiworth gwylvos Sin, ryb amal Edom; hag y'n est, agas or dhyghow a vydh dhiworth penn Mor an Hoelan;

⁴ha'gas or a wra treylya dhiworth an dhyghowbarth bys yn bolgh Akrabbim, ha treusi dhe Sin, ha'y benn a vydh a'n dhyghowbarth dhe Kadesh-barnea; ena y hwra mos yn-rag dhe Hasar-addar, ha tremena bys yn Asmon;

⁵ha'n or a wra treylya a-dhiworth Asmon dhe wover Ejyp, ha'y benn a vydh orth an mor.

⁶Dhe or an howlsedhes, hwi a'gas bydh an Mor Bras ha'y arvor; homma a vydh agas or a'n howlsedhes.

⁷Homma a vydh agas or a'n gogledh: a'n Mor Meur hwi a wra merkya agas linenn dhe venydh Hor;

⁸a-dhiworth menydh Hor hwi a's merk bys yn Lebo-hamath, ha Sedad a vydh penn an or;

⁹ena an or a ystynn dhe Zifron ha'y benn a vydh Hasar-enan; hemma a vydh agas or y'n gogledh.

¹⁰Hwi a wra merkya agas or a'n howldrevel a-dhiworth Hasar-enan dhe Shefam;

¹¹ha'n or a wra diyskynna a-dhiworth Shefan dhe Ribla a'n barth est dhe Ain; ha'n or a wra diyskynna, ha drehedhes skoedh mor Kinnereth a'n est;

¹²ha'n or a wra diyskynna dhe'n Yordan, ha'y dhiwedh a vydh Mor an Hoelan. Hemma a vydh agas tir ha'y oryon oll a-dro.

¹³Moyses a worhemmynnis dhe vebyon Ysrael, ow leverel: Hemm yw an tir a heryowgh gans tewlel prenn, re worhemmynnis an ARLOEDH dhe ri dhe'n naw loeth ha dhe'n hanter-loeth;

¹⁴rag loeth mebyon Rewben herwydh chiow tasow, ha loeth mebyon Gad herwydh chiow aga thasow, re dhegemmeras aga eretons; hag ynwedh hanter-loeth Manasse re dhegemmeras aga eretons;

¹⁵an dhew loeth ha'n hanter-loeth a dhegemmeras aga eretons a'n tu arall dhe Yordan a'n est dhe Yeriko, war-tu ha'n howldrehevel.

¹⁶An ARLOEDH a leveris dhe Moyses:

¹⁷An re ma yw henwyn an wer a wra ranna an tir rag agas eretons: Eleazar an oferyas ha Yoshua mab Nun.

¹⁸Ty a wra kemmeres unn hembrenkyas a bub loeth, dhe ranna an tir rag eretons.

¹⁹An re ma yw henwyn an wer: a loeth Yuda, Kaleb mab Yefunne.

²⁰A loeth mebyon Simeon, Shemuel mab Ammihud.

²¹A loeth Benyamin, Elidad mab Kislon.

²²A loeth mebyon Dan, hembrenkyas, Bukki mab Yogli.

²³A vebyon Yosep: a loeth mebyon Manasse, hembrenkyas, Hanniel mab Efod.

²⁴A loeth mebyon Efraym, hembrenkyas, Kemuel mab Shiftan.

²⁵A loeth mebyon Zebulun, hembrenkyas, Elisafan mab Parnak.

²⁶A loeth mebyon Yssakar, hembrenkyas, Paltiel mab Azzan.

²⁷Hag a loeth mebyon Asher, hembrenkyas, Ahihud mab Shelomi.

²⁸A loeth mebyon Naftali, hembrenkyas, Pedahel mab Ammihud.

²⁹An re ma yw an wer a worhemmynnis an ARLOEDH dhedha ranna eretons rag mebyon Ysrael yn pow Kanan.