Read Kernewek Niverow 5 Bible Online

Niverow 5 - Kernewek bible

Niverow 5

¹An ARLOEDH a leveris dhe Moyses,

²‘Gorhemmynn dhe vebyon Ysrael may korrens yn-mes a'n kamp pub klavorek ha peub a'n jeves sygerans ha pubonan yw avlan dre gestav gans korf marow.

³Gorreydh ha benynreydh, ty a wra aga gorra yn-mes, orth aga gorra yn-mes a'n kamp ma na dhefollens aga hamp, le mayth esov trigys yn aga mysk.’

⁴Ha mebyon Ysrael a wrug yndella, ha'ga gorra yn-mes a'n kamp; dell leveris an ARLOEDH dhe Moyses, yndellma y hwrug mebyon Ysrael.

⁵An ARLOEDH a leveris dhe Moyses,

⁶‘Lavar dhe vebyon Ysrael, Pan wra gour po benyn pegh pynag yw usys dhe vos gwrys gans tus, ha bos dislel dhe'n ARLOEDH, ha'n den na yw kablus,

⁷ev a avow y begh hag a wrug;[4] hag ev a wra leun dhaskorrans a'y gammweyth, ow keworra pympes rann dhodho, orth y ri dhe neb a wrug an kammweyth.

⁸Mes mar ny'n jeves an gour neskar may fo gwrys dhodho daskorrans rag an kammweyth, an daskorrans rag an kammweyth a wra mos dhe'n ARLOEDH rag an oferyas, war-barth gans hordh an prenedh, ganso may fo gwrys prenedh ragdho.

⁹Pub offrynn, oll an rohow sans a vebyon Ysrael, hag a dhrons dhe'n oferyas, a vydh dhodho.

¹⁰Rohow sans pub gour a vydh dhodho; pypynag a wrello gour ri dhe'n oferyas a vydh dhodho.’

¹¹An ARLOEDH a leveris dhe Moyses,

¹²Lavar dhe vebyon Ysrael, Mars a gwreg gour vyth yn sowdhan ha bos dislen er y bynn,

¹³mar krowedh gour gensi hag y fydh dyllans has, hag yth yw kudhys a-dhiworth dewlagas hy gour, ha kelys yw hi dhe omdhefola ha nyns eus test er hy fynn, a-ban na veu hi kemmerys y'n gwrians;

¹⁴ha mar teu an spyrys a avi warnodho, hag ev a'n jeves avi a'y wreg, neb a omdhefolas; po mar teu an spyrys a avi warnodho, hag ev a'n jeves avi a'y wreg, kyn na veu defolys;

¹⁵ena an gour a hembronk y wreg dhe'n oferyas, ha dri an offrynn rygdhi, an degves rann a efa a vleus heydh; ny wra ev dinewi oyl vyth warnedha na gorra frankynkys warnedha, rag y vos offrynn greun a avi, offrynn greun a govadh, ow tri kammweyth dhe govadh.

¹⁶Ha'n oferyas a's dre yn nes, ha'y gorra a-rag an ARLOEDH;

¹⁷ha'n oferyas a wra kemmeres dowr sans yn lester a bri, ha kemmeres nebes a'n doust usi war leur an tabernakel ha'y worra y'n dowr.

¹⁸Ha'n oferyas a worr an venyn a-rag an ARLOEDH, ha digelmi gols penn an venyn, ha gorra yn hy diwdhorn offrynn greun an kovadh, hag yw offrynn greun a avi. Hag yn y dhorn an oferyas a'n jevydh an dowr a hwerowder a dhre an volleth.

¹⁹Ena an oferyas a wra dhedhi lia li, ow leverel, ‘Mar ny wrowedhas gour genes, ha mar ny dreylsys a-denewen dhe avlander, ha ty yn-dann rewl dha wour, bydh rydh a'n dowr ma a hwerowder a dhre an volleth.

²⁰Mes mars ythys yn sowdhan, kynth os yn-dann rewl dha wour, ha mar omdhefolsys, ha ken onan, nag yw dha wour, a wrowedhas genes’

²¹(ena gwres an oferyas gul dhe'n venyn kemmeres li an volleth, ha leverel dhe'n venyn) ‘re'th wrello an ARLOEDH molleth ha li yn mysk dha bobel, pan wra an ARLOEDH gul dha vordhos dhe wedhra ha'th torr dhe hwedhi;

²²re dremenno y'th kolodhyon an dowr ma a dhre an volleth ha gul dhe'th torr hwedhi ha'th vordhos gwedhra.’ Ha'n venyn a lever, ‘Amen, Amen.’

²³‘Ena an oferyas a wra skrifa an mollothow ma yn lyver, ha dilea geryow an volleth gans an dowr a hwerowder;

²⁴hag ev a wra dhe'n venyn eva an dowr a hwerowder hag a dhre an volleth; ha'n dowr hag a dhre an volleth a wra mos ynni ha gul dolor hwerow.

²⁵Ena an oferyas a wra kemmeres offrynn an greun a avi yn-mes a leuv an venyn, ha gwevya offrynn an greun a-rag an ARLOEDH ha'y dhri dhe'n alter;

²⁶ha'n oferyas a wra kemmeres dornas offrynn an greun, avel y rann govadh, ha'y leski war an alter, hag a-wosa ev a wra dhe'n venyn eva an dowr.

²⁷Ha wosa gul dhedhi eva an dowr, ena, mar omdhefolas ha bos dislen erbynn hy gour, an dowr hag a dhre an volleth a wra mos ynni ha gul dolor hwerow, ha'y thorr a hwedh, ha'y mordhos a wedher, ha'n venyn a vydh molleth yn mysk hy fobel.

²⁸Mes mar ny omdhefolas an venyn hag yw glan, ena hi a vydh rydh hag a yll dineythi fleghes.

²⁹‘Hemm yw an lagha yn kasow avi, pan a gwreg yn sowdhan hag omdhefola, kynth usi yn-dann rewl hy gour,

³⁰po pan dheu an spyrys a avi war wour hag ev a berth avi a'y wreg; ena ev a wra gorra an venyn a-rag an ARLOEDH, ha'n oferyas a wra kollenwel warnedhi oll an lagha ma.

³¹An gour a vydh rydh a gammweyth, mes an venyn a dheg hy hammweyth.’