Read Kernewek Niverow 6 Bible Online

Niverow 6 - Kernewek bible

Niverow 6

¹Ha'n ARLOEDH a leveris dhe Moyses,

²Lavar dhe vebyon Ysrael, Pan gollenow gour po benyn ambos arbennik, ambos nazirek, dhe vos sakrys avel naziryas dhe'n ARLOEDH,

³ev a wra omwitha dhiworth gwin ha korev; ny wra eva aysel gwrys a win na aysel gwrys a gorev, na eva sugen gwinreun na dybri gwinreun kro po syghys.

⁴Dydhyow oll may fo naziryas ny wra dybri travyth yw askorrys gans an gwinbrenn, na hwath an has na'n rusk.

⁵Dydhyow oll y ambos nazirek ny wra altenn vyth dos war y benn; bys pan vydh kowlwrys an termyn may fo sakrys avel naziryas dhe'n ARLOEDH, ev a vydh sans; ev a wra gasa kudynnow y wols dhe devi hir.

⁶Dydhyow oll may fo sakrys avel naziryas dhe'n ARLOEDH ny wra mos ogas dhe gorf marow.

⁷Na rag y das, na rag y vamm, na rag y vroder na rag y hwoer, mar merwons, ny wra dh'y honan bos avlan; rag y sakrans dhe Dhuw a vydh war y benn.

⁸An dydhyow oll a'y sakrans ev a vydh sans dhe'n ARLOEDH.

⁹Ha mar merow den rybdho desempis, hag ev a dhefol y benn sakrys, ena ev a wra treghi gols y benn yn dydh y lanheans; y'n seythves dydh ev a dregh y wols.

¹⁰Y'n ethves dydh ev a dhre diw durenn po diw golomm yowynk dhe'n oferyas dhe dharas tylda an kuntelles,

¹¹ha'n oferyas a wra profya an eyl rag offrynn pegh ha'y ben rag offrynn leskys, ha gul prenedh ragdho, rag ev a beghas dre reson an korf marow. Hag ev a wra sakra y benn an keth jydh na,

¹²ha bos naziryas dhe'n ARLOEDH rag dydhyow y sakrans, ha dri oen gorow a unn bloedh rag offrynn kammweyth; mes an termyn kyns a vydh mannhes, drefenn bos defolys y sakrans.

¹³Ha hemm yw an lagha rag an naziryas, pan vydh kowlwrys termyn y sakrans: ev a vydh dres dhe dharas tylda an kuntelles,

¹⁴hag ev a dhre y offrynn dhe'n ARLOEDH, unn oen gorow a unn bloedh heb namm rag offrynn leskys, hag unn oenes benow a unn bloedh heb namm avel offrynn pegh, hag unn hordh heb namm avel offrynn kres,

¹⁵ha kanstell a vara heb goell, tesennow rond a vleus fin kemmyskys gans oyl, ha tesennow tanow heb goell urys gans oyl, ha'ga offrynn greun ha'ga offrynnow diwes.

¹⁶Ha'n oferyas a wra aga dri a-rag an ARLOEDH ha gul y offrynn pegh ha'y offrynn leskys,

¹⁷hag ev a wra profya an hordh avel sakrifis offrynn kres dhe'n ARLOEDH gans y ganstell a vara heb goell; an oferyas a wra profya ynwedh y offrynn greun ha'y offrynn diwes.

¹⁸Ha'n naziryas a wra treghi gols y benn sakrys dhe dharas tylda an kuntelles, hag a wra kemmeres gols y benn sakrys ha'y worra war an tan usi yn-dann sakrifis an offrynn kres.

¹⁹Ha'n oferyas a wra kemmeres skoedh an hordh, pan vydh bryjys, hag unn desenn rond a vara heb goell a'n ganstell, hag unn desenn danow a vara heb goell, ha'ga gorra war dhiwdhorn an naziryas, wosa ev dhe dreghi gols y sakrans.

²⁰Ha'n oferyas a wra aga gwevya rag offrynn gwevys a-rag an ARLOEDH; i yw rann sans dhe'n oferyas, war-barth gans an vronn a vydh gwevys ha'n vordhos a vydh drehevys; ha wosa henna an naziryas a yll eva gwin.

²¹Hemm yw an lagha rag an naziryas a wra an ambos. Y offrynn dhe'n ARLOEDH a vydh herwydh y ambos nazirek, war-barth gans an pyth may hyll kavoes an pygans ragdho; herwydh y ambos a wrello, yndella ev a wra herwydh an lagha rag y sakrans avel naziryas.

²²An ARLOEDH a leveris dhe Moyses:

²³Lavar dhe Aron ha'y vebyon, Yndellma hwi a wra benniga mebyon Ysrael: hwi a lever dhedha,

²⁴An ARLOEDH re'th vennikko ha'th gwitha:

²⁵An ARLOEDH re wrello dh'y fas splanna warnas ha bos grassyes dhis:

²⁶An ARLOEDH re dhrehaffo y fas warnas, ha ri dhis kres.

²⁷Yndellma i a wra gorra ow hanow war vebyon Ysrael ha my a wra aga benniga.