Read Kernewek Niverow 8 Bible Online

Niverow 8 - Kernewek bible

Niverow 8

¹Lemmyn an ARLOEDH a leveris dhe Moyses,

²Lavar dhe Aron, Pan settydh an lugern, an seyth lugarn a re golow a-rag an kantoler.

³Hag Aron a wrug yndella; ev a settyas y lugern dhe ri golow a-rag an kantoler, dell worhemmynnis an ARLOEDH dhe Moyses.

⁴Ha hemm o kreft an kantoler, ober mortholys yn owr; a'y droes dh'y vleujennow, yth o ober mortholys; war-lergh an patron a dhiskwedhas an ARLOEDH dhe Moyses, yndellma ev a wrug an kantoler.

⁵Ha'n ARLOEDH a leveris dhe Moyses,

⁶Kemmer an Levysi a-dhiworth mebyon Ysrael, ha'ga glanhe.

⁷Hag yndellma ty a wra dhedha, dh'aga glanhe: gwra skoellya dowr an glanheans warnedha, ha gas i dhe vos gans altenn war oll aga horf, ha golghi aga dillas hag omlanhe.

⁸Ena gas i dhe gemmeres tarow yowynk ha'y offrynn greun a vleus fin kemmyskys gans oyl, ha ty a gemmer tarow yowynk arall rag offrynn pegh.

⁹Ha ty a dhre an Levysi a-rag tylda an kuntelles, ha gelwel an gemmynieth oll a vebyon Ysrael.

¹⁰Pan dhredh an Levysi a-rag an ARLOEDH, mebyon Ysrael a worr aga diwleuv war an Levysi.

¹¹Hag Aron a wra profya an Levysi a-rag an ARLOEDH, offrynn gwevys a-dhiworth mebyon Ysrael, may fons sakrys dhe wul servis an ARLOEDH.

¹²Ena an Levysi a worr aga diwleuv war benn an terewi; ha ty a wra profya an eyl rag offrynn pegh ha'y gila rag offrynn dre dan dhe'n ARLOEDH, rag gul prenedh a-barth an Levysi.

¹³Ha ty a wra dhe'n Levysi sevel a-rag Aron ha'y vebyon, ha'ga offrynna avel offrynn gwevys dhe'n ARLOEDH.

¹⁴Yndellma ty a dhiberth an Levysi a-dhiworth mebyon Ysrael, ha'n Levysi a vydh dhymm.

¹⁵Ha wosa henna an Levysi a wra entra dhe servya tylda an kuntelles, wosa ty dh'aga glanhe ha'ga offrynna avel offrynn gwevys.

¹⁶Rag res dhymm yn tien yth yns i a-dhiworth mebyon Ysrael; yn le seul a iger pub torr, pub kynsa-genys a vebyon Ysrael, my re's kemmeras ragov ow honan.

¹⁷Rag pub kynsa-genys yn mysk mebyon Ysrael yw dhymm, ha den ha best; y'n jydh may ledhis pub kynsa-genys yn pow Ejyp my a's sakras dhymm ow honan,

¹⁸ha my re gemmeras an Levysi yn le pub kynsa-genys yn mysk mebyon Ysrael.

¹⁹Ha my re ros an Levysi yn ro dhe Aron ha'y vebyon yn mysk mebyon Ysrael, dhe wul servis rag mebyon Ysrael yn tylda an kuntelles, ha dhe wul prenedh rag mebyon Ysrael, ma na vo pla yn mysk mebyon Ysrael mar teffons nes dhe'n sentri.

²⁰Yndellma y hwrug Moyses hag Aron ha'n kuntelles oll a vebyon Ysrael dhe'n Levysi; war-lergh pup-tra a worhemmynnis an ARLOEDH dhe Moyses a-dro dhe'n Levysi, mebyon Ysrael a wrug dhedha.

²¹Ha'n Levysi a omlanhas a begh, ha golghi aga dillas; hag Aron a's offrynnas avel offrynn gwevys a-rag an ARLOEDH, hag Aron a wrug prenedh ragdha dh'aga glanhe.

²²Ha wosa henna an Levysi a entras dhe wul aga servis yn tylda an kuntelles a-rag Aron ha'y vebyon; dell worhemmynnsa an ARLOEDH dhe Moyses a-dro dhe'n Levysi, yndellma i a wrug dhedha.

²³Ha'n ARLOEDH a leveris dhe Moyses,

²⁴Hemm yw an pyth a dhegoedh dhe'n Levysi: a bymp bloedh warn ugens ha moy i a wra mos dhe wul ober an servis yn tylda an kuntelles;

²⁵hag a'n oes a dheg blydhen ha dew-ugens i a wra omdenna a ober an servis ha ny servyons namoy,

²⁶mes menystra dh'aga breder yn tylda an kuntelles, dhe witha an charj, ha ny wrons servis. Yndellma ty a wra dhe'n Levysi a-dro dh'aga deverow.