Read Kernewek Mika 1 Bible Online

Mika 1 - Kernewek bible

Mika 1

¹Hemm yw ger an ARLOEDH a dheuth dhe Mika a Moresheth yn dydhyow Yotham, Ahaz ha Hezekia, myghternedh Yuda, an pyth a welas a-dro dhe Samaria ha Yerusalem.

²Klewewgh, hwi boblow oll! Goslow, A norvys, ha pup-tra eus ynno! Bedhes an Arloedh DUW test er agas pynn, an Arloedh a'y dempel sans.

³Rag otta, yma an ARLOEDH ow tos yn-mes a'y le, ha diyskynna ha stankya war tylleryow ughel an norvys.

⁴Ha'n menydhyow a wra teudhi yn-danno ha'n nansow a vydh folsys, avel koer a-rag an tan, avel dowrow diverys war leder serth.

⁵Yth yw hemma oll drefenn treuspassow Yakob ha drefenn peghadow chi Ysrael. Pyth yw treuspass Yakob? A nyns ywa Samaria? Ha pyth yw tylleryow ughel Yuda? A nyns yns i Yerusalem?[1]

⁶Rakhenna y hwrav a Samaria karnedh y'n gwel, tyller rag plansa gwinbrennyer; ha my a dhinwa hy meyn y'n nans, ha diskudha hy selyow.

⁷Oll hy imajys gravys a vydh terrys dhe demmyn, oll hy gobrow a vydh leskys dre dan, hag oll hy imajys a dhiswrav; rag hi a's kuntellas dhiworth gober hora, ha dhe wober hora y tehwelons.

⁸Rag hemma y hwrav vy galari ha kyni; mos a wrav dieskis ha lomm, my a wra kynvann avel an owrgeun, ha drem avel an strusyow.

⁹Rag ny yll hy goli bos yaghhes, ha re dheuth dhe Yuda, ha drehedhes dhe yet ow fobel, bys yn Yerusalem.

¹⁰Na dherivewgh e yn Gath, na oelewgh kammenn vyth; yn Beth-le-afra omrolyewgh y'n doust!

¹¹Tremen, annedhyades Shafir, yn noeth, methek! Ny dheuth yn-mes annedhyades Sanan; kynvann Beth-Esel a gemmer dhiworthowgh y savla.

¹²Rag annedhyades Maroth a worta dader yn prederus, drefenn droktra re dheuth war-nans a'n ARLOEDH bys yn yet Yerusalem.

¹³Herness an margh skav dhe'n charett, annedhyades Lakish; dalleth peghes re beus dhe vyrgh Sion, rag ynnos y feu kevys treuspassow Ysrael.

¹⁴Rakhenna ty a re rohow-dibarth dhe Moresheth-gath; chiow Aghzib a vydh toell dhe vyghternedh Ysrael.

¹⁵Hwath y trov warnas an trygher, annedhyades Maresha; bys yn Adullam y teu golewder Ysrael.

¹⁶Omvoelha, ha trogh dha wols rag an vebyon a'th telit; omwra maga foel avel er, rag i res eth a-dhiworthis bys yn divroedh.