Read Kernewek Mika 7 Bible Online

Mika 7 - Kernewek bible

Mika 7

¹Go-vy! Rag deuvev ha bos avel diwettha kuntell frut an hav, po kuntell gesigow trevas an grappys, pan nag eus grappys gesys dhe dhybri, na figys a-varr a'm beus hwans anedha.

²Gallas an den duwek a'n bys, ha nyns eus onan ewnhynsek yn mysk tus; i oll a skolk yn kontrewaytyans rag skoellya goes ha peub a helgh y vroder gans roes.

³Aga diwla yw sleygh dhe wul drog; an penntern ha'n breusyas a wovynn falswober, an den galloesek a lever y vynnas, hag yndella brasa a wrons dh'y gowlwul.

⁴An gwella anedha yw haval dhe spedhasenn, an moyha ewnhynsek haval dhe ge dren. Dydh dha woelyoryon ha'th kessydhyans yw devedhys: yma aga deray ow tegynsiwa.

⁵Na drest yn koweth, na fydh yn kothman; gwith porthow dha anow a'n venyn a bowes war dha askra;

⁶rag an mab a dhyght y das gans bismer, an vyrgh a omsav erbynn hy mamm, an wohydh erbynn hy hweger; eskerens gour yw tus y ji y honan.

⁷Byttegyns, my a vynn mires dhe'n ARLOEDH, my a worta Duw ow selwyans; ow Duw a'm klewvydh.

⁸Na lowenhewgh a-dro dhymm, ow eskares; pan goedhav, y savav; pan esedhav yn tewlder, an ARLOEDH a vydh golow dhymm.

⁹My a berth sorrvann an ARLOEDH, drefenn re beghis er y bynn, bys pan bled ow hen ha gul breus ragov. Ev a'm hembronk y'n golow; y hwelav y ewnder.

¹⁰Ena y'n gwel ow eskares, ha meth a's kudh; yn-medh hi dhymm, ‘Ple'ma an ARLOEDH, dha Dhuw?’ Ow dewlagas a lowenha orth hy gweles. Lemmyn hi a vydh trettys dhe'n dor haval dhe leys an stretow.

¹¹Dydh rag drehevel dha fosow! An jydh na, yth ystynnir an or.

¹²An jydh na y tons i dhis, a Assyria ha sitys Ejyp, hag a Ejyp dhe'n Avon, a vor dhe vor hag a venydh dhe venydh.

¹³Mes an tir a vydh ynyal drefenn y drigoryon, rag frut aga gwriansow.

¹⁴Bugel dha bobel gans dha vagel, para dha eretons, hag a drig y honan yn koeswik y'n kres a dir feyth; peurens yn Bashan ha Gilead kepar hag y'n dydhyow koth.

¹⁵Avel y'n dydhyow pan dheuthys yn-mes a brow Ejyp, my a dhiskwedh dhis taklow marthys.

¹⁶An kenedhlow a wel ha bos toellys a'ga galloes oll; i a worr aga diwla war aga ganow; aga diwskovarn a vydh bodhar;

¹⁷i a lap an doust kepar ha sarf, kepar ha pedrevanes an dor: i a dheu ow kwynnel a'ga skovvaow, a dheu a-rag a'n ARLOEDH gans krena, hag own a's tevydh ahanas.

¹⁸Py Duw yw haval dhis, ow kava droktra hag owth ankevi kammwrians an remenant a'y eretons? Ny with ev y sorr bynnari, drefenn bos mall ganso a dregeredh.

¹⁹Ev a gemmer truedh ahanan arta, ha trettya agan drogoberow yn-dann y dreys. Ty a dewl agan peghosow oll yn downder an mor.

²⁰Ty a dhiskwa lenduri dhe Yakob ha tregeredh dhe Abraham, dell desys dh'agan tasow a-dhia'n dydhyow koth.