Read Kernewek Nahum 2 Bible Online

Nahum 2 - Kernewek bible

Nahum 2

¹Ev neb a skatter yw devedhys erbynn dha fas. Gwith an fos, aspi orth an fordh, krevha dha dhiwglun, krevha dha nerth yn feur.[10]

²Rag an ARLOEDH a dhaskorr arta splannder Yakob, kepar ha splannder Ysrael; rag ravnoryon re wrug aga ravna yn tien ha shyndya aga skyll.

³Skoesow y gasoryon alloesek yw rudhys, an soudoryon yw gwiskys yn kogh: an charettow a dhewynn gans dur y'n jydh may mons i darbarys, ha sheftys an guwow yw shakys.[11]

⁴Resek gwyls a wrons an charettow y'n stretys, ow fyski a-derdro y'n plenys: aga semlans yw kepar ha faglennow, poenya a wrons pub tu avel lughesennow.

⁵Ev a elow y soudoryon dhewisys; i a drebuch ow kerdhes yn-rag, i a fysk troha'n fos, ha'n mantelet yw pareusys.

⁶Yetys an avonyow yw igerys, ha'n palys a gren.

⁷Ordenys yw: hi a vydh divres, degys dhe-ves,[12] ha'y maghtethyon a gyn avel lev kelemmi, ow kweskel aga bronn.

⁸Mes Nineve — yma hy dowrow kepar ha poll dowr: i a fi dhe-ves; ‘Sevewgh, sevewgh’, a grions, mes ny dreyl denvyth.

⁹Pyllewgh hwi an arghans, pyllewgh an owr; heb fin yw an tresor, palster a bup-tra desiradow.

¹⁰Gwakter, difeyth ha diswrians! An golonn ow teudhi, dewlin ow trebuchya, diwglun oll ow krena, ha pub fas devedhys ha bos diliw!

¹¹Ple'ma fow an lewyon, ha tyller dybri an lewyon yowynk, le may hwre an lew, an lewes, kerdhes, ha'n lewik, heb denvyth dhe worra own ynna?

¹²An lew a skwardyas lowr rag y lewigow, ha taga rag y lewesow, ha lenwel a breydh y dell, ha'y fowys gans kig skwardys.

¹³Awotta, yth esov er dha bynn, yn-medh ARLOEDH an luyow; ha my a lesk hy charettow y'n mog, ha'n kledha a lenk dha lewyon yowynk; ha my a worr diwedh dhe'th preydha y'n norvys, ha nevra namoy ny vydh klewys lev dha gannasow.