Read Kernewek Habakkuk 1 Bible Online

Habakkuk 1 - Kernewek bible

Habakkuk 1

¹An profoesans a welas Habakkuk an profoes yn gwelesigeth.

²Pes termyn, A ARLOEDH, y kriav rag gweres ha ny vynnydh goslowes; ‘Freudh!’ a armav dhis ha ny vynnydh sawya?

³Prag y tiskwedhydh dhymm droktra, ha gul dhymm mires orth ahwer? Rag yma terroes ha freudh a-dheragov; yma strif, ha kedrynna a sev.

⁴Rakhenna dinerth yw an lagha, ha ny a gwirvreus nevra yn-rag. Rag an tebelwas a omsett a-dro dhe'n den gwiryon; ytho kammvreus a yn-rag.

⁵Aspiewgh yn mysk an kenedhlow, ha mirewgh, ha bedhes dhywgh marth bras: rag yn agas dydhyow y hwrav ober na grysowgh, kyn fo derivys dhywgh.

⁶Rag, otta, my a sord an Kaldeanys, kenedhel a-has ha fysk, a geskerdh dre les an tir rag sesya annedhow nag esons dhedha.

⁷Fell hag euthyk yns: aga breus ha'ga reowta a yn-rag a-dhiworta.

⁸Skaffa ages lewpardes yw aga mergh, ha gwylsa yns ages bleydhi an gorthugher: aga marghogyon a boen yn-mes, ha'ga marghogyon a dheu dhiworth pell. I a nij kepar ha'n er a fisten dhe dhybri;

⁹rag ravna i oll a dheu: i a dheu yn-rag yn aga leunder avel gwyns an howldrevel, ow kuntell kethyon avel tewes.

¹⁰Hag i a skorn an vyghternedh, ha ges yw pennternedh ragdha: i a hwerth orth pub ker; i a wra tommenn rag hy hemmeres.

¹¹Ena i a tremen kepar ha gwyns, ha mos dhe-ves; an dus kablus ma, aga nerth yw aga duw.

¹²A ny veus a'n dalleth, A ARLOEDH, ow Duw sans? Ny verwyn.[1] A ARLOEDH, ty re's ordenas[2] rag breus; A Garrek, ty re's fondyas rag keredh.

¹³Re bur yw dha dhewlagas rag gweles droktra, ha ny yllydh perthi drogober. Prag y firydh ytho orth an falswesyon, ha synsi dha daves pan dhevor an tebelwas an den yw moy gwiryon agesso?

¹⁴Ha ty a wra tus kepar ha puskes an mor, kepar ha'n pryvyon, nag eus rewler dhedha.

¹⁵Ev a gemmer peub anedha war-vann gans higenn, ha'ga thenna yn-mes gans y roes, ev a's kuntell yn y roes-draylya: rakhenna ev a lowenha ha heudhi.

¹⁶Rakhenna yth offrynn dh'y roes ha leski offrynow dh'y roes-draylya; rag bras yw y rann dredha, ha rych yw y boes.

¹⁷A wakha ytho y roes heb hedhi,[3] ow ladha kenedhlow yn tibita?