Read Kernewek Habakkuk 3 Bible Online

Habakkuk 3 - Kernewek bible

Habakkuk 3

¹Pysadow Habakkuk an profoes war Shigyonoth.[7]

²A ARLOEDH, my re glewas derivas ahanas, my re borthas own, A ARLOEDH, a'th ober; yn mysk an blydhynyow gas ev dhe dhasvewa, yn mysk an blydhynyow gas ev dhe vos godhvedhys; yn sorr porth kov a druedh.

³Duw a dheu dhiworth Teman, ha'n Sans dhiworth menydh Paran. Sela.[8] Y veuredh re gudhas an nevow, ha'y wormola re lenwis an nor.

⁴Ha'n splannder yw kepar ha'n golow; lughesennow a dheu a'y leuv, hag ena yma kudhans y nerth.

⁵A-dheragdho yth a an vall, hag yn-rag yth a an pla orth y dreys.

⁶Ev re sevis ha musura an norvys, ev re welas an kenedhlow, ha gul dhedha lemmel; brewys veu an menydhyow heb diwedh, omblegya a wrug an breow a bes vynitha: dhodho yw an fordhow a bes vynitha.

⁷My a welas tyldow Kushan yn ahwer, kroglennow tyldow bro Midyan a gren.

⁸A wrug dha sorr dewi erbynn an avonyow, A ARLOEDH, yw dha goler erbynn an avonyow po dha gonnar erbynn an mor, may marghogydh war dha vergh, dha jarettow a selwyans?

⁹Noeth yn tien y hwredh dha warak, ty a lenow an woen gans sethow.[9] Sela. Ty a fols an dor gans avonyow.

¹⁰An menydhyow a'th welas hag i a grenas; liv a dhowrow a dremenas; an islonk a dhellos y lev ha drehevel y dhiwleuv yn-bann.

¹¹An howl ha'n loer a sevis stag yn aga annedh, i a omdennas a-rag golow dha sethow hag a-rag splannder dha wuw dewynnek.

¹²Ty a gerdh der an norvys gans sorrvann, ty a stank war genedhlow gans sorr.

¹³Ty a gerdh yn-mes rag selwyans dha bobel, rag selwyans dha untys; ty a wysk an penn a ji an tebelwas, ow lommhe an selyow bys y'n konna. Sela.

¹⁴Gans y shaftys y honan ty a wanas pennow y gasoryon; i a dheuth avel korwyns dh'agan skattra; I a lowenhas kepar hag ow lenki an den truan yn-dann gel.[10]

¹⁵Ty a stankyas y'n mor gans dha vergh, ewyn a dhowrow meur.

¹⁶My a woslowas ha'm torr a grenas; orth an son ow diwweus a dremblas, podredhes a dheu y'm eskern ha'm diwarr a dhegren yn-dannov. Yn kosel my a worta dydh an ahwer dhe dhos war bobel a omsett er agan pynn.

¹⁷Kyn na vleujyow an figbrenn ha nyns eus frut war an gwinbrennyer; kyn fyll ober an olewbrenn, ha ny dhaskorr an gwelyow boes; kyn na vo an para kevys namoy y'n gorlann, ha nyns eus gwarthek y'n stallow,

¹⁸hwath my a lowenha y'n ARLOEDH, ha my a vydh heudhik yn Duw ow selwyans.

¹⁹An ARLOEDH Duw yw ow nerth, hag ev a wra ow threys kepar ha treys ewigow, hag ev a wra dhymm kerdhes war ow tylleryow ughel. Dhe'n penn-kenysi war dhaffar kerdyn.