Read Kernewek Sefania 1 Bible Online

Sefania 1 - Kernewek bible

Sefania 1

¹Ger an ARLOEDH a dheuth dhe Sefania, mab Kushi, mab Gedalia, mab Amaria, mab Hezekia, yn dydhyow Yosia[1] mab Amon, myghtern Yuda:

²Skuba dhe-ves a wrav pup-tra oll dhiworth enep an tir, yn-medh an ARLOEDH.

³My a skub dhe-ves den ha best; my a skub dhe-ves ydhyn an nev ha puskes an mor, ha domhwel an debeles; ha my a dregh mab-den a-dhiwar enep an tir, yn-medh an ARLOEDH.

⁴My a ystynn ow leuv erbynn Yuda hag erbynn an drigoryon oll a Yerusalem; ha my a dregh remenant Baal dhiworth an tyller ma ha hanow an Kemarim[2] gans an oferysi;

⁵ha'n re a omblek war an tohow dhe lu an nevow; ha'n re a omblek war an tohow ha ti re'n ARLOEDH ha ti ynwedh re Milkom;

⁶ha'n re a dreyl dhiworth an ARLOEDH; ha'n re na hwilas an ARLOEDH ha na wovynnas kusul dhiworto.

⁷Taw yn lok an Arloedh DUW: rag ogas yw dydh an ARLOEDH. Rag an ARLOEDH re bareusis sakrifis, ev re sanshas y westoryon.

⁸Hag y hwyrvydh yn dydh sakrifis an ARLOEDH, my dhe gessydhya an bennternedh, ha mebyon an myghtern, hag oll an re yw gwiskys yn dillas estren.

⁹Y'n jydh na my a gessydh oll an re a lamm dres an treudhow,[3] neb a lenow chiow aga arloedh gans garowder ha gil.

¹⁰Hag y'n jydh na, yn-medh an ARLOEDH, y fydh son a gri dhiworth Yet an Puskes, hag oulyans dhiworth an Nessa Kwartron, ha son bras an terroes dhiworth an breow.

¹¹Kynewgh, a drigoryon Maktesh, rag distruys yw oll an wikoryon, treghys dhe-ves yw an re a boes arghans.

¹²Hag y hwyrvydh y'n termyn na y hwithrav Yerusalem gans lugern, ha kessydhya an dus neb yw attes, kowlys avel gwin gesys war an godhes: neb a lever yn aga holonn, ‘Ny wra an ARLOEDH dader, na ny wra drog.’

¹³Aga rychys a dheu ha bos preydh, ha'ga chiow forsakys: i a dhrehav chiow heb triga ynna, hag i a blans gwinlannow heb eva aga gwin.

¹⁴Ogas yw dydh meur an ARLOEDH, ogas, hag ow tos pur uskis, lev dydh an ARLOEDH yw hwerow: ena an kasor a skrij.

¹⁵Dydh a sorr yw an jydh na, dydh anken hag ankres, dydh arnow ha difeyth, dydh tewlder ha tewlwolow, dydh kommol ha tewlyjyon,

¹⁶dydh hirgorn ha garm kas erbynn an sitys kerys hag erbynn an touryow ughel.

¹⁷Ha my a dhre anken dhe'n dus may kerdhons kepar ha dellyon, rag i dhe begha erbynn an ARLOEDH: ha skoellys vydh aga goes kepar ha doust, ha'ga hig kepar ha kawgh.

¹⁸Naneyl aga arghans nag aga owr a yll aga delivra yn dydh sorr an ARLOEDH; ha gans tan y avi an norvys oll a vydh devorys: rag ev a wra diwedh leun, yn sur neppyth euthyk, a beub eus trigys y'n norvys.