Read Kernewek Sefania 3 Bible Online

Sefania 3 - Kernewek bible

Sefania 3

¹Go-hi neb yw gorth ha defolys, an sita owth arwaska!

²Ny obayas hi lev vytholl; ny dhegemmeras dyskybleth; ny drestyas y'n ARLOEDH; ny nesas dh'y Duw.

³Hy fennsevigyon a-berth ynni yw lewyon owth usa; hy breusysi yw bleydhi an gorthugher; ny asons an eskern bys y'n vorow.

⁴Direwl yw hy frofoesi, falswesyon; hy oferysi re dhefolas an sentri, i re shyndyas an lagha.

⁵An ARLOEDH yw gwiryon a-berth ynni; ny wra ev sherewneth: myttin wosa myttin ev a re y vreus, pub bora ny fyll ev; mes ny woer an drogoberer meth.

⁶My re droghas an kenedhlow yn-mes: forsakys yw aga thouryow; my a dhifeythyas aga stretow ma na dremen denvyth: distruys yw aga sitys, heb denvyth, heb annedhyas.

⁷My a leveris, ‘Ty a' fydh own ahanav yn surredi; ty a dhegemmer dyskybleth’; ena ny via hy annedh treghys dhe-ves gans an kessydhyans oll a wrav er hy fynn. Mes i a omdhegi yn freth, legrys oll aga gwriansow.

⁸Rakhenna gwrewgh ow gortos, yn-medh an ARLOEDH, bys y'n jydh pan savav avel dustunier: rag kuntell an kenedhlow yw ow bodh may keskorrav an gwlaskordhow rag dinewi warnedha ow sorrvann, oll ow sorr fers; rag oll an norvys a vydh devorys gans tan ow avi.

⁹Rag ena my a dhaskorr gweusyow pur dhe'n poblow may halwons i oll war hanow an ARLOEDH rag y servya gans unn akord.

¹⁰A-dhiworth tu arall avonyow Ethiopia an dus a'm wordh, myrgh ow thus skattrys, a dhre dhymm ow offrynn.

¹¹Y'n jydh na ny vydhydh methek a oll dha wriansow may hwrussys ynna drogober er ow fynn: rag ena my a gemmer dhe-ves a-dhiworthis an dus a lowenha y'th woeth ha ny vydhydh goethus namoy war ow menydh sans.

¹²My a as ynwedh a-berth ynnos pobel boghosek ha gwann, hag i a hwila skovva yn hanow an ARLOEDH.

¹³Ny wra remenant Ysrael sherewneth, na leverel gowyow; na ny vydh taves fekyl kevys yn aga ganow; rag i a beur ha growedha, ha denvyth ny wra dhedha perthi own.

¹⁴Kan yn lowen, a vyrgh Sion; kri gans joy, a Ysrael; bydh lowen ha fest heudhik a leun golonn, a vyrgh Yerusalem.

¹⁵An ARLOEDH a gemmeras dhe-ves dha vreusow, ev re fesyas dha eskar: yma myghtern Ysrael, an ARLOEDH, a-berth ynnos: ny' fydh own a dhroktra namoy.

¹⁶Y'n jydh na y leverir dhe Yerusalem: Na borth own, a Sion; na vedhes dha dhiwleuv lows.

¹⁷An ARLOEDH, dha Dhuw a-berth ynnos, galloesek yw, ev a saw; fest heudhik yw warnas gans lowena; ev a vydh tawesek yn y gerensa, ev a lowenha warnas gans kana,

¹⁸kepar hag yn dy'goel. My a gemmer terroesa yn-mes ahanas; i a veu begh warnas ha disenor.[4]

¹⁹Otta, y'n termyn na My a ober erbynn oll myns a'th arwask y'n termyn na: ha my a saw an deves klof, ha kuntell an deves skattrys; ha my a's sett rag gormel ha ger-da yn oll an broyow a'ga meth.

²⁰Y'n termyn na my a'gas dre, y'n termyn may hwrav a'gas kuntell: rag my a wra hanow ragowgh ha gormola yn mysk oll poblow an norvys, pan dreylyav agas kethneth a-dherag agas dewlagas, yn-medh an ARLOEDH.