Read Kernewek Haggay 1 Bible Online

Haggay 1 - Kernewek bible

Haggay 1

¹Y'n nessa blydhen a Darius an myghtern, y'n hweghves mis, yn kynsa dydh an mis[1] y teuth ger an ARLOEDH der an profoes Haggay dhe Zerubbabel, mab Shealtiel, governour Yuda, ha dhe'n arghoferyas Yoshua, mab Yosedek, ow leverel,

²Yndellma y lever ARLOEDH an luyow, ow leverel: An dus ma a lever, ‘Nyns yw an termyn devedhys, an termyn may koedh dhe ji an ARLOEDH bos drehevys.’

³Ena y teuth ger an ARLOEDH der an profoes Haggay, ow leverel:

⁴Yw hemma termyn ragowgh hwi dhe driga yn agas chiow pannellys, pan yw an chi ma magor?

⁵Lemmyn ytho yndellma y lever ARLOEDH an luyow: Prederewgh a'gas fordhow.

⁶Hwi a hasas kemmys, ha doen boghes tre; hwi a dheber mes nyns eus lowr dhywgh; hwi a yv mes ny omvedhwowgh; hwi a omwisk mes nyns yw denvyth toemm; ha'n re neb a dhendil gober a dhendil gober yn yalgh gans tell.

⁷Yndellma y lever ARLOEDH an luyow: Prederewgh a'gas fordhow.

⁸Yskynnewgh an menydh ha dri prenn ha drehevel an chi may kyffiv plesour ynno ha bos enorys, yn-medh an ARLOEDH.

⁹Hwi a hwilas kemmys, hag otta, boghes; ha pan y'n dresowgh tre my a'n hwythas dhe-ves. Prag? yn-medh ARLOEDH an luyow. Rag ow chi yw magor, ha hwi a boen, peub dh'y ji y honan.

¹⁰Rakhenna an nev a-ughowgh a skon an gluth, ha'n dor y drevas.

¹¹Ha my a elwis rag syghor war an tir, war an menydhyow, ha war an ys, war an gwin nowydh, ha war an oyl, ha war an pyth a wra an dor y dhri mes, war dus, ha war warthek ha war oll an askorr a lavur diwleuv.

¹²Ena Zerubbabel mab Shealtiel ha'n arghoferyas Yoshua mab Yosedek, gans oll remenant an bobel, a obayas lev an ARLOEDH aga Duw, ha geryow an profoes Haggay, dell y'n dannvonsa an ARLOEDH aga Duw, ha'n bobel a gemmeras own a-dherag an ARLOEDH.

¹³Ena Haggay, kannas an ARLOEDH, a dherivas messaj an ARLOEDH dhe'n bobel, ow leverel: Yth esov genowgh yn-medh an ARLOEDH.

¹⁴Ha'n ARLOEDH a wrug dhe spyrys Zerubbabel mab Shealtiel, governour Yuda, difuna, ha spyrys an arghoferyas Yoshua, mab Yosedek, ha spyrys oll remenant an bobel; hag i a dheuth hag oberi yn chi ARLOEDH an luyow, aga Duw,

¹⁵y'n peswora dydh warn ugens y'n hweghves mis, y'n nessa blydhen a Darius an myghtern.[2]