Read Kernewek Haggay 2 Bible Online

Haggay 2 - Kernewek bible

Haggay 2

¹Y'n kynsa dydh warn ugens y'n seythves mis[3] y teuth ger an ARLOEDH der Haggay an profoes, ow leverel:

²Lavar hemma dhe Zerubbabel mab Shealtiel, governour Yuda ha dhe'n arghoferyas Yoshua mab Yosedek, ha dhe remenant an bobel:

³Piw yw gesys yntredhowgh a welas an chi ma yn y golewder kyns? Ha fatell y'n gwelowgh lemmyn? A ny hevel ev kepar ha travyth yn agas dewlagas hwi?

⁴Mes lemmyn bydh kolonnek, A Zerubbabel, yn-medh an ARLOEDH, ha bydh kolonnek, A arghoferyas Yoshua mab Yosedek, ha bedhewgh kolonnek, oll pobel an vro, yn-medh an ARLOEDH, hag oberewgh, drefenn ow bos genowgh, yn-medh ARLOEDH an luyow.

⁵Hemma a gevambosis genowgh pan dheuthewgh yn-mes a Ejyp; ow spyrys a bes yntredhowgh, na berthewgh own.

⁶Rag yndella yn-medh ARLOEDH an luyow: torn arall, pols byghan, ha my a wra an nevow ha'n norvys dhe grena, ha'n mor ha'n tir sygh.

⁷Ha my a wra oll an kenedhlow dhe grena, ha tresoryow an kenedhlow oll a dheu, ha my a lenow an chi ma gans golewder, yn-medh ARLOEDH an luyow.

⁸Dhymm yw an arghans, ha dhymm yw an owr, yn-medh ARLOEDH an luyow.

⁹Brassa vydh golewder diwettha an chi ma es an kynsa y'n termyn a dheu, yn-medh ARLOEDH an luyow. Hag y'n tyller ma y rov kres, yn-medh ARLOEDH an luyow.

¹⁰Y'n peswora dydh, y'n nawves mis, y'n nessa blydhen a Darius,[4] ger an ARLOEDH a dheuth dhe Haggay an profoes, ow leverel:

¹¹Yndellma y leveris an ARLOEDH: ‘Pys ervirans dhiworth an oferysi:

¹²Mar teg den kig sakrys yn pleg y dhillas ha'n pleg a doch bara, po kowl, po gwin, po oyl, po neb boes arall, a vydh an dra na sakrys?’ Ha'n oferysi a worthybis, ‘Na vydh.’

¹³Ena Haggay a leveris, ‘Mar kwra den, yw avlan dre dochya korf marow, tochya onan a'n taklow na, a vydh an dra ma avlan?’ Ha'n oferysi a worthybis, ‘Avlan vydh.’

¹⁴Ha Haggay a worthybis ow leverel: Yndella yw an bobel ma, hag yndella yw an kenedhel ma a dheragov, yn-medh an ARLOEDH: hag yndella yw gwriansow oll aga diwleuv, hag avlan yw an pyth a offrynnons ena.

¹⁵Ha lemmyn, my a'gas pys, prederewgh a-dhia'n jydh ma yn-rag, kyns men dhe vos gorrys war ven yn tempel an ARLOEDH,

¹⁶fatell o ragowgh? Pan dhes dhe gals greun rag ugens musur nyns esa saw deg: pan dhes dhe'n winwask rag tenna hanter-kans musur nyns esa saw ugens.

¹⁷My a weskis warnowgh, ha war wriansow oll agas diwleuv, gans kleves losk ha kleves melynheans y'n ys ha keser, mes ny dreylsowgh dhymm, yn-medh an ARLOEDH.

¹⁸Prederewgh a-dhia'n jydh ma yn-rag, a-dhia'n peswora dydh warn ugens a'n nawves mis;[5] a-dhia'n jydh may feu selys tempel an ARLOEDH, prederewgh!

¹⁹Usi an has y'n skiber hwath? Ha ny dhaskorras na hwath an gwinbrenn, an figbrenn, an greunaval na'n olewbrenn. Mes dhiworth an jydh ma my a'gas bennik.

²⁰Ger an ARLOEDH a dheuth dhe Haggay arta y'n peswora dydh warn ugens a'n mis, ow leverel:

²¹Lavar hemma dhe Zerubbabel, governour Yuda: My a wra an nevow ha'n norvys dhe grena;

²²My a dhomhwel an se a wlaskordhow, ha distrui galloes gwlaskordhow an kenedhlow, Disevel a wrav an charettow ha'ga lewyoryon, ha'n vergh ha'ga marghogyon a goedh, pubonan dre gledha y vroder.

²³Y'n jydh na, yn-medh ARLOEDH an luyow, my a'th kemmer, A Zerubbabel, ow gwas, mab Shealtiel, yn-medh an ARLOEDH, ha my a'th wra kepar ha bysow sel: rag my re'th tewisas, yn-medh ARLOEDH an luyow.