Read Kernewek Zekaria 1 Bible Online

Zekaria 1 - Kernewek bible

Zekaria 1

¹Y'n ethves mis an nessa blydhen Darius, ger an ARLOEDH a dheuth dhe'n profoes Zekaria mab Berekia, mab Iddo, ow leverel:

²An ARLOEDH o serrys fest orth agas tasow.

³Rakhenna lavar dhedha, Yndellma y lever an ARLOEDH: Dehwelewgh dhymmo vy, yn-medh ARLOEDH an luyow, ha my a dhehwel dhywgh, yn-medh ARLOEDH an luyow.

⁴Na vedhewgh haval dh'agas tasow, a grias an brofoesi dhedha a-henys, ow leverel, ‘Yndellma y lever an ARLOEDH: Treylyewgh a'gas tebel fordhow ha'gas tebel oberow.’ Mes ny woslowsons na'm attendya, yn-medh an ARLOEDH.

⁵Agas tasow, ple'mons i? Ha'n brofoesi, a vewons bys vykken?

⁶Yn hwir, ow geryow ha'm ordenansow, a erghis dhe'm gwesyon an brofoesi, a ny dhrehedhsons dh'agas tasow? Ena i a gavas edrek ha leverel, ‘Par dell vynnas ARLOEDH an luyow gul dhyn rag agan fordhow ha'gan oberow, yndella y hwrug ev dhyn.’

⁷Y'n peswora dydh warn ugens a'n unnegves mis, yw mis Shebat, y'n nessa blydhen a Darius, ger an ARLOEDH a dheuth dhe'n profoes Zekaria mab Berekia, mab Ido, ow leverel,

⁸Y'n nos my a viras, hag otta gour ow marghogeth war vargh rudh, ow sevel yn mysk an myrtwydh yn kownans, hag a-dryv dhodho mergh rudh, gorm ha gwynn.

⁹My a leveris, ‘Pyth yw an re ma, ow arloedh?’ An el esa ow kewsel orthiv a leveris, ‘My a dhiskwa dhis pyth yns i.’

¹⁰Ena an gour esa ow sevel yn mysk an myrtwydh a worthybis, ‘I yw an re a wrug an ARLOEDH aga dannvon dhe wandra der an norvys.’

¹¹Hag i a worthybis dhe el a'n ARLOEDH esa ow sevel yn mysk an myrtwydh ha leverel, ‘Ni re wandras der an norvys, hag awotta, oll an norvys a esedh yn kosoleth.’

¹²Hag el a'n ARLOEDH a worthybis, ‘ARLOEDH an luyow, pes termyn ny gemmerydh truedh a Yerusalem hag a sitys Yuda, may serrsys orta an deg blydhen ha tri-ugens ma?’

¹³An ARLOEDH a worthybis an el a gewsis orthiv gans geryow a guvder ha konfort.

¹⁴Ena an el esa ow kewsel orthiv a leveris dhymm, Kri, ow leverel: Yndellma y lever ARLOEDH an luyow: Avi bras a'm beus a-barth Yerusalem ha Sion,

¹⁵mes sorr bras a'm beus orth an kenedhlow yw attes. My a sorras nebes orta, mes i a weresas an galar.

¹⁶Ytho yndellma y lever an ARLOEDH: My a wra dehweles dhe Yerusalem gans truedh, hag ena ow chi a vydh dastrehevys, yn-medh ARLOEDH an luyow, ha'n gordenn-vusura a vydh ystynnys dres Yerusalem.

¹⁷Kri arta ow leverel, Yndellma y lever ARLOEDH an luyow: Ow sitys a wra fenna arta gans dader, ha'n ARLOEDH a wra konfortya Sion arta, hag arta ev a dhewis Yerusalem.

¹⁸Ena my a dhrehevis ow dewlagas ha mires, hag awotta peswar korn.[1]

¹⁹My a leveris dhe'n el esa ow kewsel orthiv, ‘Pyth yw an re ma?’ Ev a worthybis dhymm, ‘I yw an kern a skattras Yuda, Ysrael, ha Yerusalem.’

²⁰Ena an ARLOEDH a dhiskwedhas dhymm peswar gov.

²¹My a leveris, ‘Dhe wul pandra y teuth an re ma?’ Ev a worthybis, ‘An re ma yw an kern a skattras Yuda ma na dhrehevis nagonan y benn, mes an wovyon ma deuva dh'aga ownekhe ha dhe dewlel yn-nans kern an kenedhlow a dhrehevis aga hern erbynn pow Yuda dh'y skattra.’