Read Kernewek Zekaria 11 Bible Online

Zekaria 11 - Kernewek bible

Zekaria 11

¹Igor dha dharasow, a Lebanon, rag may tevorryo tan dha gederwydh!

²Oul, a verywenn, rag an gederwydhenn re goedhas; gwydh bryntin re beu gwastys! Oulyewgh, derwennow Bashan; an koes tew re beu treghys dhe'n dor!

³Yma son oulyans an vugeledh, a-ban veu shyndys aga splannder. Yma son bedhygla an lewyon yowynk, rag bos shyndys meuredh[18] an Yordan.

⁴Yndellma y lever an ARLOEDH ow Duw: Pesk an flokk rag an ladhva.

⁵Aga frenoryon a wra aga ladha ha nyns yns i kablus. An re a wra aga gwertha a lever, ‘Bennigys re bo an ARLOEDH, rych ov vy!’ Aga bugeledh ny gemmerons truedh anedha.

⁶Ytho ny gemmerav vy truedh namoy a'n re trigys y'n tir, yn-medh an ARLOEDH. Otta, yth esov ow ri pubonan yn leuv y gentrevek hag yn leuv y vyghtern. I a wra brewi an tir, ha ny wrav vy aga sawya dhiworth aga leuv.

⁷Ytho my a beskis an flokk rag an ladhva, ynwedh boghosogyon an flokk.[19] My a gemmeras diw vagel ha my a henwis an eyl Hwekter ha'y ben Kolmow,[20] ha my a beskis an flokk.

⁸My a dhileas an tri bugel yn unn mis. My a gollas perthyans gansa, hag i a wrug ow dispresya.

⁹Ha my a leveris, ‘Ny vynnav agas peski. An dhavas a vydh ow merwel, gas hi dhe verwel, ha neb a vydh dileys gas hi dhe vos dileys. Ha'n remenant — re dheppro pubonan kig hy ben.’

¹⁰Ena my a gemmeras ow bagel Hwekter ha'y therri, dhe dhilea an kevambos re wrussen gans oll an poblow.

¹¹Ev a veu dileys y'n jydh na, ha boghosogyon an flokk,[21] neb esa ow mires orthiv, a wodhva hemma dhe vos ger an ARLOEDH.

¹²My a leveris dhedha, ‘Mars yw agas bodh, rewgh vy ow gober; ha mar nyns yw agas bodh, na rewgh.’ Ytho i a boesas ow gober, deg bath warn ugens a arghans.

¹³Ha'n ARLOEDH a leveris dhymm, ‘Towl e dhe'n priweythor[22] — an pris bryntin may hwrussons ow thalvos!’ Ha my a gemmeras an deg bath warn ugens a arghans ha'ga thewlel y'n chi an ARLOEDH dhe'n priweythor.

¹⁴Ena my a dorras ow nessa bagel, Kolmow, dhe dhilea an brederedh yntra Yuda hag Ysrael.

¹⁵Ena an ARLOEDH a leveris dhymm: Kemmer arta an daffar a vugel foll.

¹⁶Awotta my a wra drehevel bugel y'n tir na wra vri a'n re usi ow mos dhe goll, na hwilas an yowynk, na sawya an shyndys; ny sosten an gwann,[23] mes ev a dheber kig an tew, ow tenna hwath aga harnow dhe-ves.

¹⁷Go-ev an koeg vugel, a forsak an flokk! Re wasko kledha y vregh ha'y lagas dyghow! Re gowlwetthro y vregh, ha re bo y lagas dyghow kowldhellys!