Read Kernewek Zekaria 14 Bible Online

Zekaria 14 - Kernewek bible

Zekaria 14

¹Awotta, dydh a dheu rag an ARLOEDH, may fo rynnys dha breydh a-berth ynnos.

²My a wra kuntell oll an kenedhlow erbynn Yerusalem rag kas; ha'n sita a vydh kemmerys, ha'n chiow pyllys, ha'n benynes defolys. Hanter an sita a dheu yn divroedh, mes an remenant ny vydh treghys dhe-ves dhiworth an sita.

³Ena an ARLOEDH a dheu yn-mes, ha batalyas orth an kenedhlow na kepar dell wra batalyas yn dydh an gas.

⁴Ha'y dreys a wra sevel, y'n jydh na, war an menydh Oliv, usi a-rag Yerusalem dhe'n howldrevel, ha'n menydh Oliv a vydh folsys yn dew hanter a'n howldrevel dhe'n howlsedhes, nans fest bras; ha hanter an menydh a vydh removyes dhe'n kledh, ha hanter dhe'n dyghow.

⁵Hwi a wra fia dre nans ow menydhyow; rag nans an menydhyow a dhrehedh bys Asal. Hwi a wra fia dhe'n fo kepar dell fisowgh a-rag an dorgrys yn dydhyow Uzzia myghtern Yuda. Ena an ARLOEDH ow Duw a dheu, hag oll an syns genes.[27]

⁶Y'n jydh na ny vydh golow, na yeynder na rew.[28]

⁷Y fydh unn jydh, aswonnys dhe'n ARLOEDH, heb naneyl dydhweyth na nosweyth, mes y fydh golow y'n gorthugher.

⁸Y'n jydh na dowr bew a wra mos yn-mes dhiworth Yerusalem, hanter anodho dhe mor an howldrevel ha hanter anodho dhe mor an howlsedhes: y hwyrvydh yn hav hag yn gwav.

⁹An ARLOEDH a vydh myghtern a-ugh oll an norvys. Y'n jydh na y fydh unn ARLOEDH, hag y hanow a vydh onan.

¹⁰Oll an tir a dheu ha bos avel Araba[29] dhiworth Geba dhe Rimmon, a'n dyghow dhe Yerusalem. Mes hi a vydh drehevys hag annedhys yn hy le, dhiworth Yet Benyamin dhe dyller an kynsa yet, dhe Yet an Gornell, ha dhiworth Tour Hananel dhe winwaskow an myghtern.

¹¹Tus a wra triga ynni; ny vydh nevra arta sakrys dhe dhistruyans, mes Yerusalem a wra triga yn sawder.

¹²Hemma a vydh an plag a wra an ARLOEDH y dhannvon dhe weskel oll an poblow re vatalyas orth Yerusalem; aga hig a beder hag i ow sevel war aga threys aga dewlagas a beder yn aga krawyow; ha'ga thaves a beder yn aga ganow.

¹³Y'n jydh na y fydh meur dheray dhiworth an ARLOEDH yn aga mysk. An eyl a dhalghenn leuv y gila, ha den a dhrehav y leuv erbynn y gentrevek.

¹⁴Ynwedh Yuda a wra omladh yn Yerusalem. Rychys oll an kenedhlow y'n kyrghynn a vydh kuntellys, owr, arghans, ha dillas, myns meur.

¹⁵Ytho y fydh plag haval dhe'n plag ma war an vergh, an mulyon, an kowrvergh, an asenes, hag oll an bestes y'n tyldow na.

¹⁶Pubonan a vo gesys dhiworth oll an kenedhlow neb a dheuth erbynn Yerusalem a wra mos yn-bann a vlydhen dhe vlydhen dhe wordhya an Myghtern, ARLOEDH an luyow, ha dhe solempnya goel an skovvaow.

¹⁷An re na wrons mos yn-bann dhiworth teyluyow an norvys dhe Yerusalem dhe wordhya an Myghtern, ARLOEDH an luyow, ny's tevydh glaw warnedha.

¹⁸Mar ny wra teylu Ejyp mos yn-bann, na dos, warnedha y fydh an plag a wra an ARLOEDH y dhannvon war an kenedhlow na wrons mos yn-bann dhe solempnya goel an skovvaow.

¹⁹Hemma a vydh kessydhyans pegh Ejyp, ha kessydhyans oll an kenedhlow na wrons mos yn-bann dhe solempnya goel an skovvaow.

²⁰Y'n jydh na ‘Sansoleth dhe'n ARLOEDH’ a vydh war klegh an vergh, ha'n pottow yn chi an ARLOEDH a vydh avel an bollow a-rag an alter.

²¹Pub pott yn Yerusalem hag yn Yuda a vydh ‘Sansoleth dhe ARLOEDH an luyow’, ha pubonan a dheu dhe sakrifia a gemmer nebes anedha, ha kegi ynna; ha ny vydh Kananek[30] namoy y'n chi ARLOEDH an luyow.