Read Kernewek Zekaria 2 Bible Online

Zekaria 2 - Kernewek bible

Zekaria 2

¹My a dhrehevis ow dewlagas arta ha mires, hag awotta gour gans kordenn-vusura yn y leuv.[2]

²My a leveris, ‘Ple'th edh?’ Ev a worthybis, ‘Dhe vusura Yerusalem, dhe weles pyth yw hy les ha'y hys.’

³Hag awotta, an el esa ow kewsel orthiv eth yn-rag, hag el arall eth yn-mes dh'y dhyerbynna

⁴ha leverel dhodho, ‘Poenya gwra, deriv orth an yonker na: Yerusalem a vydh sita heb fosow drefenn an myns meur a dus ha bestes a-ji dhedhi.

⁵My a vydh fos tan a-dro, yn-medh an ARLOEDH, ha my a vydh golewder a-bervedh ynni.’

⁶Yn-sol! Yn-sol! Fiewgh a dir an kledh, yn-medh an ARLOEDH, rag my re'gas lesas avel an peswar gwyns a nev, yn-medh an ARLOEDH.

⁷Yn-sol, A Sion! Diank, ty neb eus trigys gans Myrgh Babylon!

⁸Rag yndellma y lever ARLOEDH an luyow: Wosa an golewder ev a'm dannvonas dhe'n kenedhlow a wrug agas pylla; rag piwpynag a wra agas tochya a doch bew y lagas.

⁹Sur my a wra drehevel ow leuv er aga fynn hag i a vydh preydh dh'aga servysi. Ena hwi a woer y hwrug ARLOEDH an luyow ow dannvon.

¹⁰Kan ha lowenha, A Vyrgh Sion, rag awotta, yth esov vy ow tos, ha my a wra triga y'th fysk, yn-medh an ARLOEDH.

¹¹Lies kenedhel a vydh junys dhe'n ARLOEDH y'n jydh na hag i a vydh ow fobel. My a wra triga y'th fysk ha hwi a woer y hwrug ARLOEDH an luyow ow dannvon dhis.

¹²An ARLOEDH a wra erita Yuda avel y rann y'n tir sans hag ev a dhewis Yerusalem arta.

¹³Taw a-rag an ARLOEDH, oll kig, rag difunys yw a-dhiworth y drigva sans.