Read Kernewek Zekaria 4 Bible Online

Zekaria 4 - Kernewek bible

Zekaria 4

¹Ena an el esa ow kewsel orthiv a dhehwelis hag a wrug dhymm difuna, avel den yw difunys dhiworth y gosk.

²Ev a leveris dhymm, ‘Pandr'a welydh?’ My a worthybis, ‘My a viras, hag otta kantoler gwrys oll yn tien a owr, ha bolla war y benn ha seyth lugarn warnodho, ha seyth pibenn dhe'n lugern usi war y benn.

³Ynwedh y feu dew olewbrenn rybdho, onan a-dhyghow dhe'n bolla hag onan a-gledh dhodho.’

⁴My a wovynnas orth an el esa ow kewsel orthiv, ‘Pandra yw an taklow ma, o arloedh?’

⁵An el esa ow kewsel orthiv a worthybis, ‘A ny wodhes pyth yns i?’ My a leveris, ‘Na wonn, ow arloedh.’

⁶Ena ev a leveris dhymm, ‘Hemm yw ger an ARLOEDH dhe Zerubbabel: Ny vydh gans galloes na gans nerth, mes gans ow Spyrys, yn-medh ARLOEDH an luyow.

⁷Piw osta, A venydh krev? A-rag Zerubbabel y fydhydh gwastattir. Ena ev a wra dri yn-mes an pennmen, hag i ow karma, “Ras! Ras dhodho!” ’

⁸Ha ger an ARLOEDH a dheuth dhymm, ow leverel:

⁹‘Diwla Zerubbabel a fondyas an chi ma; y dhiwla a wra y worfenna. Ena ty a woer y hwrug ARLOEDH an luyow ow dannvon dhis.

¹⁰Piw a fi an jydh a bythow byghan? I a wra lowenhe pan welons an plemmik yn leuv Zerubbabel. ‘An seyth ma yw lagasow an ARLOEDH a wander hys-ha-hys a-dro dhe'n nor.’

¹¹Ena my a wovynnas orto, ‘Pandr'yw an dhew olewbrenn ma a-dhyghow dhe'n kantoler hag a-gledh dhodho?’

¹²Arta my a wovynnas orto, ‘Pandr'yw an dhiw skorrenn oliv ryb an dhiw bibenn owr a dhiver olew owrek?’

¹³Ev a worthybis, ‘A ny wodhes pyth yns i?’ My a leveris, ‘Na wonn, ow arloedh.’

¹⁴Ev a leveris dhymm, ‘An re ma yw an dhew untys a sev ryb Arloedh oll an norvys.’