Read Kernewek Zekaria 5 Bible Online

Zekaria 5 - Kernewek bible

Zekaria 5

¹Arta my a dhrehevis ow dewlagas ha mires, hag awotta rol-skrifa esa ow nija.

²Ev a leveris dhymm, ‘Pandr'a welydh?’ My a worthybis, ‘My a wel rol-skrifa ow nija, ugens kevelin hy hys ha deg kevelin hy les.’

³Ena ev a leveris dhymm, ‘Homm yw an volleth usi ow mos yn-mes war enep oll an tir; rag dar, yn hy herwydh a vydh pub lader rydhhes, hag a vydh pubonan usi ow kowlia rydhhes?[3]

⁴My a wra hy dannvon yn-mes, yn-medh ARLOEDH an luyow, ha hi a enter chi an lader ha chi an den a wowli re'm hanow. Hi a wra ostya yn kres y ji ha'y dhistrui, gans y blenkynnow ha'y veyn.’

⁵Ena an el esa ow kewsel orthiv eth yn-mes ha leverel dhymm, ‘Drehav dha dhewlagas ha gwel an pyth usi ow tos yn-mes.’

⁶My a wovynnas, ‘Pandra yw?’ Ev a worthybis, ‘Efa[4] yw, ow mos yn-mes.’ Hag yn-medh ev, ‘Hemm yw aga feghes dre oll an tir.’

⁷Hag awotta, an gorher plomm a veu drehevys a-dhiwarnodho, hag yth esa benyn owth esedha y'n efa.

⁸Ev a leveris, ‘Homm yw droktra’, hag ev a's herdhyas yn-nans a-ji dhe'n efa ha tewlel an gorher plomm war y anow.

⁹Ena my a dhrehevis ow dewlagas ha mires, hag awotta diw venyn esa ow mos yn-mes, gans gwyns yn aga eskelli; rag y feu dhedha eskelli avel eskelli hwibon, hag i a dhrehevis an efa yntra nor ha nev.

¹⁰My a wovynnas an el esa ow kewsel orthiv, ‘Ple'mons i ow tri an efa?’

¹¹Ev a worthybis, ‘Dhe dhrehevel chi rygdhi yn pow Shinar. Pan yw parys, hi a vydh gorrys ena yn hy le.’