Read Kernewek Zekaria 7 Bible Online

Zekaria 7 - Kernewek bible

Zekaria 7

¹Y'n peswora blydhen a Darius an myghtern, ger an ARLOEDH a dheuth dhe Zekaria y'n peswora jydh a'n nawves mis, Kislev.

²An dus a Bethel re dhannvonsa Shareser ha Regem-melek, gans aga thus, dhe bysi war an ARLOEDH,[8]

³ow leverel dhe'n oferysi yn chi ARLOEDH an luyow ha dhe'n brofoesi, ‘A dalav galari ha gul penys y'n pympes mis, dell wren vy nans yw lies blydhen?’

⁴Ger ARLOEDH an luyow a dheuth dhymm, ow leverel,

⁵Govynn oll pobel an tir ha'n oferysi: Pan wrussowgh penys ha galari y'n pympes ha seythves mis dres an deg blydhen ha tri-ugens eus passys, a veu ragov vy y hwrussowgh penys?

⁶Pan dhebrowgh hag eva, a ny dhebrowgh hag eva ragowgh hwi agas honan?

⁷A nyns yw an re ma an geryow a armas an ARLOEDH dre'n profoesi a-henys, pan veu Yerusalem annedhys ha kosel, ha'n trevow yn hy hyrghynn ha'n Negeb ha'n Shefela annedhys ynwedh?

⁸Ger an ARLOEDH a dheuth dhe Zekaria, ow leverel,

⁹Yndellma y lever ARLOEDH an luyow: Breusiwgh gans gwirvreus; gwrewgh mersi ha piteth an eyl dh'y gila.

¹⁰Na arweskewgh gwedhwes nag omdhivas, alyon na boghosek. Na dybewgh drog yn agas kolonn, den erbynn y vroder.

¹¹Mes i a skonyas a woslowes; i a dreylyas aga skoedh yn hworth ha stoppya aga skovornow a glewes.

¹²I a wrug aga holonn avel adamant rag na glewvens an lagha, na'n geryow a wrug ARLOEDH an luyow aga dannvon gans y Spyrys dre'n profoesi a-henys. Ytho sorr bras a dheuth dhiworth ARLOEDH an luyow.

¹³Pan elwis ev, ny woslowsons i. Ytho pan alwsons, ny woslewis vy, yn-medh ARLOEDH an luyow.

¹⁴My a wrug aga skattra gans korwyns yn mysk oll an kenedhlow na's aswonnsons. An tir a veu ynyal war aga lergh, ma na wrug denvyth tremena dredho na dehweles. Y hwrussons an tir hweg dhe vos ynyal.