Read Kernewek Zekaria 8 Bible Online

Zekaria 8 - Kernewek bible

Zekaria 8

¹Ger ARLOEDH an luyow a dheuth, ow leverel,

²Yndellma y lever ARLOEDH an luyow: My yw pur avius rag Sion; avius ov rygdhi gans gwres meur.

³Yndellma y lever An ARLOEDH: My re dhehwelis dhe Sion ha my a vydh trigys yn mysk Yerusalem. Ena Yerusalem a vydh henwys ‘Sita an gwir’, ha menydh ARLOEDH an luyow ‘An menydh sans.’

⁴Yndellma y lever ARLOEDH an luyow: Arta gwer goth ha benynes koth a wra esedha yn stretys Yerusalem, kettep onan gans lorgh yn y leuv drefenn niver bras y dhydhyow.

⁵Stretys an sita a vydh leun a vebyon ha myrghes ow kwari yn hy stretys.

⁶Yndellma y lever ARLOEDH an luyow: Mars yw marthys yn dewlagas remenant an bobel y'n dydhyow ma, a vydh marthys ynwedh y'm dewlagas vy? yn-medh ARLOEDH an luyow.

⁷Yndellma y lever ARLOEDH an luyow: My a wra sawya ow fobel a-dhiworth bro an howldrevel ha bro an howlsedhes.

⁸My a wra aga dri, hag i a drig a-bervedh yn Yerusalem; i a vydh ow fobel, ha my a vydh aga Duw yn gwirder hag ewnder.

⁹Yndellma y lever ARLOEDH an luyow: Bedhes krev agas diwleuv, hwi neb a glew y'n dydhyow ma an geryow na dre anow an brofoesi y'n termyn may feu grondys chi ARLOEDH an luyow, rag may fo drehevys an tempel.

¹⁰Rag kyns an dydhyow na ny veu arveth rag den, ha ny veu arveth rag best. Ny veu kres rag an den ow mos yn-mes hag ow tos a-ji, drefenn an eskar, rag my a settyas pub den oll an eyl erbynn y gentrevek.

¹¹Ha lemmyn, ny vydhav kepar dell veuv y'n dydhyow kyns dhe remenant an bobel ma, yn-medh ARLOEDH an luyow.

¹²An has a wra tevi yn kres, an gwinbrenn a re y frut, an tir a re y drevas, ha'n nevow a re aga gluth. My a re oll an taklow ma avel eretons rag remenant an bobel ma.

¹³Ha kepar dell vewgh molleth yn mysk an kenedhlow, A ji Yuda ha ji Ysrael, yn kettella my a wra agas sawya, ha hwi a vydh bennath. Na berthewgh dout, mes krevhewgh agas diwleuv.

¹⁴Yndellma y lever ARLOEDH an luyow: Par dell erviris dri drog warnowgh hwi pan wrug agas tasow ow serri, ha ny'm beu piteth, yn-medh ARLOEDH an luyow,

¹⁵yn kettella my a erviras gul mas arta y'n dydhyow ma dhe Yerusalem ha dhe ji Yuda. Na berthewgh dout.

¹⁶Hwi a wra an taklow ma: kewsiwgh an gwir an eyl orth y gila; rewgh breus a wirder ha kres yn agas porthow;

¹⁷na brederewgh drog yn agas kolonn erbynn agas kentrevek, ha na gerewgh gowlia. My a gas oll an re na, yn-medh an ARLOEDH.

¹⁸Ger ARLOEDH an luyow a dheuth dhymm, ow leverel,

¹⁹Yndellma y lever ARLOEDH an luyow: Penys an peswora mis, ha penys an seythves, ha penys an degves a vydh lowender ha heudhder ha kuntellesow hweg dhe ji Yuda. Ytho kerewgh gwiryonedh ha kres.

²⁰Yndellma y lever ARLOEDH an luyow: Hwath poblow a dheu, ha trigoryon lies sita;

²¹ha trigoryon unn sita a wra mos dhe'n arall ow leverel, ‘Deun ni devri dhe bysi war an ARLOEDH[9] ha dhe hwilas ARLOEDH an luyow. My ow honan a wra mos ynwedh.’

²²Ha meur a boblow ha kenedhlow krev a dheu dhe hwilas ARLOEDH an luyow yn Yerusalem ha dhe bysi war an ARLOEDH.[10]

²³Yndellma y lever ARLOEDH an luyow: Y'n dydhyow na deg gour dhiworth oll yethow an kenedhlow a dhalghenn lostenn an goen a wour yedhowek, ow leverel, ‘Deun ni genowgh hwi, rag ni re glewas bos Duw genowgh.’