Read Kernewek Zekaria 9 Bible Online

Zekaria 9 - Kernewek bible

Zekaria 9

¹Begh ger an ARLOEDH[11] war dir Hadrak ha Damaskus a vydh y bowesva; rag war an ARLOEDH y fydh dewlagas tus, hag oll loethow Ysrael.

²Hamath ynwedh, usi war hy or; Tyr ynwedh ha Sidon, mar skiansek kyn fons.

³Tyr re dhrehevis dinas rygdhi; re vernyas arghans avel doust, hag owr pur avel leys an stretys.

⁴Mes an Arloedh a wra hy fesya ha tewlel hy nerth y'n mor, ha hi a vydh devorys gans tan.

⁵Ashkelon a'n gwel, ha perthi own, Gaza ynwedh, ha hi a wra gwynnel gans angoes, hag Ekron, rag hi a vydh toellys a'y govenek. Gaza a gyll hy myghtern, hag Ashkelon ny vydh annedhys.

⁶Pobel gemmyskreydh a wra annedhi Ashdod, ha my a dregh dhe-ves goeth an Filistysi.

⁷My a gemmer y woes yn-mes a'y anow, ha'y daklow kasadow dhiworth y dhyns; ev ynwedh a vydh remenant rag agan Duw, hag ev a vydh avel kordh yn Yuda, hag Ekron a vydh avel an Yebusysi.

⁸My a wra kampya ryb ow chi avel gwithyas, ma na dremenno denvyth na dehweles. Ny dremen mester kethneth arta dresta, rag lemmyn my re welas gans ow dewlagas.

⁹Lowenha yn feur, myrgh Sion! Garm, myrgh Yerusalem! Awotta dha vyghtern a dheu dhis, gwiryon ha trygh, uvel hag ow marghogeth war asen, war ebel mab asen.

¹⁰My a dhistru an charett dhiworth Efraym ha'n margh dhiworth Yerusalem, Gwarak an gas a vydh distruys. Ev a gews kres dhe'n kenedhlow. Y rewl a wra drehedhes a vor dhe vor, ha dhiworth an avon[12] bys pennow an norvys.

¹¹Ha ty, drefenn goes dha gevambos, my a wra delivra dha brisnoryon mes a pytt heb dowr.

¹²Dehwelewgh dh'agas skons[13], prisnoryon govenek; hwath hedhyw my a dheriv y restoryav dewblek dhis.

¹³My a wra plegya Yuda avel gwarak ha gul Efraym avel seth. My a dhifun dha vebyon, A Sion, erbynn dha vebyon, A Bow Grek, ha my re'th wrug avel kledha kasor.

¹⁴Ena an ARLOEDH a wra omdhiskwedhes a-ughta; y seth a yn-mes avel lughes. An ARLOEDH Duw a hwyth an hirgorn, ha mos yn-rag yn korwynsow an dyghow,

¹⁵hag ARLOEDH an luyow a vydh skoes warnedha. I a wra dybri, ha stankya yn-nans an meyn-towlbrenn. I a wra eva ha garma kepar ha gans gwin,[14] ha bos lenwys avel bolla-offrynn, avel kern an alter.

¹⁶An ARLOEDH aga Duw a wra aga sawya y'n jydh na avel flokk y bobel; rag i a vydh avel meyn drudh yn kurun, ow sterenni[15] yn y dir.

¹⁷Ass yw meur y dhader, hag ass yw meur y dekter! Greun a wra dhe'n wer yowynk siweni, ha gwin nowydh an myrghes.