Read Kernewek Malaki 2 Bible Online

Malaki 2 - Kernewek bible

Malaki 2

¹Ha lemmyn, an gorhemmynn ma yw ragowgh hwi, A oferysi.

²Mar ny woslewowgh, ha mar ny worrowgh agas kolonn dhe ri glori dhe'm hanow, yn-medh ARLOEDH an luyow, my a dhannvon molleth warnowgh hwi, ha my a volleth agas bennathow. Yn hwir, my a's mollethis seulabrys, rag na'n gorrsowgh yn agas kolonn.

³Awotta my a wra keredhi an has a'gas govis; my a wra lesa kawgh war agas fasow, kawgh agas dy'goelyow, ha hwi a vydh kemmerys dhe-ves ganso.

⁴Hwi a wra godhvos y tannvenis dhywgh an gorhemmynn ma, rag may pessyo ow hevambos gans Levi, yn-medh ARLOEDH an luyow.

⁵Ow hevambos a veu ganso, bewnans ha kres, ha my a's ros dhodho; hag own, hag ev a borthas own ahanav hag ev a sevis yn agha a'm hanow.

⁶Lagha a wirder esa yn y anow, ha kammhynseth ny veu kevys war y dhiwweus. Ev a gerdhas genev yn kres hag ewnhynseth, ha treylya lies dhiworth pegh.

⁷Rag y koedh dhe dhiwweus an oferyas gwitha skians, hag y tal dhe dus hwilas dyskans a'y anow, drefenn y vos kannas ARLOEDH an luyow.

⁸Ha hwi a dreylyas a-dhiworth an fordh ha gul dhe lies trebuchya y'n lagha; hwi a dhefolas an kevambos gans Levi, yn-medh ARLOEDH an luyow.

⁹Ytho my a'gas kawsyas dhe vos dispresys hag iselhes a-rag oll an bobel, a-ban na withsowgh ow fordhow mes hwi a dhiskwa faverans y'n lagha.

¹⁰A ny'gan beus, ni oll, unn Tas? A ny'gan gwrug unn Duw? Prag y hwren ni toella an eyl y gila, ow tisakra kevambos agan tasow?

¹¹Yuda re beu dislen, ha neppyth kasadow re beu gwrys yn Ysrael ha Yerusalem: rag Yuda re dhisakras an sentri a wra an ARLOEDH y gara, ha re dhemmedhis an vyrgh a dhuw astranj.

¹²An ARLOEDH re droggho dhe-ves a-dhiworth tyldow Yakob an gour a wra hemma, an test ha'n pledyas,[5] hag ev neb a dhre offrynn dhe ARLOEDH an luyow.

¹³An nessa dra ma hwi a wra: hwi a worher alter an ARLOEDH gans dagrow, gans oelva ha galar, a-ban na vir orth an offrynn namoy, na'n kemmer gans plesour dhiworth agas diwleuv.

¹⁴Hwi a lever, ‘Prag?’ Rag an ARLOEDH yw test yntra jy ha gwreg dha yowynkneth, a-ban derrsys fydh gensi, kynth yw hi dha gowethyades, an wreg a'th kevambos demmedhyans.

¹⁵Ny wrug denvyth yndella mars usi dhodho remenant a'n spyrys. Ha pandr'a hwila den? Agh sans. Rakhenna omwithewgh yn agas spyrys, ha na dorr fydh gans gwreg dha yowynkneth.

¹⁶My a gas torrva demmedhyans, yn-medh an ARLOEDH, Duw Ysrael, ha gour neb a gudh y dhillas gans freudh, yn-medh ARLOEDH an luyow. Ytho omwithewgh yn agas spyrys, ha na derrewgh fydh.

¹⁷Hwi re skwithas an ARLOEDH gans agas geryow. Hwi a lever, ‘Fatell y'n skwithsyn?’ Pan leverewgh ‘Peub neb a wra drog yw da yn golok an ARLOEDH, hag ev yw pes da gansa’, po ‘Ple'ma an Duw a wirvreus?’