Read Kernewek Malaki 3 Bible Online

Malaki 3 - Kernewek bible

Malaki 3

¹Otta, my a dhannvon ow hannas, hag ev a wra pareusi an fordh a-ragov! Ha'n Arloedh a hwilowgh a dheu a-dhesempis dh'y dempel; ha kannas an kevambos, a hwensowgh, otta, ev a wra dos, yn-medh ARLOEDH an luyow.

²Mes piw a yll perthi dydh y dhevedhyans? Piw a yll sevel pan omdhiskwa? Rag ev a vydh avel tan an purheor, avel sebon an troghyer.

³Ev a esedh dhe lanhe ha dhe burhe arghans; ev a wra glanhe mebyon Levi hag ev a's purha avel owr hag arghans, hag i a dhre dhe'n ARLOEDH offrynn yn ewnder.

⁴An offrynn a Yuda ha Yerusalem a vydh plegadow dhe'n ARLOEDH, kepar hag y'n dydhyow koth, ha kepar hag yn blydhynyow kyns.

⁵Ha my a dheu nes dhywgh rag breus. Ha my a vydh test uskis erbynn an hudoryon ha'n avoutroryon, ha'n re a de yn fals, hag erbynn an re a doell an gweythor a'y wober, an wedhwes ha'n omdhivas, ha treylya dhe-ves an alyon, ha na berthons own ahanav, yn-medh ARLOEDH an luyow.

⁶Rag my yw an ARLOEDH, ny wrav vy chanjya, ha hwi fleghes Yakob, nyns owgh hwi devedhys dhe dhiwedh.

⁷A-dhia dhydhyow agas tasow, hwi a dhibarthas a'm gorhemmynnow, ha ny wrussowgh aga obaya. Dehwelewgh dhymmo vy ha my a dhehwel dhywgh, yn-medh ARLOEDH an luyow. Hwi a lever, ‘Fatell dhehwelyn?’

⁸A lader den dhiworth Duw? Mes hwi a lader dhiworthiv. Hwi a lever, ‘Fatell ledryn dhiworthis?’ An dega ha'n offrynn!

⁹Hwi yw yn-dann volleth, a-ban esowgh hwi ow ladra ahanav, an genedhel gowal!

¹⁰Drewgh an dega dien a-ji dhe'n withva, may fo boes[6] y'm chi. Prevewgh vy yn hemma, yn-medh ARLOEDH an luyow. A ny igorav an fenestri a nev ha diveri bennath ragowgh yw moy ages lowr?

¹¹My a wra keredhi an hes a dhevor ragowgh hwi ma na dhistru an frut a'gas tir, ha'n gwinbrenn y'n gwel ny vydh heb frut, yn-medh ARLOEDH an luyow.

¹²Ena oll an kenedhlow a wra agas gelwel gwynnvys, drefenn hwi dhe vos gwlas dhesiradow, yn-medh ARLOEDH an luyow.

¹³Hwi re gewsis geryow hwerow er ow fynn, yn-medh an ARLOEDH. Hwath hwi a lever, ‘Fatell gewssyn er dha bynn?’

¹⁴Hwi a leveris, ‘Euver yw servya Duw. Pandr'a veu agan gwayn ow kwitha y jarj hag ow kerdhes a-derdro avel kynoryon a-rag ARLOEDH an luyow?

¹⁵Mes lemmyn ni a elow an re orgelus gwynnvys. Devri, drogoberoryon re siwenis, hag ynwedh an re a dhefias Duw a dhienkas.’

¹⁶Ena an re a berthi own a'n ARLOEDH a geskewsis an eyl gans y gila, ha'n ARLOEDH a woslowas ha klewes. Lyver kovadh a veu skrifys a-ragdho a-dro dhe'n re a owna an ARLOEDH ha prederi a'y Hanow.

¹⁷I a vydh dhymmo vy, yn-medh ARLOEDH an luyow, ow thresor arbennik y'n jydh may hwrav vy oberi. My a gemmer truedh anedha par dell gemmer den truedh a'y vab neb a'n serv.

¹⁸Hag arta hwi a wra dissernya ynter an den gwiryon ha'n tebelwas, ynter an den a serv Duw ha neb na'n serv.